Luke 13 - AI VOLA TABU

Sa vunautaka na veivutuni ko Jisu, 1-5. Sa tukuna na lolo sa tawa vua, 6-9. Sa vakabula e dua na yalewa, 10-17. Sa i tukuna na sore ni musita kei na leveni talega, 18-21. Sa vakarota vei ira na nona tamata me ra gumatua; a sa vunauci Eroti, kei Jerusalemi, 23-35.

¹ IA sa tadu e na gauna ko ya e so era sa tukuni ira na kai Kalili vua, ni sa veiwakitaka vata ko Pilato na kedra dra kei na nodra veisoro.

² A sa vosa ko Jisu, ka kaya vei ira, Dou sa vakasama beka ni ra sa uasivi vei ira kecega na kai Kalili e nai valavala ca ko ira o qori na kai Kalili, e na vuku ni sa yaco vei ira na veika vakaoqo?

³ Au sa kaya vei kemudou, E segai; ia kevaka dou sa sega ni veivutuni, dou na rusa kece talega vakakina.

⁴ Se ko ira na tinikawalu, sa baleti ira na vale cecere mai Seiloami, ka vakamatei ira, dou sa vakasama beka ni ra sa uasivi e na cala vei ira; kecega na tamata era sa tiko mai Jerusalemi?

⁵ Au sa kaya vei kemudou, E segai; ia kevaka dou sa sega ni veivutuni, dou na rusa kece talega vakakina.

⁶ Sa tukuna talega ko koya na vosa vakatautauvata o qo: Sa dua na tamata sa dua na nona lolo sa tei e na nona were-ni-vaini; a sa lako mai me vakasaqara kina na vuana, ka sega ni kunea.

⁷ Sa qai kaya ko koya vua nai vakatau-ni-vaini, Raica, sa qai yabaki tolu kaʼu sa lako mai ka vakasaqara na vuana e na lolo o qo, ka sega ni kunea: taya sobu; sa vakacacana walega na vanua e na vuku ni cava?

⁸ Sa qai vosa ko koya, ka kaya vua, Turaga, laiva mada ga me tei kena yabaki talega o qo, meʼu cukiraka vakavolivolita mada, ka biu kina na de-ni-manumanu;

⁹ ia de qai vua; ia kevaka e sega, o na qai mai taya sobu.

¹⁰ A sa vakavuvuli tiko ko koya o na dua na vale ni lotu e na siga ni vakacecegu:

¹¹ Ka raica, sa dua na yalewa sa curumi koya e dua na yalo sa malumalumu kina ka yabaki tinikawalu, a sa vakalairoro tikoga, ka sega sara ni tu cake rawa.

¹² Ia ni sa raici koya ko Jisu, sa kaciva, ka kaya vua, Yalewa, o sa sereki mai na nomu malumalumu.

¹³ A sa tabaka e na ligana; a sa vakatudonutaki vakasauri kina, a sa vakarokorokotaka na Kalou.

¹⁴ Sa qai vosa vakacudrucudruya ko na turaga ni vale ni lotu, ni sa ia na veivakabulai ko Jisu e na siga ni vakacecegu, a sa kaya vei ira na tamata, E ono na siga e dodonu me ia kina na cakacaka: o qori dou lako mai kina mo dou vakabulai, ia me kakua ga e na siga ni vakacecegu.

¹⁵ A sa vosa na Turaga vei koya, ka kaya, Na dauveivakaisini, dou sa sega li ni dui sereka, oi kemudou yadua, na nona karavau kei na nona asa e na siga ni vakacecegu mai na nona tikina, ka kauta me vagunuva?

¹⁶ ia na yalewa o qo, sa dua na luve i Eparaama, sa vesuka ko Satani, raica, e tinikawalu na kena yabaki, sa sega beka ni dodonu me sereki mai nai vesu o qo e na siga ni vakacecegu?

¹⁷ Ia ni sa kaya oti ko koya na veika o qo, era sa madua kecega na nona meca, a ra sa reki kece na lewe vuqa e na vuku ni ka vakaidina kecega sa kitaka ko koya.

¹⁸ Sa qai kaya ko koya, Ena vakatauvatani beka kei na cava na matanitu ni Kalou? se cava meʼu vakatauvatana kina?

¹⁹ Sa tautauvata kei na dua na sore ni musita, sa kauta e dua na tamata, ka biuta ki na nona were; a sa tubu cake, ka sa yaco me kau levu; a ra sa mai ro e na tabana na manumanu ni lagi.

²⁰ A sa kaya tale ko koya, Meʼu vakatauvatana kei na cava na matanitu ni Kalou?

²¹ Sa tautauvata kei na leveni, sa kauta e dua na yalewa ka vunia e loma ni madrai droka e tolu nai vakarau, ka malua me vakalevenitaki kecega mada.

²² A sa lako voli ko koya e na veikoro kei na Veikoro lalai, ka vakavuvuli tiko kina, ka lako tu vaka ki Jerusalemi.

²³ Sa qai kaya e dua vei koya, Turaga, era sa lewe lailai beka ga ena bula? A sa kaya vei ira ko koya,

²⁴ Dou gumatua sara me curu ki na matamata-ni-koro qiqo; niʼu sa kaya vei kemudou, era lewe vuqa ena vakatovolea me curuma, a ra na sega ni rawata:

²⁵ ni na tu cake nai taukei ni vale, ka sogolatia na katuba, ia dou sa vakatekivu me tu etautuba, ka tukituki ki na katuba, ka kaya, Turaga, Turaga, dolavi keimami: ena qai vosa ko koya, ka kaya vei kemudou, Au sa sega ni kila se dou lako maivei.

²⁶ Dou na qai vakatekivu me kaya, Keimami a kana ka gunu e matamu, o sa dauvakatavuvuli talega e na veisalatu ni neimami koro.

²⁷ Ena qai kaya ko koya, Au sa kaya vei kemudou, Au sa sega ni kila se dou lako maivei; dou lako tani vei au, oi kemudou kecega sa daukitaka nai valavala ca.

²⁸ Dou na qai dautagi ka katia na batimudou, ni dou na raici Eparaama, kei Aisake, kei Jekope, kei ira kecega na parofita, e na matanitu ni Kalou, ia koi kemudou dou sa vakasavi ki tautuba.

²⁹ Ia era na lako mai cake, mai ra talega, mai na mata ni tokalau talega, kei na mata ni ceva, a ra na tiko sobu e na matanitu ni Kalou.

³⁰ Ka raica, e so sa muri era na qai liu; e so talega era sa liu era na qai muri.

³¹ E na siga ko ya sa lako mai e so na Farisi, ka kaya vua, Mo lako ki taudaku, ka lako tani yani eke; ni sa via vakamatei iko ko Eroti.

³² A sa kaya vei ira ko koya, Dou laʼki tukuna vua na fokise ko ya, Raica, au sa vakasavi ira na tevoro, ka ia na veivakabulai edaidai kei na sabogibogi, au na qai oti ga e nai katolu ni siga.

³³ Ia sa kilikili ga meʼu na lako voli edaidai, kei na sabogibogi, kei na siga ena muri mai: ni sa dredre me dua na partifita me mate e na koro tani, mai Jerusalemi ga.

³⁴ I Jerusalemi, i Jerusalemi, o iko sa vakamatei ira na parofita, ka viriki ira e na vatu era sa talai vei iko: e vuqa na siga kaʼu a via vakasoqoni ira vata na luvemu, me vakai ira na luvena na toa yalewa e ruku ni tabana, ia dou sa sega ni vinakata!

³⁵ Raica, sa qai biu tu vei kemudou na nomudou vale ka sa laladidi: ia kaʼu sa kava vakaidina vei kemudou, Dou na sega ni raici au tale, ka malua me yaco mada na siga dou na kaya kina, Sa kalougata ko koya sa lako mai e na yaca ni Turaga.