Luke 16 - AI VOLA TABU

A vosa vakatautauvata ni talatala tawa dodonu, 1-13. Sa vunauci irana Farisi ko Jisu, 14-18. Sa tukuna na tamata vutuniyau kei Lasaro, 19-31.

¹ A SA kaya talega ko koya vei ira na nona tisaipeli, Sa dua na tamata vutuniyau, sa dua na nonai talatala; a sa beitaki vua ni sa vakayalia tiko na nonai yau.

² A sa kaciva ko koya, ka kaya vua, A cava o qo kaʼu sa rogoca vei iko? tukuna mai na nomu cakacaka vakaitalatala; ni sa dredre moi talatala tiko.

³ Sa qai veikayaka e lomana nai talatala, A cava meʼu kitaka? ni sa kauta tani vei au na noqu turaga na cakacaka vakaitalatala; au sa sega ni rawata na cuki were; au sa madua ni kerekere:

⁴ au sa qai kila na ka meʼu kitaka, me kauti au kina na tamata e so ki na nodra veivale, niʼu sa sivo mai na cakacaka vakaitalatala.

⁵ Sa qai kacivi ira kecega na tamata era sa tawa vakaivolitaka vua na nona turaga nai yau e so, a sa tarogi kova sa liu mai, E vica mada na ka ko sa tawa vakaivolitaka vua na noqu turaga?

⁶ A sa kaya ko koya, E dua na drau nai vakarau waiwai. A sa kaya vua, Taura na nomui vola, ka tiko sobu sara, ka vola me limasagavulu.

⁷ Sa qai taroga tale e dua, E vica na ka ko sa tawa vakaivolitaka? A sa kaya, E dua na drau nai vakarau sila. A sa kaya vua, Taura na nomui vola, ka vola me walusagavulu.

⁸ A sa doka nai talatala tawa dodonu ko na turaga, e na vuku ni sa valavala vakavuku; ni ra sa vuku vakalevu na gone ni vuravura e na ka e vakai ira, a ra sa vuku vakalailai ga na gone ni rarama.

⁹ Ia kaʼu sa kaya vei kemudou, Cakava e so me wekamudou e nai yau e tawa dina; me ra na kauti kemudou kina ki na veitikotiko e tawa oti rawa, ni dou na mate.

¹⁰ O koya sa dina e na ka lailai, ena dina e na ka levu talega; ia ko koya sa tawa dodonu e na ka lailai, ena tawa dodonu e na ka levu talega.

¹¹ Ia kevaka dou a tawa dina e nai yau sa tawa dodonu, o cei ena vakararavi vei kemudou e na kena sa dina?

¹² Ia kevaka dou sa tawa dina e nai yau sa nona na tamata tani, o cei ena solia vei kemudou me nomudou?

¹³ Sa sega e dua na tamata sa qarava rawa na turaga e lewe rua; ni na cata e dua, ka lomani koya kadua: se na kabita e dua, ka beci koya kadua. Dou sa sega ni qarava rawa na Kalou kei nai yau.

¹⁴ Ia ko ira talega na Farisi, era sa daukocokoco, ni ra sa rogoca na ka kecega o qo, era sa vakalialiai koya.

¹⁵ A sa kaya vei ira ko koya, Oi kemudou dou sa vakadonui kemudou e matadra na tamata; ia ka sa kila na lomamudou na Kalou: ni sa ca sara e na mata ni Kalou na ka e vinaka sara e matadra na tamata.

¹⁶ Era sa yacova na gauna i Joni na vunau kei ira na parofita: mai na gauna ko ya sa vunautaki na matanitu ni Kalou, a sa curu vakaukauwa ko ira na tamata kecega.

¹⁷ Ia ka sa rawarawa me takali laivi ko lomalagi kei vuravura, ka dredre me lutu wale e dua na tikina lailai sara ni vunau.

¹⁸ O koya yadua sa biuta na watina, ka laʼki vakawati kei na dua tani, sa dauyalewa; ia ko koya yadua erau veiwatini kaya sa biuta ko na watina, sa dauyalewa.

¹⁹ A sa dua na tamata vutuniyau, sa vakaisulu e nai sulu damudamu kei na malo matailalai, a sa daumarau vakalevu e na veisiga kecega:

²⁰ a sa dua na tamata dravudravua, ko Lasaro na yacana, sa vakadavori e na mata ni nona vale, sa robo na yagona e na vidikoso,

²¹ a sa garova me vakani e ua meme ni kakana sa lutu mai nai kanakana ni tamata vutuniyau: a ra sa lako talega mai na koli me dramica na nona vidikoso.

²² Ia sa mate ko koya sa dravudravua, era sa qai kauti koya ko ira na agilose ki na lomasere i Eparaama. Sa mate ko koya talega sa vutuniyau, a sa bulu;

²³ a sa ta cake na matana mai etesi, ni sa vakararawataki tu, a sa raici Eparaama vakayawa, kei Lasaro e lomaserena.

²⁴ A sa kaci, ka kaya, Tamaqu Eparaama, lomani au mai, ka talai Lasaro, me tonisua na vuso ni nonai qaqalo e na wai, me mai vakabatabatataka na yamequ; niʼu sa vakararawataki e na yameyame-ni-buka o qo.

²⁵ A sa kaya ko Eparaama, Na luvequ, nanuma ni ko a rawata na nomu veika vinaka ni ko a bula tiko, e vaka talega kina ko Lasaro na veika ca; ia edaidai sa qai vakacegui ko koya, ia ko iko, ko sa vakararawataki:

²⁶ o qo talega, sa viritu e na keda maliwa e dua na buca titobu sara: ia ko ira sa via lako tani eke vei kemudou, era sa sega ni rawata; ia ko ira sa tiko maikeri, era sa sega ni lako mai vei keitou.

²⁷ Sa qai kaya ko koya, Au masuti iko kina, tamaqu, mo talai koya ki na vale i tamaqu:

²⁸ ni sa lewe lima ko iratou na veitacini; me laki vakasalataki iratou, de ratou lako talega mai ki na tikina rarawa o qo.

²⁹ Sa kaya vua ko Eparaama, Sa tu ga vei iratou ko Mosese kei ira na parofita; me ratou rogoci ira.

³⁰ A sa kaya ko koya, E segai, tamaqu Eparaama; ia kevaka e dua vei ira na mate sa lako vei iratou, eratou na qai veivutuni.

³¹ Sa qai kaya vua ko koya, Kevaka era sa sega ni rogoci Mosese kei ira na parofita, era na sega ni vakarogoca, kevaka sa tu cake e dua mai na mate.