Luke 12 - AI VOLA TABU

Sa vakavulici iratou na nona tisaipeli ko Jisu, 1-48. Sa tukuna ni na tubu na veicati e na vukuna, 49-53. Sa vakavulici ira na lewe vuqa me ra yalomatua ka veilomani, 54-59.

¹ E NA gauna ko ya, ni ra sa lewe vuqa sara na tamata sa soqoni vata mai, sa sega ni wili rawa, a ra sa veibutuqaqi ga, sa vakatekivu ko koya me kaya mada eliu vei iratou na nona tisaipeli, Dou qarauni kemudou mai na nodra leveni na Farisi, a ya na dauveivakaisini.

² Ia sa sega na ka sa vuni, me kakua ni vakarairaitaki; se tabogo, me kakua ni kilai.

³ Ia na ka dou sa tukuna e na butobuto ena rogo votu; ia na ka dou sa tukuna e na daliga e na veitikina vuni, ena tukuni mai e na dela ni vale.

⁴ Ia kaʼu sa kaya vei kemudou sa wekaqu, Dou kakua ni rerevaki ira era sa vakamatea na yago ga, ia emuri sa sega tale na ka era cakava rawa.

⁵ Ia kaʼu na tukuna vei kemudou se ko cei mo dou rerevaka: Dou rerevaki koya, ni sa vakamatea oti, sa rawata talega me biuta ki eli; io, au sa kaya vei kemudou, Dou rerevaki koya.

⁶ Sa sega li ni volitaki na manumanu lalai e lima e nai lavo lalai sara e rua? ia ka sega e dua vei iratou sa guilecavi e na mata ni Kalou.

⁷ Ia ka sa wiliki kecega na drau ni ulumudou. O koya o qo mo dou kakua ni rere: dou sa uasivi cake vei ira na manumanu e vuqa.

⁸ Au sa kaya talega vei kemudou, O koya yadua ena vakatusai au e na matadra na tamata, ena vakatusai koya talega na Luve ni tamata e na matadra na agilose ni Kalou;

⁹ ia ko koya ena cakitaki au e na matadra na tamata, ena cakitaki e na matadra na agilose ni Kalou.

¹⁰ Ia ko koya yadua ena vosavakacacataka na Luve ni tamata, ena rawa me kakua ni cudruvi kina; ia ko koya ena vosavakacacataka na Yalo Tabu, ena sega sara ni rawa me kakua ni cudruvi.

¹¹ Ia ni dou sa kau ki na veivale ni lotu, vei ira na dauveilewai kei ira na turaga, dou kakua ni lomaocaoca, se vakaevei mo dou kaya, se cava mo dou tukuna:

¹² ni na vakavulici kemudou na Yalo Tabu e na tiki-ni-siga ko ya e na ka e dodonu mo dou kaya.

¹³ A sa dua vei ira na lewe vuqa sa vosa mai vei koya, Vakavuvuli, kaya mada vua na tuakaqu me keirau veivota kaya nai yau ni tama i keirau.

¹⁴ A sa kaya vua ko koya, Tamata, o cei sa lesi au meʼu turaga ni lewa se dauveivota vei kemudou?

¹⁵ Sa kaya talega vei ira ko koya, Dou raici kemudou, ka karoni kemudou mai na daukocokoco; ni sa sega ni kalougata na tamata e na vuku ni sa levu na ka sa tu vua.

¹⁶ A sa tukuna ko koya e dua na vosa vakatautauvata vei ira, ka kaya, Sa dua na tamata vutuniyau sa vakalewe vinaka sara na nona vanua:

¹⁷ a sa qai nanuma e lomana, ka kaya, A cava meʼu kitaka, ni sa sega na noqu yasana me bini kina na noqu lewe ni veiwere?

¹⁸ Sa qai kaya, O qo ga kaʼu na kitaka; au na basuka na noqu lololo, ka tara tale e so e lelevu; au na qai binia kecega kina na noqu lewe ni veiwere kei na noqui yau:

¹⁹ au na qai kaya ki na yaloqu, Yaloqu, sa levu na nomui yau sa bini tu ena rauta na yabaki e vuqa; mo vakacegu mada, mo kana, mo gunu, mo marau tiko.

²⁰ Ia ka sa kaya na Kalou vei koya, Na lialia! e na bogi ga o qo ena tarogi tale vei iko na yalomu; ena qai nei cei na veika ko sa vakarautaka?

²¹ Sa vakakina ko koya sa daubinia nai yau me nona, a sa sega ni vutuniyau e na ka ni Kalou.

²² Sa qai kaya ko koya vei iratou na nona tisaipeli, O koya o qo kaʼu sa kaya kina vei kemudou, Mo dou kakua ni lomaocaoca e na vuku ni nomudou bula, e na ka mo dou kania; se na vuku ni yagomudou, e na ka mo dou vakaisulu kina.

²³ Sa ka levu na bula, a ka lailai na kakana; ia sa ka levu na yago, a ka lailai nai sulu.

²⁴ Dou vakananuma na reveni: era sa sega ni kaburaka, se tamusuka; sa sega na nodra vale ni yau se nodra lololo; a sa vakani ira na Kalou: sa dina ni dou sa yaga vakalevu cake vei ira na manumanu.

²⁵ Ia ko cei vei kemudou ni sa lomaocaoca sa rawata me vakuria vakalailai ga na siga ni nona bula?

²⁶ Ia kevaka dou sa sega ni cakava rawa na ka o qo e lailai walega, dou sa lomaocaoca e na ka sa vo e na vuku ni cava?

²⁷ Dou vakananuma na viavia, era sa tubu vakaevei: era sa sega ni daucakacaka, se dautali; ia kaʼu sa kaya vei kemudou, O Solomoni e na nonai ukuuku kecega sa sega ni vakaisulu me vaka e dua vei ira o qo.

²⁸ Ia kevaka sa vakasuluma vakaoqo ko na Kalou na co sa tu edaidai e na veiwere, a sa biu ki na lovo e na sabogibogi: ena sega li ni ia vakalevu cake vei kemudou, oi kemudou sa vakabauta vakalailai?

²⁹ Ia dou kakua ni dauvakasaqara na ka mo dou kania, se na ka mo dou gunuva: me kakua talega ni yavala na lomamudou.

³⁰ Ni sa dauvakasaqara na ka kecega o qo ko ira na lewe ni veivanua kecega e vuravura; a sa kila na Tamamudou ni sa yaga vei kemudou na veika o qo.

³¹ Ia mo dou dauvakasaqara ga na matanitu ni Kalou: ia ena soli mei kuri vei kemudou na ka kecega o qo.

³² Kakua ni rere, na qele-ni-sipi lailai; ni sa vinakata sara na Tamamudou me solia vei kemudou na matanitu.

³³ Dou volitaka na ka sa tu vei kemudou, ka solia nai loloma; vakarautaka vei kemudou na taga-ni-lavo ena sega ni madra, ai yau mai lomalagi ena sega ni oti rawa, sa sega na daubutako sa torova, se na sarasara sa kania.

³⁴ Ni na tiko na yalomudou e na yasana sa tiko kina na nomudoui yau.

³⁵ Me vauci tikoga na tolomudou; me caudre talega na veicina;

³⁶ ia mo dou vaka na tamata era waraka na nodra turaga, me na lako tale mai na solevu ni vakawati; me ra dolavi koya vakasauri sara, ni sa lako mai ka tukituki ko koya.

³⁷ Sa kalougata ko ira na tamata o qori, o ira ena kunea ko na turaga ni ra sa vakatawa, ni sa lako mai ko koya: au sa kaya vakaidina vei kemudou, ena vauca na nona wa ni sulu, ka kaya me ra tiko sobu, ka na lako mai ko koya ka qaravi ira.

³⁸ Ia kevaka ena lako mai ko koya e nai karua ni tiki-ni-bogi e vakatawai, se na lako mai e na tikina e tolu, ka kunea ni sa vakakina, era sa kalougata na tamata o qori.

³⁹ Ia dou kila ga o qo, kevaka e kila nai taukei ni vale na tiki-ni-bogi e lako mai kina na daubutako, sa vakatawa ga, ka sega ni biuta na nona vale me ravabasuki.

⁴⁰ Ia dou vakararau tu vakakina koi kemudou talega: ni sa lako mai na Luve ni tamata e na tiki-ni-siga dou sa sega ni nanuma kina.

⁴¹ Sa qai kaya vua ko Petero, Turaga, o sa tukuna beka na vosa vakatautauvata o qo vei keitou ga, se vei ira kecega?

⁴² A sa kaya na Turaga, O cei nai talatala yalododonu ka vuku, ena lesia ko na turaga me lewai ira na nona lewe-ni-vale, me solia na kedrai votavota e na gauna dodonu?

⁴³ Sa kalougata na tamata ko ya, o koya ena kunea ko na nona turaga ni sa kitaka vakakina, ni sa lako mai ko koya.

⁴⁴ Au sa kaya vakaidina vei kemudou, Ena lesi koya me lewa na nona ka kecega.

⁴⁵ Ia kevaka ena kaya e lomana na tamata ko ya, Sa vakaberaberataka na nona lako tale mai na noqu turaga: a sa vakatekivu kina me yaviti ira na lewe-ni-vale na tagane kei na vada, me daukana talega ka daugunu, ka daumateni:

⁴⁶ ena lako mai na turaga ni tamata ko ya e na siga sa sega ni namaka kina, kei na tiki-ni-siga e sega ni kila kina; ena qai varomusuka rua, ka vota vua me rai votavota vata kei ira na tawa vakabauta.

⁴⁷ Ia nai talatala ko ya, sa kila na loma ni nona turaga, ka sega ni vakarau, se cakava me vaka na lomana, ena yaviti vakalevu.

⁴⁸ Ia ko koya sa tawa kila, ka kitaka na ka e dodonu me yaviti kina; ena yaviti vakalailai ga. Ni na tarogi vakalevu mai vua sa soli vakalevu vua; ia ena taroga vakalevu ko ira na tamata mai vua era sa solia vakalevu vua.

⁴⁹ Au sa lako mai me biuta na buka waqa ki vuravura; ia ka cava tale meʼu gadreva, kevaka sa vakacaudretaki tu?

⁵⁰ Ia ka sa dua na noqu papitaiso meʼu papitaisotaki kina; a sa rarawa vakalevu na lomaqu me oti mada o qo!

⁵¹ Dou sa vakasama beka niʼu sa lako mai me solia na veivinakati ki vuravura? au sa kaya vei kemudou, E segai; a veisei ga:

⁵² ni sa vakatekivu vata kei na gauna o qo mo na lewe lima e na dua na vale eratou na veimecaki, na lewe tolu kei rau na lewe rua, na lewe rua talega kei iratou na lewe tolu.

⁵³ Era na veimecaki na veitamani-tagane; kei na veitinani-yalewa; kei na veivugoni-yalewa.

⁵⁴ A sa kaya talega vei ira na lewe vuqa, Ni dou sa raica ni sa tubu mai ra na o, dou sa kaya sara, Sa dua na uca sa lako mai: a sa vakakina.

⁵⁵ Ia ni sa liwa na ceva, dou sa kaya, Ena buno mai: a sa yaco.

⁵⁶ Na dauveivakaisini dou sa kila rawa na mata i vuravura kei lagi: ia ka vakaevei ni dou sa sega ni kila na gauna o qo?

⁵⁷ Ia ka vakaevei ni dou sa sega ni lewa vakai kemudou na ka e dodonu?

⁵⁸ Ni drau sa lako vata kaya sa beitaki iko ki na dauveilewai, mo gumatua e na gau-ni-sala me oti na nona bei, de yarataki iko vua na dauveilewai, ka soli iko na dauveilewai vua nai talatala, ka biuti iko nai talatala ki na vale ni veivesu.

⁵⁹ Au sa kaya vei iko, O na sega sara ni lako tani tale maikina, o na sauma kece mada nai lavo.