Luke 4 - AI VOLA TABU

Sa dauveretaki Jisu na tevoro, 1-13. Sa vakatekivu ko Jisu me vunau, 14-32. Sa vakabulai ira e lewe vuqa era sa tauvi-mate, 33-44.

¹ IA ni sa sinai ko Jisu e na Yalo Tabu, sa lesu tale mai na Joritani, a sa kauti koya na Yalo ki na loma ni veikau,

² a sa dauveretaki koya ko na tevoro ka bogi vasagavulu. A sa sega na ka e kania ko koya e na veisiga ko ya: ia ni sa oti sa qai viakana.

³ A sa kaya na tevoro vei koya, Kevaka ko sa Luve ni Kalou, mo kaya mada me tubu mei buli madrai na vatu o qo.

⁴ A sa vosa vua ko Jisu, ka kaya, Sa volai, Ena sega ni bula na tamata e na madrai duaduaga, a ya e na ka kecega sa lesia ko na Kalou.

⁵ A sa kauti koya ko na tevoro ki na dua na ulu-ni-vanua cecere, a sa vakaraitaka vei koya vakasauri sara na veimatanitu kecega e vuravura.

⁶ Sa qai kaya na tevoro vei koya, A lewa ni ka kecega o qori kaʼu na solia vei iko, kei na kedrai ukuuku talega, ni sa soli vei au, ia kaʼu sa solia vei koya yadua kaʼu sa via solia kina:

⁷ ia kevaka ko na soro vei au, ena nomu kecega.

⁸ A sa vosa vua ko Jisu, ka kaya, Mo lakani ki dakuqu, Satani: ni sa volai, Mo soro vei Jiova na nomu Kalou, ia mo qaravi koya duaduaga.

⁹ A sa kauti koya ki Jerusalemi, ka vakatikora e na taba ni vale ni soro, a sa kaya vua, Kevaka ko sa Luve ni Kalou, mo rika sobu eke;

¹⁰ ni sa volai, Ena vakarota ko koya vei ira na nona agilose e na vukumu, me ra maroroi iko:

¹¹ ia era na keveti iko e na ligadra, de dua na siga ko tavutu beka kina na yavamu e na vatu.

¹² A sa vosa ko Jisu, ka kaya vua, Sa kainaki, Mo kakua ni vakatovolei Jiova vakaca na nomu Kalou.

¹³ Ia ni sa vakaotia kecega na dauvere ko na tevoro, sa lako tani vua ka yacova e dua na gauna.

¹⁴ A SA lesu tale ko Jisu e na kaukauwa ni Yalo ki Kalili; a sa kuruvaki na kenai rogorogo ki na vanua taucoko sa vakavolivolita.

¹⁵ A sa vakatavuvuli tiko e na nodra veivale ni lotu, a ra sa dokai koya ko ira kecega.

¹⁶ A sa yaco ki Nasareci, a koro ka susugi kina: ia me vaka na nonai valavala, sa curu ki na vale ni lotu e na siga ni vakacecegu, a sa tu cake me wili vola.

¹⁷ A sa soli vua nai vola nei Isaia na parofita. Ia ni sa tevuka nai vola, sa kunea na tikina sa volai kina,

¹⁸ Sa tu vei au na Yalo i Jiova, e na vuku ni sa lumuti au ko koya meʼu vunautaka nai tukutuku-vinaka vei ira era sa dravudravua; sa talai au mai meʼu vakabulai ira sa kavoro na yalodra, meʼu vunautaka ua sereki vei ira na bobula, kei na rai tale vei ira era sa mataboko, meʼu vakalala-gataki ira era sa mavoa,

¹⁹ meʼu vunautaka na yabaki vinaka i Jiova.

²⁰ A sa viviga nai vola, a sa solia tale vua nai talatala, a sa tiko sobu; a sa vakaraici koya matua na matadra kecega era tiko e na vale ni lotu.

²¹ A sa vakatekivu ko koya me kaya vei ira, E na siga o qo sa vakayacori e na daligamudou nai vola o qo.

²² A ra sa vakadinadina vua ko ira kecega, a ra sa kidacala e na vuku ni vosa vinaka sa lako mai na gusuna. A ra sa kaya, Sa sega li ni luve i Josefa ko koya o qo?

²³ A sa kaya vei ira ko koya, E dina ga dou na vosataka vei au nai bole o qo, Vu-ni-wai, mo mani vakabulai iko: a ka kecega eda sa rogoca sa caka mai Kaperinaumi, kitaka talega e na nomu vanua o qo.

²⁴ Sa kaya talega ko koya, Au sa kaya vakaidina vei kemudou, Sa sega e dua na parofita sa vinakati e na nona vanua.

²⁵ Ia kaʼu sa vosa dina vei kemudou, Era lewe vuqa na yada e Isireli e na gauna i Ilija, ni sa sogoti ko lomalagi ka yabaki tolu kei na vula e ono, ni sa dausiga vakalevu na vanua taucoko;

²⁶ a sa sega ni talai ko Ilija vua e dua vei ira, vua ga e dua na yada mai Sarepita, e na yasayasa vaka-Saitoni.

²⁷ A sa lewe vuqa talega na vukavuka e Isireli e na gauna i Ilisa na parofita; a sa sega e dua vei ira sa vakasavasavataki, o Neemani ga na kai Siria.

²⁸ Ia ko ira kecega e na vale ni lotu, ni ra sa rogoca na veika o qo, era sa sinai e na cudru,

²⁹ a ra sa tu cake, ka vakasavi koya ki nai bili ni koro, a ra sa kauta ki na bati ni ulu-ni-vanua sa tara tu kina na nodra koro, me ra biliga mai na bati-ni-savu.

³⁰ A sa lako ko koya e na kedra maliwa, ka lako tani yani.

³¹ A sa lako sobu ki Kaperinaumi, a koro mai Kalili, a sa vakatavuvuli e na veisiga ni vakacecegu.

³² A ra sa kidacala e na nonai vakavuvuli, ni sa vosa ko koya e na kaukauwa vakai koya.

³³ A sa tiko e na vale ni lotu e dua na tamata, ka curumi koya na yalo ni dua na tevoro tawa-savasava, a sa qoqolou e na domo levu,

³⁴ ka kaya, Ule! a cava vei kedatou, i Jisu na kai Nasareci? o sa lako beka mai me rawai keitou? au sa kila se ko cei ko iko, na Yalosavasava ni Kalou.

³⁵ A sa vunauci koya ko Jisu, ka kaya, Mo galu ga, ka lako tani mai vua. Ia ni sa vakabalei koya oti na tevoro e na kedra maliwa, sa qai lako tani mai vua, a sa sega ni vakama-voataka.

³⁶ A ra sa kidacala kecega, a ra sa veivosaki vakai ira, ka kaya, A cava beka na vosa o qo! ni sa vosa vakaturaga ka vakaukauwa ko koya vei ira na yalo tawa-savasava, a ra sa lako tani mai.

³⁷ A sa kuruvaki yani na kenai rogorogo ki na veiyasana kecega ni vanua sa vakavolivolita.

³⁸ A sa cavu mai na vale ni lotu ko koya, ka curu ki na vale i Saimoni. A sa tauvi tu ko na tina ni wati i Saimoni e na dua na katakata levu; a ra sa masuti koya e na vukuna.

³⁹ A sa tu ko koya e tikina, ka vunauca na katakata: a sa takali vua; a sa tu cake sara ko koya, ka qaravi iratou.

⁴⁰ Ia ni sa dromu tiko na siga, o ira kecega sa so na nodra era sa tauvi e na mate e vuqa, era sa kauti ira mai vei koya: a sa tabaki ira yadua ko koya e na ligana, ka vakabulai ira.

⁴¹ Ia era sa lewe vuqa sa lako tani maikina e so na tevoro, ni sa qoqolou tiko, ka kaya, O iko na Karisito na Luve ni Kalou. A sa vunauci ira ko koya, ka sega ni laiva me ra vosa, ni ra sa kila ni sa Karisito ko koya.

⁴² Ia ni sa siga mai sa lako tani ko koya, ka lako ki na dua na yasana lala: a ra sa vakasaqarai koya ko ira na tamata, a ra sa lako mai vua, ka tarovi koya me kakua ni lako tani vei ira.

⁴³ A sa kaya vei ira ko koya, Sa dodonu meʼu lako me tukuna nai tukutuku-vinaka ni matanitu ni Kalou e na Veikoro tani talega: ni sa ka ga o qo kaʼu sa talai mai kina.

⁴⁴ A sa dauvunau ko koya e na veivale ni lotu mai Kalili.