Kolosa 4 - AI VOLA TABU

Sa vakavulici ira na tamata me ra daumasu, ka me ra valavala vakavuku vei ira era sa tawa lotu, 2-6. Sa qai ia na loloma vei ira, ka sa tinia nai vola, 7-18.

¹ OI kemudou na turaga, dou solia vei ira na tamata na ka e dodonu ka tautauvata; ni dou sa kila sa nomudou talega e dua na Turaga mai lomalagi.

² MO dou daumasu tikoga, ka cikevaka tiko ka vakavinavinaka;

³ ka masulaki keitou talega, me dolava vei keitou ko na Kalou na katuba ni vosa, me keitou tukuna na ka vuni kei Karisito, a ya kaʼu sa vesuki tu kina:

⁴ meʼu vakaraitaka o qo, me vaka sa kilikili kei au me tukuna.

⁵ Dou ia tiko nai valavala vuku vei ira etaudaku, ka volia me nomudou na gauna.

⁶ Me ia tikoga na nomudou vosa e na yalovinaka, ka veiwakitaki e na vuku, mo dou kila kina se cava sa dodonu mo dou vosa tale kina vei ira na tamata yadua.

⁷ Ena tukuna vei kemudou na noqu ka kecega ko Tikiko, a wekaqu kaʼu sa lomana, kei nai talatala yalodina, kei na noqui tokani, e na Turaga:

⁸ ia kaʼu sa talai koya vei kemudou e na vuku ni ka o qo, me kila na nomudou veika, ka me vakalecataka na yalomudou;

⁹ oi rau kei Onisimo, na wekaqu sa yalodina kaʼu sa lomana, o koya sa dua vei kemudou. Erau na vakatakila vei kemudou na ka kecega eke.

¹⁰ Sa loloma yani vei kemudou ko Arisitariko keirau sa vesuki vata kaya, kei Marika na luve ni gane i Parinapa, (o koya dou sa vakaroti oti kina: kevaka sa lako vei kemudou, dou vakacegui koya;)

¹¹ kei Jisu, a yacana talega ko Jusito, eratou sa cili. O iratou ga o qo eratou sa daucakacaka vata kei au e na ka ni matanitu ni Kalou, a ratou sa dauvakacegui au.

¹² Sa loloma yani vei kemudou ko Epafira, sa dua vei kemudou, ai talatala i Karisito, sa daugumatua tikoga ni sa masulaki kemudou, mo dou tu dei ka vinaka sara ka vakasinaiti tu e na ka kece sa veitaliataka na Kalou.

¹³ Niʼu sa vakadinadina vua, ni sa lomakatakata sara e na vukumudou, e na vukudra talega mai Leotisea, kei na vukudra mai Aiirapoli.

¹⁴ Sa loloma yani vei kemudou ko Luke, na vu-ni-wai lomani, kei Tima.

¹⁵ Me cavu mada na loloma vei ira na veiwekani mai Leotisea, vua talega ko Nimifa, vei ira talega nai vavakoso lewe ni soro mai nona vale.

¹⁶ Ia ni sa wili oti nai vola o qo e na kemudou maliwa, dou kitaka me wiliki talega e na kedra maliwa nai vavakoso lewe ni soro mai Leotisea; mo dou wilika talega o qori mai Leotisea.

¹⁷ Kaya talega vei Arikipo, Mo vakaraica na cakacaka o sa rawata mai vua na Turaga, mo kitaka sara.

¹⁸ Au sa ia yani na loloma e na ligaqu dina, koi au ko Paula. Dou nanuma na noqui vesu. Me nomudou na loloma. Emeni.