Kalatia 1 - AI VOLA TABU

A WASE I. —Sa tukuna ko Paula ni sa kidacala ni ra sa biuta nai tukutuku-vinaka sa tukuni oti vei ira, 1-10. Sa qai tukuna na nonai valavala ni sa sega ni vakabauti Jisu, kei na ka sa qai kitaka ni sa vakabauta, 11-24.

¹ O PAULA nai apositolo, (e sega maivei ira na tamata, se e nai lesilesi vakatamata, a ya ga e nai lesilesi i Jisu Karisito, kei na Kalou ko Tamana, o koya ka vakaturi koya cake mai na mate;)

² kei ira cega na mataveiwekani sa tiko vei au, kivei ira na veivavakoso lewe ni soro mai Kalatia:

³ Me nomudou na loloma kei na vakacegu mai vua na Kalou ko Tamada, kei na noda Turaga ko Jisu Karisito,

⁴ o koya ka soli koya e na vuku ni nodai valavala ca, me vakabulai keda kina mai na gauna ca sa tu o qo, me vaka na nona veitalia na Kalou ko Tamada:

⁵ me nona na vakarokoroko ka tawa mudu. Emeni.

⁶ Au sa kidacala ni dou sa vuki tani vakasauri vakaoqo ki na dua tani nai tukutuku-vinaka, mo dou biuti koya ka kacivi kemudou e na loloma i Karisito:

⁷ ia ka sa sega ni dua tani dina; ia ka sa so era sa vakararawataki kemudou, ka via vakatanitaka nai tukutuku-vinaka kei Karisito.

⁸ Ia kevaka koi keitou, se dua na agilose mai lomalagi, sa vunautaka vei kemudou e dua tani nai tukutuku-vinaka sa sega ni vaka o qori keitou a vunautaka vei kemudou, me rusa ko koya.

⁹ Me vaka na ka keitou a kaya eliu, au sa qai kaya tale vakakina, Kevaka e dua na tamata sa vunautaka vei kemudou e dua tani nai tukutuku-vinaka sa sega ni vaka na ka dou sa vakabauta, me rusa ko koya.

¹⁰ Io, au sa qai vakavinavinakataki cei, ko na tamata, se na Kalou? seʼu vakasaqara beka me ra vinakati au ko ira na tamata? io, kevaka sa ka tiko me vinakati au ko ira na tamata, au na sega bagi ni talatala nei Karisito.

¹¹ Ia kaʼu sa vakatakila vei kemudou, na veiwekani, ni sa sega ni ka vakatamata nai tukutuku-vinaka kaʼu a vunautaka:

¹² niʼu a sega ni rawata mai vua e dua na tamata koi au, seʼu vakatavulici kina, a ya ga e nai vakavuvuli e na raivotu nei Jisu Karisito.

¹³ Ni dou a rogoca na noqui valavala eliu e na lotu vaka-Jiu, niʼu a vakacacana vakalevu sara nai vavakoso lewe ni soro ni Kalou, ka vaqeavutaka:

¹⁴ ia kaʼu sa mai uasivi cake e na lotu vaka-Jiu vei ira na lewe vuqa na kai noqu era taba vata kei au, niʼu sa gumatua vakalevu sara tiko e na nodrai tukuni na noqu qase.

¹⁵ Ia ni sa vinaka vua na Kalou, o koya sa lesi au, mai na kete i tinaqu, ka qai kacivi au e na nona loloma walega,

¹⁶ me vakatakila na Luvena ki na lomaqu, meʼu vunautaki koya kina vei ira na veimatanitu; au sa qai sega ni bose kei ira na tamata,

¹⁷ se lako cake ki Jerusalemi vei iratou eratou sai apositolo taumada vei au; ia kaʼu sa lako kusarawa ki Arepea, ka lesu tale ki Tamasiko.

¹⁸ Ia ni sa oti na yabaki e tolu, au sa qai lako cake ki Jerusalemi me keirau veikilai kei Petero, ka keirau a tiko vata ka bogi tinikalima:

¹⁹ ia kaʼu sa tawa raica e dua tani tale vei iratou nai apositolo, o Jemesi ga na tacina na Turaga.

²⁰ Ia na ka kaʼu sa qai vola vei kemudou, raica, e na mata ni Kalou, au sa sega ni lasu.

²¹ Emuri, au sa qai lako ki na veiyasana i Siria kei Silisia;

²² a ra sa sega ni kila na mataqu ko ira na veivavakoso lewe ni soro mai Jutia era sa tu vata kei Karisito:

²³ ka ra sa daurogoca ga, Ni sa qai vunautaka ko koya na vakabauta ka vaqeavutaka eliu, o koya ka vakacacani keda eliu.

²⁴ A ra sa vakarokorokotaka na Kalou e na vukuqu.