Josua 7 - AI VOLA TABU

Sa kilai na kocokoco i Akani, a sa cudruvi ko koya.

¹ IA ka ra sa vakacataka na tabu ko ira na luve i Isireli e na ka sa lesi me vakarusai: ni sa tara e so na ka sa lesi me vakarusai ko Akani, na luve i Karimi, na luve i Sapiti, na luve i Sera, e na yavusa i Juta: a sa waqa mai na cudru i Jiova vei ira na luve i Isireli.

² A sa tala na tamata e so ko Josua mai Jeriko ki Ai, o qori sa voleka ki Peci-aveni, mai na tu i cake ki Peceli, a sa vosa vei ira, ka kaya, Dou lako cake, ka rai vanua. A ra lako cake na tamata ka yamata ki Ai.

³ A ra lesu vei Josua, ka kaya vua, Me kakua ni lako cake na tamata kecega; me rua beka ga na udolu na tamata, se tolu na udolu, me lako cake ka samuti Ai; me kakua ni oca na tamata kecega ni ra lako kina, ni sa lewe lailai ga ko ira o qori.

⁴ A sa lako cake kina e tolu beka na udolu na tamata maivei ira na tamata: a ra drotaki ira na kai Ai.

⁵ A sa mokuta e lewe tolusagavulu ka ono beka vei ira ko ira na kai Ai: ka vakasavi ira mai na matamata-ni-koro, ka yaco ki Siparimi, ka ra mokuti ira e nai sobusobu: a sa malumalumu na yalodra na tamata, a ra sa waicala.

⁶ A sa dresuka na nonai sulu ko Josua, ka bale vakatobocu ki na qele e na mata ni kato i Jiova, ka yakavi mai, o koya kei ira na qase ni Isireli, ka viria na kuvu ni qele ki na buradeladra.

⁷ A sa kaya ko Josua, Ule. Turaga, Jiova, e na vuku ni cava ko sa kauti ira kina na tamata o qo ki na tai o qo ni Joritani, me soli keimami ki na ligadra na luve i Amori, me keimami vakarusai kina? ia kevaka keimami a lasa e na tai kadua ni Joritani ka tiko kina, ke sa vinaka!

⁸ Oi, Turaga, a cava meʼu kaya ni ra sa vakanadaku mai na Isireli vei ira na nodra meca?

⁹ Ia era na rogoca na kai Kenani kei ira kece sa tiko e na vanua o qo, a ra mai vakavolivolita keimami, ka vakaotia na yaca i keimami e vuravura, ia ka cava ko na cakava e na vuku ni yacamu levu?

¹⁰ A sa kaya vei Josua ko Jiova, Tu cake; a cava ko sa bale vakatobocu kina vakaoqo?

¹¹ Sa kitaka oti nai valavala ca ko ira na Isireli, a sa vakacataka na noqu veiyalayalati kaʼu a cakava vei ira mei vakaro: ia era sa tara e so na ka sa lesi me vakarusai, a ra sa butakoca, ka lasu talega, ka viria vata talega kei na nodra yau.

¹² Ia era tawa tu rawa kina ko ira na luve i Isireli e na matadra na nodra meca; era sa vakanadaku mai e na matadra na nodra meca, e na vuku ni ra sa mai lesi me vakarusai: au na sega tale ni tiko kei kemuni, kevaka dou na sega ni vakaotia na ka sa lesi me vakarusai me kua ni tiko vei kemuni.

¹³ Tu cake, mo vakasavasavataki ira na tamata, ka kaya, Ni vakasavasavataki kemuni ka waraka na mataka: ni sa vosa vakaoqo ko Jiova na Kalou nei Isireli, Sa tu na ka sa lesi me vakarusai vei kemuni, na Isireli: kemuni na sega ni tu rawa e na matadra na nomuni meca, mo ni biuta tani mada na ka sa lesi me vakarusai me kua ni tiko vei kemuni.

¹⁴ E na sabogibogi dou na toro mai vakayavusa: ia na yavusa sa cavuta ko Jiova, ena toro mai vakamataqali; ia na mataqali sa cavuta ko Jiova, ena toro mai vakavuvale; ia na vuvale sa cavuta ko Jiova, ena toro mai na tamata vakayadua.

¹⁵ Ia ko koya sa cavuti ni sa tu vua na ka sa lesi me vakarusai, ena vakamai e na buka, ko koya kei na nona ka kecega: e na vuku ni sa vakacataka na veiyalayalati i Jiova, ka ni sa kitaka na ka vakalialia e Isireli.

¹⁶ A sa sou ko Josua e na sabogibogi, ka kauti ira mai na Isireli me vaka na nodra veiyavusa; a sa cavuti na yavusa i Juta.

¹⁷ A sa kauti ira mai na mataqali i Juta; a sa cavuti na nodra mataqali na luve i Sera: a sa kauta mai na nodra mataqali na luve i Sera na tamata vakayadua; a sa cavuti ko Sapiti:

¹⁸ a sa kauta mai ko koya na nona vuvale na tamata vakayadua; a sa cavuti ko Akani, na luve i Karimi, na luve i Sapiti, na luve i Sera, e na yavusa i Juta.

¹⁹ A sa kaya vei Akani ko Josua, Na luvequ, mo vakavinavinaka mada vei Jiova na Kalou nei Isireli, ka vakatusa vua; ka tukuna mada vei au na ka ko sa cakava; kakua ni vunia vei au.

²⁰ A sa vosa vei Josua ko Akani, ka kaya, E dina kaʼu a kitaka nai valavala ca vei Jiova na Kalou nei Isireli, ia kaʼu sa kitaka vaka:

²¹ Niʼu a raica ni sa tu vata kei nai toki ni valu e dua nai sulu vinaka mai Sainari, kei na siliva e rua na drau na sikeli, kei na dua na uma ni koula sa limasagavulu na sikeli na kena bibi, au a qai kocova, ka kauta; ka, raica, sa vuni e na qele e na loma ni noqu vale, ia na siliva sa tu e rukuna.

²² A sa tala e so nai talatala ko Josua, ka ra cici ki na vale, ka, raica, sa vuni tu e nona vale, kei na siliva sa tu e rukuna.

²³ A ra sa kauta na veika o qo, mai na loma ni vale, ka kauta vei Josua, vei ira talega na luve i Isireli kecega, a ra viria yadua e na mata i Jiova.

²⁴ Ia ko Josua, kei ira vata kaya na Isireli kecega, era kauti Akani na luve i Sera, kei na siliva, kei nai sulu, kei na uma ni koula, kei iratou na luvena tagane, kei iratou na luvena alewa, kei na nona veika-ravau, kei na nona veiasa, kei na nona vei-sipi, kei na nona vale, kei na nona ka kecega; a ra sa kauti ira ki na buca i Akori.

²⁵ A sa kaya ko Josua, A cava ko sa vakararawataki keimami kina? ena vakararawataki iko e na siga edaidai ko Jiova. A sa viriki koya e na vatu ko ira kecega na Isireli; ia era vakamai ira e na buka, ka viriki ira e na vatu.

²⁶ A ra binia e delana nai binibini vatu levu, a ya sa tu edaidai. A sa saumaki ko Jiova mai na katakata ni nona cudru. O koya o qo sa vakatokai kina na yaca ni tikina ko ya, Na buca i Akori [Vakararawataki], ka yacova na siga edaidai.