Luke 21 - AI VOLA TABU

Sa dokai koya na yalewa dravudravua le ko Jisu ni sa solia na nonai yau kece ki na Kalou, 1-4. Sa tukuna ni na ca ko Jerusalemi, 5-24. Sa tukuna na veivakatakilakila ni nona lako mai me lewai ira na kai vuravura, 25-33. Sa vakavulici ira na nona tamata me ra dauvakatawa, 34-38.

¹ A SA ta cake ko koya, ka raici ira na vutuniyau ni ra sa biuta na nodrai solisoli ki na vale ni yau.

² A sa raica talega e dua na yada sa dravudravua ni sa biuta kina e rua na kena lailai sara ni lavo.

³ A sa kaya ko koya, Au sa kaya vakaidina vei kemudou, Na yada dravudravua o qo sa biuta vakalevu kina, o ira kecega vakalailai ga:

⁴ ni ra sa biuta e so ko ira kecega o qo, mai na nodra ka e vuqa, ki na veisolisoli me nona na Kalou: ia ko koya, mai na nona dravudravua, sa biuta kecega kina na nona ka e bula kina.

⁵ IA ni sa tukuna na vale ni soro ko ira o so, ni sa vakaiukuukutaki e na veivatu vinaka kei na veisolisoli, sa kaya ko koya,

⁶ Na veika u qo dou sa raica, ena yaco na siga ena sega na veivatu me veitaqataqai, me kakua ni talaraki sobu.

⁷ A ra sa tarogi koya, ka kaya, Vakavuvuli, ena yaco ninaica na veika o qo? ia ka cava mei vakatakilakila ni sa kolai yaco na veika o qo?

⁸ A sa kaya ko koya, Raica vinaka de dou vakacalai: ni ra na lewe vuqa era na lako mai e na yacaqu, ka kaya, Sai koya koi au; a sa qai toro voleka na gauna: ia mo dou kakua ga ni laʼki muri ira.

⁹ Ia ni dou sa rogoca nai valu, se na veisei, kakua ni kidroa; ni sa kilikili me yaco mada eliu na veika o qo; ia ka sa sega ni voleka sara nai vakataotioti.

¹⁰ Sa qai kaya vei ira ko koya, Ena veibolebolei na vanua e so, kei na matanitu e so:

¹¹ ia ena vuki vakalevu na veiyasana e vuqa, ena tubu talega na dausiga, kei na mate ca; ia ena rairai e so na ka e dau veivakarerei ka so nai vakatakilakila levu mai lomalagi.

¹² Ia ni sa sega ni yaco na ka kecega o qo era na tauri kemudou, ka vakacacani kemudou, ka soli kemudou yani ki na veivale ni lotu, kei na veivale ni veivesu, ia dou na kau ki na matadra na tui kei na turaga, e na vuku ni yacaqu.

¹³ Ia na ka o qo ena yaco me nomudoui vakadinadina.

¹⁴ O koya mo dou qai vakataudeitaka na lomamudou, mo dou kakua ni nanuma kiliu e na vuku ni ka mo dou kaya:

¹⁵ niʼu na solia vei kemudou na gusu, kei na vuku ena sega e dua na nomudou meca ena veiletitaka rawa, se vorata.

¹⁶ Ia era na soli kemudou yani na nomudou qase, kei na tacimudou, kei na kai nomudou, kei na wekamudou; a ra na vakavuna na nomudou mate e so.

¹⁷ Ia dou na cati vei ira na tamata kecega, e na vuku ni yacaqu.

¹⁸ Ia ena tawa rusa e dua na drau ni ulumudou.

¹⁹ Dou maroroya na yalomudou ni dou sa dauvosota.

²⁰ Ia ni dou sa raica ni sa buki na druadrua mai Jerusalemi e na mataivalu e so, dou kila kina ni sa qai voleka na kena ca sara:

²¹ mo qai dro ki na veiulu-ni-vanua ko ira era sa tiko e Jutia; ia ko ira sa tiko eloma me ra lako tani yani; me kakua talega ni curu mai kina ko ira sa tiko e na veiyasana kisau.

²² Ni sa gauna o qo me ia kina na cudru, me vakayacori kecega na ka sa volai.

²³ Ka na ca vei ira sa bukete, kei ira era sa vakasucuma na gone, c na gauna ko ya! ni na ca vakalevu sara na vanua, a ra na cudruvi vakalevu na tamata o qo.

²⁴ A ra na bale e na bati ni seleiwau, a ra na kau ki na veivanua me ra bobula kina: a ra na butuki Jerusalemi sobu ko ira na veimatanitu, me yaco ki nai vakataotioti ni nodra gauna na veimatanitu.

²⁵ Ena qai tu nai vakatakilakila e so e na mata-ni-siga, kei na vula, kei na veikalokalo; a ra na ca na lewe ni veivanua e vuravura, ni ra na kidroa: ena kudruta na wasaliwa kei na biau;

²⁶ ena kani yatedra na tamata e na rere, ni ra sa waraka na veika sa voleka ni yaco e vuravura: ni na veitosoyaki na veika kaukauwa ni lomalagi.

²⁷ Ia era na qai raica na Luve ni tamata ni sa lako mai e na o c na kaukauwa kei nai ukuuku levu.

²⁸ Ia ni sa vakatekivu me yaco na veika o qo, dou ta cake, ka laveta cake na ulumudou; ni dou sa qai voleka ni vakabulai.

²⁹ A sa vosataka vei ira e dua na vosa vakatautauvata: Raica na lolo, kei na veikau kecega;

³⁰ ni ra sa tubui lekaleka, dou sa raica ka kila kina vakai kemudou ni sa voleka na vula i katakata.

³¹ Sa vaka talega kina koi kemudou, ni dou sa raica ni sa yaco na veika o qo, dou kila kina ni sa qai voleka na matanitu ni Kalou.

³² Au sa kaya vakaidina vei kemudou, Ena sega ni takali nai tabatamata o qo, ena yaco mada eliu na ka kecega.

³³ Ena takali ko lomalagi kei vuravura; ia na noqu vosa ena sega ni takali.

³⁴ Ia dou qarauni kemudou vinaka, de dua na siga sa bibi kina na yalomudou e na daumateulu, kei na daumateni, kei na lomaocaoca e na veika ni bula o qo, ka yaco vakidacala kina vei kemudou na siga ko ya.

³⁵ Ni na vaka ga nai cori ni sa yaco vei ira kecega era sa tiko e na dela i vuravura kecega.

³⁶ O koya mo dou qai vakatawa, ka daumasu tikoga, mo dou okati kina mo dou yaga me bula mai na ka kecega o qo ena yaco mai, ka tu e na matana na Luve ni tamata.

³⁷ A sa vakatavuvuli tiko ko koya e na vale ni soro ni sa siga: ia ni sa bogi sa lako ki taudaku, ka moce e na ulu-ni-vanua sa vakayacani ki na veiolive.

³⁸ A ra sa lako kecega mai vua na lewe vuqa ki na vale ni soro ni sa mataka caca, me ra rogoci kova.