Kolosa 1 - AI VOLA TABU

A WASE I. —Sa vakavinavinaka e na vukudra ko Paula, a sa vakadinadinataka nai vakavuvuli kei Karisito, a sa masulaki ira, a sa qai tukuni Jisu kei na nodra bula e na vukuna, 1-29.

¹ O PAULA, nai apositolo i Jisu Karisito e na veitalia ni Kalou, o Timoci talega na taciqu,

² vei ira era sa lotu ka veiwekani dina, era sa tu vata kei Karisito, era sa tiko mai Kolosa: Me nomudou na loloma, kei na vakacegu, mai vua na Kalou ko Tamada kei na Turaga ko Jisu Karisito.

³ Keirau sa vakavinavinaka vua na Kalou na Tama i Jisu Karisito na noda Turaga, ka masulaki kemudou e na veisiga,

⁴ ni keirau a rogoca na nomudou vakabauti Karisito Jisu, kei na nomudou loloma vei ira kecega era sa lotu,

⁵ e na vuku ni ka dou sa vakanuinuitaka, a ya sa maroroi mai lomalagi me nomudou, ia dou a rogoca kina e na vosa dina ni tukutuku-vinaka,

⁶ sa yaco vei kemudou, me vaka talega ki vuravura taucoko; a sa vuataka na vuana, me vaka talega kina vei kemudou, a sa vakatekivu vata kei na siga dou a rogoca kina, ka kila dina na loloma ni Kalou:

⁷ me vaka talega ni dou a kila maivei Epafira, a neiraui tokani daulomani, ia nai talatala yalodina i Karisito vei kemudou:

⁸ o koya talega sa tukuna vei keirau na nomudou loloma e na Yalo.

⁹ E na vuku ni ka o qo koi keirau talega, sa vakatekivu vata kei na siga keirau a rogoca kina, keirau sa tawa mudu kina ni masulaki kemudou, ka masu mo dou vakasinaiti e na kila na nona veitalia, e na yalomatua kei na vuku vakayalo kecega;

¹⁰ mo dou ia nai valavala e kilikili kei ira sa nona na Turaga, me vinakata kecega ko koya, mo dou vua e na cakacaka vinaka kecega, me tubu cake talega na nomudou kila na Kalou;

¹¹ mo dou kaukauwa mai e na kaukauwa kecega, me vaka na nona kaukauwa vakaidina, me tubu na vosota kecega kei na vosota vakadede e na marau;

¹² mo dou vakavinavinaka vua na Tamada, o koya sa vakarautaki keda me da rawata na kedrai votavota era sa yalosavasava, e na rarama:

¹³ o koya sa vakabulai keda mai na lewa ni butobuto, a sa kauti keda ki na nona matanitu na nona Gone ni toko:

¹⁴ vei koya eda sa rawata kina na bula e na vuku ni nona dra, ni sa bokoci nai valavala ca:

¹⁵ a yaloyalo ni Kalou tawa rairai ko koya, ka vakasikavi eliu ka qai muri na ka kecega ka caka:

¹⁶ ni sa cakava na ka kecega ko koya, se ra tu mai lomalagi, se ra tu e vuravura, se ra rairai se ra tawa rairai, se ra veitikotiko vakaturaga, se ra veimatanitu, se ra turaga sa liu, se ra turaga kaukauwa; sa cakava na ka kecega ko koya, me nona talega;

¹⁷ a sa bula eliu ko koya sa muri na ka kecega, a sa vakataudeitaka na ka kecega ko koya.

¹⁸ 0 koya na ulu talega ni yago, a ya nai vavakoso lewe ni soro: o koya nai vakatekivu, na ulumatua mai na mate; me uasivi cake kina ko koya e na ka kecega.

¹⁹ Ni sa vinakati me sinai ko koya e na ka kecega;

²⁰ ka me vakaveivinakatitaki ira kaya na ka kecega e na vukuna, ni sa ia mada na ka ni veivinakati e na nona dra ni sa lauvako ki na kauveilatai; io, e na vukuna ga, se ra tu e vuravura se ra tu mai lomalagi.

²¹ Oi kemudou talega, dou a kai tani eliu ka meca e na vu ni yalomudou e na cakacaka ca, sa qai vakaveivinakatitaki kemudou ko koya,

²² e na yagona vakalewe ni sa mate, me vakarairaitaki kemudou kina ni dou sa yalosavasava ka tawa beitaki rawa ka tawa vunauci rawa e matana:

²³ kevaka dou sa vakabauta tikoga ka vakataudeitaki ka vakaukauwataki, ka tawa vukici tani mai nai nuinui ni tukutuku-vinaka, a ya dou a rogoca, a ya ka vunautaki vei ira na tamata kecega sa tu e na ruku i lomalagi; ia koi au ko Paula au sa qisi me kenai talatala.

²⁴ Au sa qai marau niʼu sa vakararawataki e na vukumudou, ka vakayacora e na yagoqu na kena vo ni rarawa e na vuku i Karisito, e na vuku ni yagona, ko ya nai vavakoso lewe ni soro:

²⁵ au sa qisi kina meʼu kenai talatala, me vaka nai lesilesi ni Kalou, au sa lesi kina e na vukumudou, me vakayacora na vosa ni Kalou;

²⁶ na ka vuni ka vunitaki maivei ira nai tabatamata e na gauna eliu, a sa qai vakaraitaki mai vei ira na nona tamata yalosavasava:

²⁷ ni sa vinakata ko na Kalou me vakatakila vei ira na kena vakaidina kei na kena talei ni ka vuni o qo e na kedra maliwa na veimatanitu; o qori ko Karisito e na lomamudou, na vu ni vakanuinuitaka na kalougata:

²⁸ o koya keitou sa vunautaka, ni keitou sa vunauca tiko na tamata yadua, ka vakavulica na tamata yadua e na vuku kecega; me keitou vakaraitaka kina na tamata yadua, me tawa cala ni sa tu vei Karisito Jisu:

²⁹ o qo na ka kaʼu sa daucakacaka talega kina, ka gumatua me vaka na nona cakacaka sa kitaka vakaukauwa e na lomaqu.