Luke 14 - AI VOLA TABU

Sa vakabula e dua sa tauvi-mate ko Jisu, a sa vakarota na yate malumalumu; a sa tukuna ni sa vaka e dua na magiti levu na lotu, 1-24. E vinaka me yalomatua ko ira na tisaipeli i Jisu, 25-33: me ra vakatovolea talega me ra yaga, 34, 35.

¹ A SA yaco, ni sa lako tu ko koya ki na nona vale e dua sa turaga vei ira na Farisi me kana e na dua na siga ni vakacecegu, era sa vakaraici koya.

² Ka raica, sa tu e matana e dua na tamata sa tauva na buketevatu.

³ A sa vosa ko Jisu, ka kaya vei ira na vu-ni-vunau kei ira na Farisi, ka vaka, E tara me ia na veivakabulai e na siga ni vakacecegu, se segai?

⁴ A ra sa vagagalu ga. A sa tauri koya ko koya, ka vakabula, ka vakatala yani me lako;

⁵ a sa vosa vei ira, ka kaya, O cei vei kemudou, kevaka e lutu ki na dua na davuke na nona asa se nona karavau, ena sega ni laveta cake vakasauri e na siga ni vakacecegu?

⁶ A ra sa sega ni vosa rawa tale vua e na veika o qo.

⁷ A sa tukuna e dua na vosa vakatautauvata vei ira era sureti, ni sa raici ira ni ra sa digitaka na veitikotiko vakaturaga; a sa kaya vei ira,

⁸ Ni sa sureti iko e dua ki na solevu ni vakawati, kakua ni tiko sobu e nai tikotiko vakaturaga: de uasivi cake vei iko e dua sa sureti mai;

⁹ ena qai lako mai ko koya sa sureti kemudrau, ka kaya vei iko, Solia na tikina vei koya o qo; o na qai madua ni ko laʼki tiko e na tikina era sara.

¹⁰ Ia ni ko sa sureti, lako ka tiko sobu e na tikina era sara; me kaya vei iko ko koya sa sureti iko, ni sa lako mai, Na wekaqu, lako mada ki cake: o na qai vakarokorokotaki e na matadra era sa tiko vata kei iko me kana.

¹¹ Ia ko koya yadua sa vakalevulevui koya, ena vakamalumalumutaki; ia ko koya yadua sa vakamalumalumutaki koya, ena vakalevulevui.

¹² Sa kaya talega ko koya vua sa sureti koya, Ni ko sa cakava na magiti ni vakasigalevu sei vakayakavi, kakua ni sureti ira na wekamu dina, se na tuakamu se tacimu, se na kai nomu, se na nomu lewe ni koro e vutuniyau; de ra sureti iko tale, o na qai saumi.

¹³ Ia ni ko sa cakava na magiti, sureti ira na dravudravua, na lokiloki, na gera, na mataboko:

¹⁴ o na qai kalougata kina: ni ra sa sega ni sauma rawa vei iko: ni ko na saumi ni ra na tu cake tale mai ko ira na yalododonu.

¹⁵ Ia ni sa rogoca na veika o qo e dua vei ira sa tiko kaya me kana, sa kaya vua, Sa kalougata ko koya ena kana e na matanitu ni Kalou.

¹⁶ Sa qai kaya vua ko koya, Sa dua na tamata sa cakava e dua na magiti levu ni vakayakavi, a ra sa lewe vuqa sa sureta ko koya:

¹⁷ ia ni sa yaco na tiki-ni-siga me ia kina nai vakayakavi, sa tala na nona tamata me kaya vei ira era sureti, Dou lako mai; ni sa vakarau tu na ka kecega.

¹⁸ Ia ko ira yadua era lomavata me ra dui vakadre-dreti ira. Sa kaya e dua vei koya, Au sa volia e dua na tiki ni vanua, a sa dodonu meʼu lako ka raica; au masuti iko kina, mo laivi au meʼu kakua ni lako yani.

¹⁹ A sa kaya e dua tani, Au sa volia e tini na karavau, ia kaʼu sa lako me vakatovolei ira: au masuti iko kina, mo laivi au meʼu kakua ni lako yani.

²⁰ A sa kaya e dua tale, Au sa qai vakawati, o koya kaʼu sa sega kina ni lako rawa.

²¹ Sa qai lako mai na tamata ko ya, ka tukuna vua na nona turaga na veika o qo. Sa qai cudru nai taukei ni vale, a sa kaya vua na nona tamata, Lako vakasauri ki tuba ki na veisalatu kei na veisa-qata ni koro, ka kauti ira mai na dravudravua, kei na gera, kei na lokiloki, kei na mataboko.

²² A sa mai kaya na tamata, Turaga, sa caka ga me vaka na nomu vosa, ia ka sa lalaga ga.

²³ A sa kaya na turaga vua na tamata, Lako ki na veisalatu, kei na veisala sa viribaiti, ka vakasaurarataki ira me ra lako mai, me oso na noqu vale:

²⁴ niʼu sa kaya vei kemudou, Sa sega e dua vei ira na tamata sa sureti ena tovolea na noqui vakayakavi.

²⁵ A sa lewe vuqa sara era sa lako vata kaya: a sa vuki ko koya, ka kaya vei ira,

²⁶ Kevaka e dua sa lako mai vei au, ka sega ni cata na tamana, kei tinana, kei na watina, kei ira na luvena, kei ira na tuakana kei tacina, kei ira na ganena, kei na nona bula talega, ena sega ni yaco rawa me noqu tisaipeli.

²⁷ Ia ko koya talega ena tawa colata na nona kauveilatai, ka muri au, sa sega ni yaco rawa me noqu tisaipeli.

²⁸ Ia ko cei vei kemudou, kevaka sa via tara vale, e sega ni tiko sobu mada eliu, me wilika na kenai voli, se tu vua nai yau me vakaotia se segai?

²⁹ de viria ga ko koya na kena yavu, ka sega ni rawata me vakaotia, era na qai vakalialiai koya ko ira kecega era sa raica,

³⁰ ka kaya, A tamata o qo sa vakatekivu me tara vale, ia ka sega ni rawata me vakaotia.

³¹ Se ko cei na tui, sa lako me rau veivala kaya e dua tale na tui, ka sega ni tiko sobu mada eliu, ka vakananuma, se rawata me veivala kaya sa ruasagavulu na udolu na nona na meca, a sa tini na udolu na nona, se segai?

³² se, ni sa yawa sara ko koya o qori, sa tala ko koya na tamata, me vakamasuta me rau veisorosorovi.

³³ Sa vakakina, o koya yadua vei kemudou sa sega ni biuta na nona ka kecega, sa sega ni yaco rawa me noqu tisaipeli.

³⁴ A ka vinaka na masima: ia kevaka sa seavu mai na masima na kena tuituina, ena vakatuituinataki e na cava?

³⁵ Sa qai sega ni yaga e na veiwere, se ki nai binibini de-ni-manumanu; sa biu ga ki tautuba. O koya sa vakadaligana me rogoca, me mani rogoca sara.