Luke 3 - AI VOLA TABU

Sa vunau ko Joni na dauveipapitaiso, 1-18. (Sa biuti koya emuri ko Eroti ki na vale ni veivesu, 19, 20.) Sa papitaisotaki Jisu ko Joni, 21, 22. Ai tubutubu t Jisu, 23-38.

¹ IA o nai katinikalima ni yabaki sa tui kina ko Tiperiu Sisari, ni sa turaga mai Jutia ko Ponitio Pilato, a sa turaga mai Kalili ko Eroti, a sa turaga mai Ituria kei na vanua ko Tirakoniti ko Filipo na tacina, a sa turaga mai Apilini ko Lisania;

² ni sa bete levu ko Anasi kei Kaiafa, sa qai yaco na vosa ni Kalou vei Joni na luve i Sakaria e na veico.

³ A sa lako mai ko koya ki na veiyasana kecega sa voleka ki na Joritani, a sa vakarota na nodra papitaiso era veivutuni me bokoci nai valavala ca;

⁴ me vaka sa volai e nai vola ni vosa i Isaia na parofita, ni sa kaya, A domona e dua sa kacikaci e loma ni veico, Dou caramaka na sala i Jiova, cakava me dodonu na nona salatu:

⁵ ena vakasinaiti na buca kecega, ka na vakalolovirataki na ulu-ni-vanua kei na vanua-cecere kecega; ka na vakadodonutaki na veika sa veve, ka na vakalogalogavinakataki na veisala sa sukusukura;

⁶ ena raica talega na vu ni bula mai vua na Kalou na tamata kecega.

⁷ Sa qai kaya ko koya vei ira na lewe vuqa era sa lako mai me papitaisotaki ira ko koya, Oi kemudou na kawa ni gata, o cei sa vakasalataki kemudou mo dou dro tani mai na cudru sa lako mai?

⁸ o koya mo dou qai vuataka na vua e kilikili kei na veivutuni; ia dou kakua ni vakatekivu me kaya e na lomamudou, A tama i keimami ko Eparaama; niʼu sa kaya vei kemudou, ni sa rawarawa vua na Kalou me vakatubura na veivatu o qo me ra luve i Eparaama.

⁹ Ia na matau sa no edaidai e na vu ni kau; ka sa ta laivi kina na kau kecega sa sega ni vuataka na vua vinaka, a sa biu ki na buka waqa.

¹⁰ A sa tarogi koya ko ira na lewe vuqa, ka kaya, A cava me keimami cakava?

¹¹ A sa vosa ko koya, ka kaya vei ira, O koya sa rua na nonai curucuru, me solia vua sa sega na nona; me kitaka vaka talega kina ko koya sa tu vua na kakana.

¹² Sa qai lako talega mai ko ira e so na daukumuna nai vakacavacava me ra papitaisotaki, a ra sa taroga, Vakavuvuli, a cava me keimami cakava?

¹³ A sa kaya vei ira ko koya, Dou kakua ni taura me levu cake e na ka sa lesi vei kemudou.

¹⁴ O ira e so talega sai valu, era sa mai tarogi koya, ka kaya, A cava me keimami cakava? A sa kaya vei ira ko koya, Dou kakua ni vakacacana e dua, se beitaka vakailasu; dou lomavinaka talega e na kemudoui voli.

¹⁵ Ia ni sa wawa ko ira na tamata, a sa vakananumi Joni e na lomadra ko ira kecega na tamata, se na Karisito ko koya, se segai;

¹⁶ sa vosa ko Joni, ka kaya vei ira kecega, E dina kaʼu sa papitaisotaki kemudou e na wai: a sa lako mai ko koya sa levu cake vei keirau, ia na wa ni nonai vava kaʼu sa sega ni yaga meʼu sereka: ena papitaisotaki kemudou ko koya e na Yalo Tabu kei na buka waqa:

¹⁷ ia sa taura na nonai sivi ni sila na ligana, ka na vakasavasavataka sara ko koya na sila ni nona rara, ka binia vata na sila ki na nona lololo; ka na vakama ko koya na qana e na buka waqa e tawa bokoci rawa.

¹⁸ A sa vuqa tale na ka sa vunautaka ko koya vei ira na tamata e na nona vunau. (

¹⁹ Ia ko Eroti na turaga, ni sa vunauci koya ko koya e na vuku i Erotia na wati i Filipo na tacina, kei na vuku ni ka ca kecega sa kitaka ko Eroti,

²⁰ sa qai vakaikuritaka me levu cake, ni sa sogoti Joni e na vale ni veivesu.)

²¹ Ia ni ra sa papitaisotaki tiko na tamata kece, sa papitaisotaki ko Jisu talega; ia ni sa masu tiko, sa wase rua ko lomalagi,

²² a sa lako sobu mai vua vakayago na Yalo Tabu, me vaka na ruve; a sa dua na domo mai lomalagi, sa kaya, O iko na noqu Gone ni toko; au sa dauvinakati iko vakalevu.

²³ A sa voleka ni oti nai katolusagavulu ni yabaki i Jisu, o koya sa kainaki kina ni sa luve i Josefa, o koya na luve i Ili,

²⁴ o koya na luve i Macati, o koya na luve i Levi, o koya na luve i Meliki, o koya na luve i Janana, o koya na luve i Josefa,

²⁵ o koya na luve i Mataceia, o koya ua luve i Emosi, o koya na luve i Neumi, o koya na luve i Esili, o koya na luve i Nake,

²⁶ o koya na luve i Maaci, o koya na luve i Mataceia, o koya na luve i Semei, o koya na luve i Josefa, o koya na luve i Juta,

²⁷ o koya na luve i Joana, o koya na luve i Risa, o koya na luve i Soropepeli, o koya na luve i Salacieli, o koya na luve i Niri,

²⁸ o koya na luve i Meliki, o koya na luve i Ati, o koya na luve i Kosami, o koya na luve i Elimotami, o koya na luve i Eri,

²⁹ o koya na luve i Jose, o koya na luve i Elieseri, o koya na luve i Yorima, o koya na luve i Macati, o koya na luve i Levi,

³⁰ o koya na luve i Simioni, o koya na luve i Juta, o koya na luve i Josefa, o koya na luve i Yonani, o koya na luve i Eliakimi,

³¹ o koya na luve i Melea, o koya na luve i Menani, o koya na luve i Mataca, o koya na luve i Nacani, o koya na luve i Tavita,

³² o koya na luve i Isei, o koya na luve i Opeti, o koya na luve i Poasi, o koya na luve i Salimoni, o koya na luve i Naasoni,

³³ o koya na luve i Aminatapi, o koya na luve i Erami, o koya na luve i Esiromi, o koya na luve i Feresi, o koya na luve i Juta,

³⁴ o koya na luve i Jekope, o koya na luve i Aisake, o koya na luve i Eparaama, o koya na luve i Tera, o koya na luve i Neori,

³⁵ o koya na luve i Seruke, o koya na luve i Rekau, o koya na luve i Peleki, o koya ua luve i Eperi, o koya na luve i Sela,

³⁶ o koya na luve i Keinana, o koya na luve i Arifakisati, o koya na luve i Semi, o koya na luve i Noa, o koya na luve i Lemeki,

³⁷ o koya na luve i Mecusela, o koya na luve i Inoki, o koya na luve i Jereti, o koya na luve i Malelili, o koya ua luve i Keinana,

³⁸ o koya na luve i Inosi, o koya na luve i Seci, o koya na luve i Atama, o koya na luve ni Kalou.