Luke 18 - AI VOLA TABU

Sa vakavulici ira ko Jisu me ra daumasu, 1-8. Sa tukuni rau na Farisi kei koya sa kumuna nai vakacavacava, 9-14. Sa kaya me ra yalomalumalumu, 15-17. Sa vaka me via biuta na ka kecega ko ira sa via bula, 18-30. Sa tukuna na nona mate, 31-34; a sa vakabula na mataboko, 35-43.

¹ SA vakatakila talega ko koya vei ira e na dua na vosa vakatautauvata, ni sa dodonu me daumasu tiko ka kakua ni ceguoca;

² a sa kaya, Sa dua na koro sa tiko kina e dua na dauveilewai, sa sega ni rerevaka na Kalou, se vakarokoroko vei ira na tamata:

³ a sa dua na yada e na koro ko ya; a sa lako mai vei koya, ka kaya, Mo tara qaui sau vua na noqu meca.

⁴ A sa bese tiko mada ko koya; a sa qai kaya emuri e lomana, Au sa sega ni rerevaka na Kalou, se vakarokoroko vei ira na tamata;

⁵ ia e na vuku ga ni sa vakasosataki au na yada o qo, au na tara kenai sau mada, de vakaceguocataki au ko koya ni sa tawa mudu ni lako mai.

⁶ A sa kaya na Turaga, Dou rogoca na ka sa kaya na dauveilewai tawa dodonu:

⁷ ia ko na Kalou, ena sega li ni tara kedrai sau na nona digitaki, era dautagi tikoga vua e na siga kei na bogi, io, kevaka sa bera na nona saumi ira?

⁸ Au sa kaya vei kemudou, ni na tara kedrai sau vakusarawa ko koya. Ia ni na lako mai na Luve ni tamata, ena kunea beka na vakabauta e vuravura, se segai?

⁹ A sa cavuta na vosa vakatautauvata o qo me tukuni ira era sa vakararavi ni ra sa yalododonu, a ra sa beci ira na tamata tani:

¹⁰ E lewe rua na tamata, erau lako cake ki na vale ni soro me masu; e dua na Farisi, ka dua na daukumuna nai vakacavacava.

¹¹ Sa tu na Farisi ka masu vakai koya, vakaoqo, Kalou, au vakamolimoli vei iko, niʼu sa sega ni vakataki ira na tamata e so, era sa daukove, era sa daubutako lo, era sa dauyalewa, se vakataki koya o qo na kumuna nai vakacavacava.

¹² Au sa lolo vakarua e na veiwiki, au sa solia nai katini ni ka kecega au sa rawata.

¹³ A sa tu vakayawa ko koya na kumuna nai vakacavacava, a sa sega ni via ta cake na matana ki lomalagi, a sa tavia na lomaserena, ka kaya, Noqu Kalou, lomani au mai, koi au sa tamatai valavala ca.

¹⁴ Au sa kaya vei kemudou, Sa lako sobu ki na nona vale na tamata o qo a sa vakadonui, ia ko koya kadua sa segai: ni na vakamalumalumutaki ko koya yadua sa vakalevulevui koya; ia ko koya sa vakamalumalumutaki koya ena vakalevulevui.

¹⁵ A ra sa kauta talega vua na gone lalai, me tarai ira ko koya; ia ni sa raica ko ira na tisaipeli, era sa vunauci ira.

¹⁶ A sa kacivi ira mai na gone ko Jisu, ka kaya, Laivi ira na gone lalai me ra lako mai vei: au, ka kakua ni tarovi ira: ni sa vakataki ira ko na lewe ni matanitu ni Kalou.

¹⁷ Au sa kaya vakaidina vei kemudou, O koya ena sega ni vakabauta na matanitu ni Kalou me vaka na gone lailai, ena sega sara ni curu kina.

¹⁸ A sa tarogi koya e dua na turaga, ka kaya, Vakavuvuli vinaka, a cava meʼu kitaka meʼu rawata kina na bula tawa mudu?

¹⁹ A sa kaya vua ko Jisu, O sa vakatokai au meʼu vinaka e na vuku ni cava? sa sega e dua tani e vinaka, na Kalou duaduaga.

²⁰ O sa kila na vunau, Mo kakua ni ia na veibutakoci, Mo kakua ni laba, Mo kakua ni butako, Mo kakua ni veibeitaki vakailasu, Mo vakarokoroko vei rau na tamamu kei na tinamu.

²¹ Sa qai kaya ko koya, A ka kecega o qo kaʼu a vakabauta ni kaʼu a gone ka yacova na siga o qo.

²² Ia ni sa rogoca na veika o qo ko Jisu, sa kaya vua, E dua na ka sa sega vei iko: mo volitaka na ka kecega sa tu vei iko, ka solia vei ira sa dravudravua, o na vakaiyau mai lomalagi: ia mo lako mai, mo muri au.

²³ Ia ni sa rogoca o qo, sa rarawa sara na lomana: ni sa vutuniyau sara.

²⁴ Ia ni sa raica ko Jisu ni sa rarawa sara na lomana, sa kaya, E dredre sara vei ira sa vutuniyau me curu ki na matanitu ni Kalou!

²⁵ Ni sa rawarawa me curuma na mata ni cula na kameli, ia ka dredre vua na tamata vutuniyau me curu ki na matanitu ni Kalou.

²⁶ Ia ko ira era sa rogoca era sa kaya, O cei beka ena vakabulai rawa?

²⁷ A sa kaya ko koya, A ka sa dredre sara vei ira na tamata sa rawarawa vua na Kalou.

²⁸ Sa qai kaya ko Petero, Raica, keitou sa biuta na ka kece, ka muri iko.

²⁹ A sa kaya ko koya vei iratou, Au sa kaya vakaidina vei kemudou, Sa sega e dua sa biuta na vale, se tamana se tinana, se na tuakana se tacina, se watina, se na luvena, e na vuku ni matanitu ni Kalou,

³⁰ ena tawa rawata vakalevu cake e na bula o qo, ia e na gauna emuri na bula tawa mudu.

³¹ Sa qai kauti iratou mai na tinikarua, ka kaya vei iratou, Raica, edatou sa lako cake ki Jerusalemi, ia na ka kecega era sa vola na parofita e na Luve ni tamata ena vakayacori mai.

³² Ni na soli yani ko koya vei ira na matanitu tani, ena vakalialiai talega, ka vakaisini, ka kasiviti:

³³ era na vakanakuitataka talega, ka vakamatea; ena qai tu cake tale ko koya e nai katolu ni siga.

³⁴ A ratou sa sega ni kila e dua na ka o qo; ia na ka o qo sa vuni vei iratou, a ratou sa tawa kila na ka sa vosataki.

³⁵ A sa yaco ni sa torovi Jeriko ko koya, sa dua na tamata mataboko sa tiko e na tutu ni sala me kerekere:

³⁶ ia ni sa rogoca ni sa lewe vuqa era sa lako voli yani, sa taroga se cava na kenai balebale.

³⁷ A ra sa tukuna vua, ni sa lako voli yani ko Jisu na kai Nasareci.

³⁸ A sa kaci ko koya, ka kaya, Jisu, na Luve i Tavita, lomani au mai.

³⁹ A ra sa vunauca ko ira sa lako eliu, me tiko lo: a sa kaci vakalevu cake kina ko koya, Luve i Tavita, lomani au mai.

⁴⁰ Sa qai tu vakadua ko Jisu, ka kaya me kau mai ko koya vei koya; ia ni sa yaco voleka, sa taroga,

⁴¹ ka kaya, A cava ko sa vinakata meʼu cakava vei iko? A sa kaya, Turaga, meʼu rai rawa.

⁴² A sa kaya vua ko Jisu, Mo rai rawa ga sa vakabulai iko na nomu vakabauta.

⁴³ A sa rai rawa vakasauri ko koya, a sa muri koya, ka vakarokorokotaka tiko na Kalou; ia ko ira kecega na lewe vuqa, ni ra sa raica, era sa vakavinavinaka vua na Kalou.