Luke 20 - AI VOLA TABU

Sa tarogi Jisu e so se ko cei sa lesi koya, 1-8. Sa tukuna na vosa vakatautauvata ni were-ni-vaini, 9-19. Sa vakavulici ira me ra solia na drawe vei Sisari, 20-26. Sa tukuna ni na tu cake tale na mate, 27-40. Sa tarogi ira, ka vakavulici ira, 41-47.

¹ A SA yaco e na dua na siga ko ya, ni sa vakavulici ira tiko na tamata ko koya e na vale ni soro, ka vunautaka nai tukutuku-vinaka, era sa lako mai na bete levu, kei na vu-ni-vola, kei na qase,

² a ra sa tarogi koya, ka kaya, Tukuna mai vei keitou, ko sa lesi vakaevei mo cakava na veika o qo? se ko cei sa solia vei iko nai lesilesi o qo?

³ A sa vosa ko koya, ka kaya vei ira, Au na tarogi kemudou talega e na dua na ka; ia dou tukuna mai vei au:

⁴ A papitaiso i Joni, sa mai lomalagi, se mai na tamata?

⁵ A ra sa veivosakitaka vakai ira, ka kaya, Kevaka eda na kaya, Mai lomalagi; ena qai kaya ko koya, Ia dou sa sega ni vakadinati koya e na vuku ni cava?

⁶ Ia kevaka eda na kaya, Mai na tamata; era na viriki keda e na vatu ko ira kecega na tamata; ni ra sa vakadinata ni sa parofita ko Joni.

⁷ A ra sa kaya, ni ra sa tawa tukuna rawa se maivei.

⁸ A sa kaya vei ira ko Jisu, Au sa sega talega ni tukuna vei kemudou se kaʼu sa lesi vakaevei meʼu kitaka na veika o qo.

⁹ Sa qai vakatekivu ko koya me tukuna na vosa vakatautauvata o qo vei ira na tamata: Sa dua na tamata sa tea e dua na were-ni-vaini, ka yalata vei ira e so nai vakatau-ni-were; a sa qai lako ki na vanua tani me tiko vakadede kina.

¹⁰ Ia ni sa yaco na kena gauna, sa tala ko koya e dua nai talatala vei ira nai vakatau-ni-were, mo ra solia vua e so na vua ni were-ni-vaini: a sa yaviti koya ko ira nai vakatau-ni-were, ka vakatala tani wale.

¹¹ Sa qai tala tale ko koya e dua nai talatala tani: a ra sa yaviti koya talega, ka vakamaduataka, ka vakatala tani wale.

¹² A sa tala tale ko koya nai katolu; a ra sa vakamavoataki koya talega, ka vakasava yani.

¹³ Sa qai kaya nai taukei ni were-ni-vaini, A cava meʼu kitaka? au na tala na noqu gone ni toko: era na vakarokorokotaki koya beka ni ra sa raica.

¹⁴ Ia ni ra sa raica ko ira nai vakatau-ni-were, era sa veivosaki vakai ira, ka kaya, O koya o qo nai taukei emuri, tou vakamatea, me noda ga na vanua.

¹⁵ A ra sa biliga ki taudaku ni were-ni-vaini, ka vakamatea. A cava beka ena qai kitaka nai taukei ni were-ni-vaini vei ira?

¹⁶ Ena lako mai ka vakamatei ira nai vakatau-ni-were o qori, ka solia na were-ni-vaini vei ira e so tani. Ia ni ra sa rogoca, era sa kaya, Me kakua ga.

¹⁷ A sa vakaraici ira ko koya, ka kaya, A cava o qo sa volai, A vatu era sa cata na matai ni vale, sa yaco mei teteki c na tutu ni vale?

¹⁸ O koya yadua ena lutu e na vatu o qori, ena dasila kina; ia ko koya ena lutuka, ena vurumemea mo vaka na nuku.

¹⁹ A ra sa vakatovolea ko ira na bete levu kei ira na vu-ni-vola, me ra taura e na tiki-ni-siga ko ya, a ra sa rerevaki ira na tamata: ni ra sa kila ni sa vosataki ira ko koya c na vosa vakatautauvata ko ya.

²⁰ A ra sa via beitaka, ka tala na tamata e so me ra vereta, me ra vaka era sa yalododonu, me ra taura na nona vosa c so, me ra soli koya kina vua na turaga me lewai koya ka veitaliataki koya.

²¹ A ra sa tarogi koya, ka kaya, Vakavuvuli, keitou sa kila ni ko sa vosataka na ka e dodonu ka vakatavuvulitaka tiko, a sa sega e dua ko sa vinakata walega, ia ko sa vakatavuvulitaka vakaidina nai valavala sa vinaka vua na Kalou:

²² Sa tara meda solia na drawe vei Sisari, se segai?

²³ A sa kila na nodrai lawaki ko koya, ka kaya vei ira, Dou sa dauveretaki au e na vuku ni cava?

²⁴ vakatakila mai vei au e dua nai lavo: a mata i cei, kei na yaca i cei, sa volai tu kina? A ra sa vosa, ka kaya, A nei Sisari.

²⁵ A sa kaya vei ira ko koya, O koya mo dou qai solia vei Sisari na veika nei Sisari, vua talega na Kalou na veika sa nona na Kalou.

²⁶ A sa sega e dua na nona vosa era sa taura rawa e na matadra na tamata: a ra sa kidacala e na nona vosa, a ra sa vagagalu ga.

²⁷ Era sa qai lako mai e so nai tokani i Satoki, o ira era sa vakatitiqataka na tu cake tale mai na mate; a ra sa tarogi koya,

²⁸ ka kaya, Vakavuvuli, sa vola ko Mosese vei keda, Kevaka sa dua na tamata sa mate na tuakana so na tacina, ka vakawati, ia ka sega na luvena ni sa mate, me rau veiwatini kei na nona yada ko na tacina se tuakana, me vakaivakawa kina vua na tuakana se tacina.

²⁹ Ia ka tiko na mataveitacini eratou lewe vitu: a sa vakawati ko koya sa qase, a sa mate ka sega na luvena:

³⁰ erau sa qai veiwatini kei na yada nai karua, a sa mate ka sega na luvena:

³¹ erau sa qai veiwatini kaya nai katolu: ka vaka talega kina na lewe vitu; a ratou sa mate ka sega na luvedratou.

³² Sa qai mate talega emuri na yalewa.

³³ Ia e na tu cake tale, ena wati i cei ko koya o qo? ni ratou lewe vitu sa veiwatini kaya.

³⁴ A sa vosa ko Jisu, ka kaya vei ira, Era sa vakawati ka veimusumusukitaki mo ra vakawati na gone ni vuravura o qo;

³⁵ ia ko ira era wiliki me ra yaga me nodra na bula ko ya, kei na tu cake tale mai na mate, era sa sega ni vakawati, se veimusumusukitaki me ra vakawati:

³⁶ ni ra na sega ni mate rawa tale: ni ra sa tautauvata kei ira na agilose: a ra sa luve ni Kalou, ni ra sa luve ni tu cake tale mai.

³⁷ Ia ni na vakaturi cake tale ko ira na mate, sa tukuna ko Mosese mai na kau, ni sa vakatoka na Turaga, Na Kalou i Eparaama, kei na Kalou i Aisake, kei na Kalou i Jekope.

³⁸ Ni sa sega ni nodra Kalou na mate kokoya, a nodra ga era sa bula tiko; ni ra sa bula kecega vei koya.

³⁹ Sa qai vosa e so na vu-ni-vola, ka kaya, Vakavuvuli, ko sa vosa vinaka.

⁴⁰ A ra sa tawa doudou emuri me ra taroga e na dua na ka.

⁴¹ Sa qai tarogi ira ko koya, Sa kainaki vakaevei ni sa luve i Tavita na Karisito?

⁴² ia ka sa kaya ko Tavita e nai vola ni Veisere, Sa kaya ko Jiova vua na noqu Turaga, Mo tiko e na ligaqu i matau,

⁴³ meʼu kitaki ira mada na nomu meca mei tutuniyavamu.

⁴⁴ Ia ke sa vakatokai koya ko Tavita me Turaga, sa qai luvena vakaevei?

⁴⁵ Sa qai vosa ko koya vei iratou na nona tisaipeli, ni sa rogoca tiko ko ira kecega na tamata,

⁴⁶ Dou qarauni kemudou maivei ira na vu-ni-vola, era sa vinakata na lako voli e nai sulu balabalavu e so, ka sa vinakata na veikidavaki e na veirara ni veivoli, kei nai tikotiko ni qase e na veivale ni lotu, kei nai tikotiko vakaturaga e na veisolevu;

⁴⁷ era sa kovea na nodrai yau na yada, a ra sa masu balavu mo veivakaisini; o ira o qo era na cudruvi vakalevu cake.