Luke 15 - AI VOLA TABU

A vosa vakatautauvata e na sipi sa yali ka kune tale, 1-7; kei na tiki ni siliva sa yali ka qai kune tale, 8-10; kei na gone sa biuti tamana ka qai lesu tale mai, 11-32.

¹ SA qai toro voleka mai vei koya ko ira kecega na kumuna nai vakacavacava, kei ira na tamatai valavala ca, me ra rogoca.

² A sa vosakudrukudru ko ira na Farisi kei ira na vu-ni-vola, ka kaya, Ko koya o qo sa veitau kei ira na tamata ca, ka kana vata kei ira.

³ A sa tukuna vei ira ko koya na vosa vakatautauvata o qo, ka kaya,

⁴ O cei vei kemudou na tamata, sa dua na drau na nona sipi, kevaka sa vakayalia e dua vei ira, ena sega beka ni biuta laivi tu na ciwasagavulu ka ciwa e na veico, ka laʼki vakasaqarai koya sa yali, me kunea mada?

⁵ Ia ni sa kunea, sa viribale ki domona, ka reki.

⁶ Ia ni sa yaco ki vale, sa kacivi ira vata na wekana kei na lewe ni koro, ka kaya vei ira, Tou mai reki vata, niʼu sa kunea na noqu sipi ka yali.

⁷ Au sa kaya vei kemudou, ni na levu vakakina na reki mai lomalagi e na vuku ni tamatai valavala ca e le dua bauga sa qai veivutuni, ia ka lailai ga e na vukudra na tamata yalododonu e ciwasagavulu ka ciwa, sa sega ni yaga vei ira na veivutuni.

⁸ Se ko cei na yalewa sa tini na nona tiki ni siliva, kevaka sa vakayalia e dua na tikina, sa sega beka ni vakacaudreva na cina, ka taviraka na vale, ka vakasaqara matua, me kunea mada?

⁹ Ia ni sa kunea, sa kacivi ira vata na wekana kei na lewe ni koro, ka kaya, Tou mai reki vata, niʼu sa kunea na tikina kaʼu a vakayalia.

¹⁰ Au sa kaya vei kemudou, Sa tubu vakakina na reki e na matadra na agilose ni Kalou, e na vuku ni tamatai valavala ca e le dua bauga sa qai veivutuni.

¹¹ Sa kaya tale ko koya, E dua na tamata sa lewe rua na luvena-tagane:

¹² a sa kaya vei tamana ko koya sa gone vei rau, Tamaqu, solia mai vei au nai votavota ni yau sa vota me noqu. A sa vota vei rau nai yau.

¹³ A sa tawa vuqa na bogi sa muri, sa soqona vata na ka kecega ko na luvena sa gone, ka lako tani ki na dua na vanua vakayawa, ka sa vakayalia kina na nonai yau e nai valavala sa vinakata.

¹⁴ Ia ni sa vakaotia kece, sa qai tubu na dausiga levu e na vanua ko ya; a sa qai dravudravua mai ko koya.

¹⁵ A sa laʼki tiko kei na dua na lewe ni vanua ko ya; a sa talai koya ki na nona veiwere me vakani ira na vuaka.

¹⁶ A sa garova na qana era daukania na vuaka, me mamau kina na ketena; a sa sega e dua sa vakani koya.

¹⁷ Ia ni sa kila yalona tale, sa kaya, Sa vuqa na tamata i tamaqu sa voli na nodra cakacaka, era sa mamau e na madrai ka vo tu yani, ia koi au kaʼu sa mate e na viakana!

¹⁸ au na ia, ka lako vei tamaqu, kaʼu na kaya vua, Tamaqu, au a valavala ca ki lomalagi, e na matamu talega,

¹⁹ kaʼu sa sega kina ni yaga meʼu vakatokai tale me luvemu: qisi au meʼu vakataka e dua na nomu tamata sa voli na nona cakacaka.

²⁰ A sa ia, ka lako vei tamana. Ia ni sa yawa sara, sa raici koya ko tamana, a sa lomana, ka cici, ka bale ki domona, ka reguca.

²¹ A sa kaya na gone vei koya, Tamaqu, au a valavala ca ki lomalagi, e na matamu talega, kaʼu sa sega kina ni yaga meʼu vakatokai tale me luvemu.

²² A sa kaya na tamana vei ira na nona tamata, Dou kauta mai nai sulu vinaka sara, ka vakasulumi koya; tokara talega e dua na mama ki na ligana, kei nai vava ki na yavana;

²³ ia dou kauta mai na luve ni karavau sa uro, ka vakamatea; ka me datou kana, ka marau;

²⁴ ni ka mate na luvequ o qo, a sa qai bula tale; a sa yali, a sa qai kune tale. A ra sa vakatekivu me ra marau.

²⁵ A sa tiko e na veiwere ko na luvena ka qase vei rau; ia ni sa tale mai ka toro kabi ki vale, sa rogoca na bitu-ni-vakatagi kei na meke.

²⁶ A sa kaciva e dua vei ira na tamata, ka taroga se cava beka na veika o qo.

²⁷ A sa kaya vua ko koya, Sa lako tale mai na tacimu; a sa vakamatea ko tamamu na luve ni karavau sa uro, e na vuku ni rau sa veikidavaki tale kaya ka sa bula vinaka.

²⁸ A sa cudru ko koya, ka bese ni curu; sa qai lako mai kina ki tautuba ko tamana, ka vakamasuta.

²⁹ Sa qai vosa ko koya, ka kaya vei tamana, Raica, e vuqa na yabaki o qo kaʼu sa qaravi iko kina, ia kaʼu sa sega sara ni talaidredre ki na nomu vosa: ia ko sa sega sara ni solia vei au e dua na luve ni koti, me keitou marau vata kina kei ira na wekaqu:

³⁰ ia ni sa lako mai na luvemu o qo, o koya sa Otiva na nomui yau kei ira na yalewa dautagane, o sa vakamatea me kena na luve ni karavau sa uro.

³¹ A sa kaya vua ko koya, Luvequ, edaru sa tiko vata vakadua, ia na ka kecega sa tu vei au sa nomu.

³² A sa dodonu ga me da reki, ka marau; ni ka mate na tacimu o qo, a sa qai bula tale; a sa yali, a sa qai kune tale.