Luke 1 - AI VOLA TABU

A WASE I. —Sa bolea ko Luke me vola nai tukutuku kei Jisu, 1-4. Sa tukuna ko na agilose ni rau na kunekune na tina i Joni na dauveipapitaiso, kei na gonealewa sa tina i Jisu, 5-38. Sa lako ko Meri vei Ilisapeci, ka vakarokorokotaka na Turaga, 39-56. Sa sucu ko Joni, 57-66. Sa tukuni Jisu kei Joni talega ko Sakaria, 67-79.

¹ E NA vuku ni sa lewe vuqa era sa bolea me ra vakarautaka nai tukutuku ni veika sa vakadinati deivaki sara vei keda,

² me vaka na ka era sa tukuna vei keda, ko ira era sa raica e na matadra ka sa qarava na vosa, mai nai vakatekivu;

³ sa vinaka vei au talega, niʼu a vakatarotaroga matua sara na ka kecega mai nai vakatekivu, meʼu vei-vakadutaitaka e nai vola vei iko, Ciofilo vakaturaga sara,

⁴ mo kila kina na kena dina ni veika ko sa vakatavulici kina.

⁵ E NA gauna sa tui Jutia kina ko Eroti, sa dua na bete ko Sakaria na yacana, e na matabete i Epaia: a sa watina e dua vei ira na luve i Eroni, o Ilisapeci na yacana.

⁶ A rau sa dodonu ruarua e na mata ni Kalou, erau sa muria kecega na vunau kei nai vakaro ni Turaga, ka tawa cala.

⁷ A sa sega na luvedrau, ni sa yava ko Ilisapeci, a rau sa qase ruarua mai.

⁸ A sa yaco, ni sa ia tiko ko koya na cakacaka vakabete e na mata ni Kalou, e na vuku ni nona matabete,

⁹ me vaka nai valavala ni cakacaka vakabete, sa nonai tavi me vakacaudreva na ka boi vinaka, ni sa curu ki na vale-ni-soro ni Turaga.

¹⁰ Ia ko ira kecega e lewe vuqa na tamata, era sa tu etautuba ka masu ni sa caudre tiko na ka boi vinaka.

¹¹ A sa rairai vua e dua na agilose ni Turaga, sa tu e na kenai matau ni cabocabo ni ka boi vinaka.

¹² Ia ni sa raica ko Sakaria, sa kidroa, a sa lutu na rere vei koya.

¹³ A sa kaya na agilose vei koya, Kakua ni rere, Sakaria; ni sa rogoci na nomu masu; ka na vakasucuma e dua na luvemu-tagane ko Ilisapeci na watimu, ia ko na vakatoka na yacana ko Joni.

¹⁴ Ia ko na reki ka marau kina; ena lewe vuqa talega era na reki e na vuku ni nona sucu.

¹⁵ Ni na levu ko koya e na mata ni Turaga, ka na sega ni gunu waini se na yaqona kaukauwa; ena vakasinaiti talega e na Yalo Tabu, mai na kete i tinana.

¹⁶ Ia ka lewe vuqa vei ira na luve i Isireli ena saumaka mai ko koya ki na Turaga na nodra Kalou.

¹⁷ Ia ena liutaki koya e na yalo i Ilija kei na nona kaukauwa, me saumaka na lomadra na qase vei ira na gone, kei ira era talaidredre ki na nodra vuku era yalododonu; me vakarautaka na tamata e so me ra qai nona na Turaga.

¹⁸ A sa kaya vua na agilose ko Sakaria, A cava meʼu kila kina na ka o qo? niʼu sa qase, a sa vuqa na yabaki ni watiqu.

¹⁹ A sa vosa na agilose, ka kaya vua, Oi au ko Kepirieli, au sa dautu e na mata ni Kalou; ia kaʼu sa talai mai meʼu vosa vei iko, ka tukuna vei iko nai tukutuku vinaka o qo:

²⁰ ka raica, ko na galu mai, ka ko na sega ni vosa rawa, me yaco mada na siga ena vakayacori kina na veika o qo, e na vuku ni ko sa sega ni vakadinata na noqu vosa, a ya ena vakayacori ga e na kena gauna.

²¹ A ra sa waraki Sakaria ko ira na tamata, a ra sa kidacala ni sa dede ko koya e na vale ni soro.

²² Ia ni sa lako mai ki tautuba ko koya, sa sega ni vosa rawa vei ira: a ra sa qai kila ni ka raica ko koya e dua na raivotu e na vale ni soro; ia sa de-guvacu vei ira ko koya, ka galu tikoga.

²³ A sa yaco, ni sa oti na veisiga ni nona cakacaka, sa lako tani yani ki na nona vale.

²⁴ A sa oti na veisiga ko ya, sa qai kunekune na watina ko Ilisapeci, a sa vuni koya ka vula lima, ka kaya,

²⁵ Sa cakacaka vakaoqo vei au na Turaga e na siga sa nakita kina ko koya, me kauta tani na ka kaʼu a rogo ca kina vei ira na tamata.

²⁶ Ia, e nai kaono ni vula sa talai na agilose ko Kepirieli mai na Kalou, ki na dua na koro mai Kalili, a yacana ko Nasareci,

²⁷ vua e dua na gonealewa sa musu vua na tamata na yacana ko Josefa, e na mataqali i Tavita; ia na yaca ni gonealewa ko Meri.

²⁸ A sa lako mai na agilose vei koya, ka kaya, Sa loloma, o iko sa daulomani! me tiko vei iko na Turaga; o sa kalougata vakalevu vei ira na yalewa tani.

²⁹ Ia ni sa raica ko koya [na gonealewa], sa kidroa e na nona vosa, a sa vakanananu e lomana se vakaevei nai valavala ni veikidavaki vakaoqo.

³⁰ A sa kaya na agilose vei koya, Kakua ni rere, Meri: ni ko sa kune loloma vua na Kalou:

³¹ ka raica, o na kunekune e ketemu, o na vakasucuma talega e dua na gonetagane; ia mo vakatoka na yacana ko JISU.

³² Ena levu ko koya, ka na vakatokai na Luve i Koya sa cecere sara; ia na Turaga na Kalou ena solia vua nai tikotiko vakaturaga nei tamana ko Tavita:

³³ ia ena lewa ko koya na mataqali i Jekope ka tawa mudu; ena sega talega ni oti na nona matanitu.

³⁴ Sa qai kaya ko Meri vua na agilose, Ena yaco vakaevei beka na ka o qo, niʼu sa sega ni veikilaki kaya e dua na tagane?

³⁵ A sa vosa na agilose, ka kaya vua, Ena lako sobu mai vei iko na Yalo Tabu, ena vakarurugi iko talega na kaukauwa i Koya sa cecere sara: o koya o qo ena vakatokai kina na ka tabu ena sucu mai, me Luve ni Kalou.

³⁶ Ka raica, na dauvemu ko Ilisapeci, sa kunekunetaki talega e dua na gonetagane, ni sa qase; a sa kenai kaono o qo ni nona vula, o koya ka vakatokai e yava.

³⁷ Ni na sega ni dredre vua na Kalou e dua na ka.

³⁸ Sa qai kaya ko Meri, Raica na vada ni Turaga; me yaco ga vei au me vaka na nomu vosa. A sa lako tani na agilose maivei koya.

³⁹ A sa ia ko Meri e na gauna ko ya, ka lako vakusarawa ki na vanua vakaulu-ni-vanua, ki na dua na koro ni Jutia;

⁴⁰ a sa curu ki na vale i Sakaria, a sa veikidavaki kei Ilisapeci.

⁴¹ A sa yaco, ni sa rogoca ko Ilisapeci na vosa ni veikidavaki nei Meri, sa rika e ketena na gone, a sa vakasinaiti ko Ilisapeci e na Yalo Tabu:

⁴² a sa tabalaka cake na domona ko koya, ka kaya, O sa kalougata vakalevu vei ira na yalewa tani, a sa kalougata na vua ni ketemu.

⁴³ A sa vakaevei na ka o qo vei au, ni sa lako mai vei au na tinana na noqu Turaga?

⁴⁴ Ka raica, ni sa rorogo e na daligaqu na vosa ni nomu veikidavaki, sa rika e na reki na gone e na ketequ.

⁴⁵ A sa kalougata ko koya sa vakadinata; ni na vakayacori na ka sa tukuni vua maivei koya na Turaga.

⁴⁶ A sa kaya ko Meri, Sa vakamalua vua na Turaga na yaloqu,

⁴⁷ a sa reki na yaloqu vua na Kalou na noqui Vakabula.

⁴⁸ Ni sa lomana na nona vada ni sa dravudravua: ka raica, mai na gauna o qo ena kaya nai tabatamata kecega niʼu sa kalougata.

⁴⁹ Ni sa cakava na ka levu e so vei au ko Koya sa qaqa; ia sa dokai na yacana.

⁵⁰ A sa tu na nona loloma vei ira sa rerevaki koya, ka yacova nai tabatamata e vuqa.

⁵¹ Sa kaukauwa na cakacaka ni ligana; sa dui vakasesei ira na qaciqacia ko koya e na vuku ni nanuma ni yalodra.

⁵² Sa vakasivoi ira sobu na kaukauwa mai na veitikotiko, a sa vakatikori ira kicake era kaisi.

⁵³ Sa vakamamautaki ira era sa viakana e na veika vinaka; a sa vakatalai ira tani era vutuniyau a ra sa lala tu.

⁵⁴ Sa vukei ira na nona tamata na Isireli, ni sa vakananuma na loloma;

⁵⁵ me vaka na nona vosa vei ira na noda qase, vei Eparaama, kei na nona kawa ka tawa mudu.

⁵⁶ A sa tiko vata kaya ko Meri ka tolu beka na vula, a sa qai lesu ki na nona vale.

⁵⁷ A sa yaco na siga i Ilisapeci me vakasucu kina; a sa vakasucuma ko koya e dua na gonetagane.

⁵⁸ A ra sa rogoca ko ira sa tiko voleka vua, kei ira na dauvena, ni sa lomani koya vakalevu na Turaga; a ra sa reki vata kaya.

⁵⁹ A sa yaco ni ra sa lako mai me ciliva na gone, ni sa walu na nona siga; a ra sa vakayacani koya ko Sakaria, me vaka na yaca i tamana.

⁶⁰ A sa vosa na tinana, ka kaya, Me kakua; ena yacana ga ko Joni.

⁶¹ A ra sa kaya vua, Sa sega na wekamu sa vakayacani e na yaca o qo.

⁶² A ra sa de-guvacu vei tamana, se cava e vinakata ko koya me yacana.

⁶³ A sa vaka ko koya me dua na papa ni volavola, a sa vola, ka kaya, A yacana ko Joni. A ra sa kidacala kecega.

⁶⁴ A sa sereki sara na gusuna kei na yamena, a sa vosa mai, ka vakarokorokotaka na Kalou.

⁶⁵ A sa yaco na rere vei ira kecega era tiko vakavolivoliti ira; a sa tukuni yani na vosa kecega o qo e na vanua taucoko sa vakaulu-ni-vanua mai Jutia.

⁶⁶ Ara sa tura e lomadra ko ira kece era rogoca, a ra sa kaya, Ena vakaevei beka nai valavala ni gone o qo! A sa tiko vata kaya na liga ni Turaga.

⁶⁷ A sa vakasinaiti e na Yalo Tabu ko Sakaria na tamana, a sa parofisai mai, ka kaya,

⁶⁸ Me vakarokorokotaki na Turaga na Kalou nei Isireli; ni sa lako mai vei ira na nona tamata ka vakabulai ira,

⁶⁹ a sa vakatubura vei keda e dua na veivakabulai sa vaka na kaukamea, e na mataqali i Tavita na nona tamata; (

⁷⁰ me vaka na ka sa tukuna ko koya e na gusudra na nona parofita tabu, era sa bula eliu sara:)

⁷¹ na veivakabulai mai na noda meca, mai na ligadra kece talega era sa cati keda:

⁷² me vakayacora na yalololoma vei ira na noda qase, me nanuma talega na nona veiyalayalati tabu;

⁷³ a vosa bubului sa bubului kina ko koya vei Eparaama na tamada,

⁷⁴ me solia mai vei keda, me da vakabulai mai na ligadra na noda meca, ka qaravi koya ka tawa rere,

⁷⁵ e na yalosavasava kei na caka dodonu e matana, e na veisiga kecega ni noda bula.

⁷⁶ Ia ko iko na gone, ko na vakatokai na parofita i Koya sa cecere sara: ni ko na liu e na mata ni Turaga me caramaka na nona veisala:

⁷⁷ me vakatakila vei ira na nona tamata na ka me ra bula kina, ni sa bokoci na nodrai valavala ca,

⁷⁸ e na vuku ni nona loloma levu na noda Kalou, sa kida mai kina vei keda na rarama maicake,

⁷⁹ me vakararamataki ira era sa tiko e na butobuto kei na yaloyalo ni mate, me tubera na yavada ki na sala ni veivinakati.

⁸⁰ A sa tubu cake na gone, a sa kaukauwa mai na yalona, a sa tiko e loma ni veikau me yaco mada na nona siga me vakaraitaki kina vei ira na Isireli.