Josua 22 - AI VOLA TABU

Sa tala na yavusa e rua, ka dua na wase ni yavusa, ki na vanua era taukena, 1-9. Era sa tara e dua nai cabocabo-ni-soro; ka sa cudru kina ko ira na luve i Isireli, 10-20. Era sa tukuna na kenai balebale; a sa yalovinaka kina ko ira era sa rogoca, 21-34.

¹ SA qai kacivi ira mai na luve i Rupeni, kei ira na luve i Kata, kei na wase e dua ni yavusa i Manase, ko Josua,

² ka kaya vei ira, Dou sa vakabauta oti na ka kecega sa vakarota vei kemudou ko Mosese nai talatala i Jiova, ia dou sa vakarorogo ki na domoqu e na ka kecega kaʼu sa vakaroti kemudou kina:

³ dou sa sega ni laivi ira na wekamudou e na siga e vuqa o qo, ka yacova na siga edaidai, ia dou sa vakabauta na ka sa lesia na vunau i Jiova na nomudou Kalou.

⁴ Ia o qo, sa vakacegutaki ira na wekamudou ko Jiova na nomudou Kalou, me vaka ka kaya ko koya vei ira: ia o qo, mo dou lesu, ka lako ki na nomudou veivale, ki na vanua dou sai taukei kina, a ya ka solia vei kemudou ko Mosese nai talatala i Jiova mai tai kadua ni Joritani.

⁵ Ia dou nanuma ga vakavinaka me kitaka nai vakaro kei na vunau, a ya ka vunautaka vei kemudou ko Mosese nai talatala i Jiova, mo dou lomani Jiova na nomudou Kalou, ka lako e na nona sala kecega, ka vakabauta na nona veivunau, ka kabiti koya, ka qaravi koya e na lomamudou taucoko, kei na yalomudou taucoko.

⁶ A sa vosavakalougatataki ira ko Josua, ka talai ira yani: a ra sa lako ki na nodra veivale.

⁷ (Ia sa vota oti ko Mosese ki na wase e dua ni yavusa i Manase mai Pasani: ia ki na wase kadua sa vota ko Josua vata kei ira na wekadra e na tai o qo ni Joritani kivaka ki ra.) Ia ni sa talai ira yani ko Josua ki na nodra veivale, sa qai vosavakalougatataki ira,

⁸ ka vosa vei ira, ka kaya, Dou lesu ki na nomudou veivale, ka laʼki vutuniyau sara, ka me levu sara na manumanu e yavai va, na siliva, kei na koula, kei na parasa, kei na aironi, kei nai sulu na ka levu sara: dou veivota kei ira na wekamudou nai toki ni nomudou meca.

⁹ A ra sa lesu na luve i Rupeni, kei na luve i Kata, kei na wase e dua ni yavusa i Manase, a ra sa lako tani maivei ira na luve i Isireli mai Silo, a ya e na vanua ko Kenani, me ra lako ki na vanua ko Kiliati, ki na vanua era sa rawata oti me ra kenai taukei, me vaka na vosa i Jiova e na gusu i Mosese.

¹⁰ Ia ni ra sa lako mai ki na bati ni Joritani, a ya e na vanua ko Kenani, era sa qai tara maikina e dua nai cabocabo-ni-soro e na bati ni Joritani ko ira na luve i Rupeni, kei na luve i Kata, kei na wase e dua ni yavusa i Manase, io nai cabocabo-ni-soro levu ni raici.

¹¹ A ra sa rogoca na luve i Isireli, ka vaka, Raica; era sa tara e dua nai cabocabo-ni-soro na luve i Rupeni, kei na luve i Kata, kei na wase e dua ni yavusa i Manase, me donuya na vanua ko Kenani, e na bati ni Joritani, me donui ira na luve i Isireli.

¹² Ia ni ra sa rogoca na luve i Isireli, era sa soqoni vata ki Silo nai vavakoso taucoko ni luve i Isireli, me laʼki vala kei ira.

¹³ A ra sa talai Piniasi, na luve i Eliasari na bete, ko ira na luve i Isireli vei ira na luve i Rupeni, kei ira na luve i Kata, kei na wase e dua ni yavusa i Manase, ki na vanua ko Kiliati,

¹⁴ kei iratou vata kaya e tini na turaga, sa tauyadua na turaga e na mataqali turaga e na nodra yavusa kecega na Isireli; ia eratou sa turaga yadua e na mataqali ni nodra qase, e na nodra veiudolu na Isireli.

¹⁵ A ratou sa lako mai kivei ira na luve i Rupeni, kei na luve i Kata, kei na wase e dua ni yavusa i Manase, ki na vanua ko Kiliati, a ra sa vosa vei ira, ka kaya,

¹⁶ Sa vosa vakaoqo nai vavakoso taucoko i Jiova, A cava na caka cala o qo dou sa kitaka vua na Kalou nei Isireli, ni dou sa lesu tani edaidai me kakua ni muri Jiova tiko, ni dou sa tara vei kemudou e dua nai cabocabo-ni-soro, mo dou talaidredre kina edaidai vei Jiova?

¹⁷ Sa lailai beka vei keda nai valavala ca e na vuku i Piori, (eda sa sega ni vakasavasavataki maikina ka yacova na siga o qo, ia sa dua kina na mate levu vei ira nai vavakoso i Jiova;)

¹⁸ mo dou sa lesu tani edaidai, me kakua ni muri Jiova tiko? ia e na vuku ni dou sa talaidredre edaidai vei Jiova, ena cudruva ko koya nai vavakoso taucoko nei Isireli e na sabogibogi.

¹⁹ Ia kevaka sa tawa savasava na vanua dou sa taukena, dou lako-kosova ki na vanua sai taukei kina ko Jiova, sa tiko kina na vale-tikotiko i Jiova, ka mo dou taukei e na keimami maliwa: ia mo dou kakua ni talaidredre vei Jiova, se talaidredre vei keimami, ni dou sa tara vei kemudou e dua nai cabocabo-ni-soro tani, mei kuri ni cabocabo-ni-soro i Jiova na noda Kalou.

²⁰ Sa sega li ni kitaka na caka cala e na ka sa lesi me vakarusai ko Akani na luve i Sera? a sa cudruvi kina nai vavakoso taucoko nei Isireli? a sa tawa mate vakadua ga na tamata ko ya e na nonai valavala ca.

²¹ Sa qai vosa mai ko ira na luve i Rupeni, kei na luve i Kata, kei na wase e dua ni yavusa i Manase, ka kaya vei iratou na nodra turaga na veiudolu nei Isireli,

²² Sa kila ko Jiova na nodra Kalou na veikalou, io ko Jiova na nodra Kalou na veikalou, ena kila talega ko ira na Isireli; kevaka e na talaidredre, se e na caka cala vei Jiova, (me kakua ni keitou vakabulai edaidai,)

²³ keitou sa cakava vei keitou nai cabocabo-ni-soro, me keitou lesu tani kina me kakua ni muri Jiova tiko; se me cabori maikina nai soro kama se nai madrali laukana, se me cabori maikina nai soro e na veivinakati; me qai taroga ko Jiova;

²⁴ ia kevaka keitou sa sega ni kitaka na ka o qo, e na vuku ni keitou sa rere, ka kaya, De na vosa maimuri ko ira na luvemuni vei ira na luve i keimami, ka kaya, Sa nomudou vakaevei ko Jiova na Kalou nei Isireli?

²⁵ ni sa lesia na Joritani ko Jiova mei yalayala e na maliwa vei keitou kei kemudou, na luve i Rupeni kei na luve i Kata; sa sega na nomudou tikina vei Jiova: a ra na kitaki ira kina na luve i keimami ko ira na luvemuni me ra kakua ni rerevaki Jiova.

²⁶ O koya keitou a kaya kina, Me da vakarau me tara vei keda e dua nai cabocabo-ni-soro, me kakua ki nai soro kaisa, se dua nai soro:

²⁷ ia me dautukutuku ga vei keitou kei kemudou, vei ira talega nai tabatamata sa na muri keda, me keitou qarava na cakacaka i Jiova e matana, e na neitou veisoro kama, kei na neitou veisoro, kei na neitou veimadrali e na veivinakati; a me ra kakua ni kaya maimuri na luvemuni vei ira na luve i keimami, Sa sega na nomudou tikina vei Jiova:

²⁸ o koya keitou a veikainaka kina, Ni ra na vosa vei keda, se ki na nodai tabatamata maimuri, eda na qai kaya, Raica nai vakatakarakara ni cabocabo-ni-soro i Jiova, era cakava na neitou qase, me kakua ki nai soro kama, se dua nai soro, ia me dautukutuku ga vei keitou kei kemudou.

²⁹ Me yawa sara vei keitou me keitou talaidredre vei Jiova, ka lesu tani edaidai me keitou kakua ni muri Jiova tiko, me tara e dua tani nai cabocabo-ni-soro ki nai soro kama, ki nai madrali laukana, se dua nai soro, mei kuri ni cabocabo-ni-soro i Jiova na noda Kalou, a ya sa tu e na mata ni nona vale-tikotiko.

³⁰ Ia ni sa rogoca ko Piniasi na bete, kei iratou na turaga ni vavakoso kei na nodra turaga na veiudolu ni Isireli era sa tiko kaya, na vosa era sa vosataka na luve i Rupeni, kei na luve i Kata, kei na luve i Manase, sa qai vinaka vei iratou.

³¹ A sa kaya ko Piniasi, na luve i Eliasari na bete, kivei ira na luve i Rupeni, kei na luve i Kata, kei na luve i Manase, Keitou sa kila edaidai ni sa tiko e na keda maliwa ko Jiova, ni dou sa sega ni kitaka na talaidredre o qo vei Jiova: dou sa qai vakabulai ira na luve i Isireli mai na liga i Jiova.

³² A sa lesu ko Piniasi na luve i Eliasari na bete, kei iratou na turaga, maivei ira na luve i Rupeni, kei na luve i Kata, mai na vanua ko Kiliati, ki na vanua ko Kenani, vei ira na luve i Isireli, ka tukuna vei ira na ka o qo.

³³ A sa vinaka; vei ira na luve i Isireli na ka o qo; a ra sa vakavinavinaka vua na Kalou ko ira na luve i Isireli, ka sega ni kaya tale me ra lako cake me veivala kei ira, me vakarusa na vanua era tiko kina na luve i Rupeni, kei na luve i Kata.

³⁴ Ia ko ira na luve i Rupeni, kei na luve i Kata, era vakayacana nai cabocabo-ni-soro, ka kaya, Ni na dautukuna vei keda ni sa Kalou ko Jiova.