Kolosa 2 - AI VOLA TABU

Sa vakarota vui ira ko koya me ra tu dei vei Karisito, a sa vakasalataki ira e na vuku ni vuku vakavuravura, kei nai tukuni; kei na masuti ira na agilose, kei na ka ni lotu makawa sai vakatakarakara kei Karisito, 1-23.

¹ NIʼU sa vinakata mo dou kila na levu ni noqu lomaocaoca e na vukumudou, kei na vukudra mai Leotisea, kei na vukudra kecega era a sega ni raica na mataqu vakayago;

² me vakacegui na yalodra, me ra vakata vata e na loloma, me nodra nai yau kecega ni vuku era na vakadinadinataka kina, me ra kila sara na ka vuni ni Kalou ko Tamada, a ya sa nei Karisito talega:

³ o koya sa bini tu vua nai yau kecega ni vuku kei na yalomatua.

⁴ Ia na ka o qo kaʼu sa kaya, de dua e temaki kemudou e na vosa veicavilaki.

⁵ Ia e dina ya niʼu sa tiko tani Vakayago, ia kaʼu sa tiko vakayalo ga vei kemudou, au sa reki ka raici kemudou ni dou sa doloni yadua, ka tu dei e na vakabauti Karisito.

⁶ Ia e na vuku ni dou a vakabauti Karisito Jisu na Turaga, mo dou ia tiko nai valavala e vinaka vua:

⁷ dou vakawaka ka tara cake vua, ka vakataudeitaki e na vakabauta, me vaka ni dou a vakatavulici, mo dou uasivi cake kina ka vakavinavinaka.

⁸ Dou raica vinaka de dua sa vakacacani kemudou e na vuku vakavuravura sa tawa yaga ka lasu talega, e vaka nai tukuni vakatamata, e vaka nai vakavuvuli vakavuravura, ka sa sega ni vaka nai vakavuvuli i Karisito.

⁹ Ni sa tiko e na yagona na ka kecega sa sinai kina na Kalou.

¹⁰ Ia dou sa vutu ni ka kecega vei koya; a sa liutaki ira kecega era sa liu kei ira sa kaukauwa ko koya:

¹¹ ia dou sa cilivi talega vua e na veicili sa tawa caka e na liga, ni dou sa luvata nai valavala ca ni yago e na veicili sa caka e na vuku i Karisito,

¹² ni dou a bulu vata kaya e na papitaiso; a ya talega dou sa tu cake tale kaya kina ni dou sa vakabauta na kaukauwa ni Kalou, o koya sa vakaturi koya cake tale mai na mate.

¹³ Ia koi kemudou, ni dou a mate tu e nai valavala ca, e na vuku talega ni yagomudou sa tawa cili, sa qai vakabulai kemudou vata kaya ko koya, ni sa tawa cudruvi kemudou e na vuku ni valavala ca e dua;

¹⁴ ni sa qusia nai vola liga ni veivakaro sa beitaki keda, sa noda meca lako, a sa kauta tani sara, ni sa vakota ki na kauveilatai;

¹⁵ ia ni sa vakacacani ira sa liu kei ira sa kaukauwa, sa vakasesevotuni ira, ni sa rawai ira sara e na ka o qo.

¹⁶ O koya o qo me kakua ni lewai kemudou kina e dua e na vuku ni kakana, se na ka-ni-gunu, se na siga ni solevu, se na vula vou, se na veisiga tabu:

¹⁷ o qori ga nai vakatakarakara ni veika me yaco mai emuri; ia sa nei Karisito na yago.

¹⁸ Me kakua ni tarovi kemudou e dua mai na nomudoui sau, ni sa viavia yalomalumalumu ka daumasu vei ira na agilose, ni sa rita na veika sa sega ni raica ko koya, a sa qaciqacia e na vuku ni yalona vakalewe,

¹⁹ a sa sega ni taura matua na Uluda, o koya sa dautokoni kina na yago taucoko, a sa veikabiti vata, e na vuku ni veisema kei na veiwa, a sa tubu e na tubu ni Kalou.

²⁰ Ia kevaka dou sa mate vata kei Karisito mai nai vakavuvuli vakavuravura, a cava dou sa muria kina na veivakaro me vaka dou sa bula vakavuravura tiko,—

²¹ Kakua ni tara; kakua ni tovolea; kakua ni qumia;—

²² o qori kecega ena oti, ni sa ia tiko; ni ra sa vaka na vunau kei nai vakavuvuli ni tamata?

²³ Ia e dina ya ni sa rairai me vuku na veika o qo, e na viavia masu kei na yalomalumalumu, kei na tawa nanuma na yago; ka sega ni ia na vakarokoroko, me vakamamautaki kina na yago.