Josua 21 - AI VOLA TABU

Sa ra yavala na luve i Levi me soli vei ira e so na koro, 1, 2. A sa lesi vei ira na koro e so e na veimataqali, 3-42. Ai vakadinadina ni vosa ni Kalou vei ira na Isireli, 43-45.

¹ IA ko ira na nodra turaga na qase vei ira na luve i Levi, era sa toro mai vei Eliasari na bete, kei Josua na luve i Nuni, kei iratou na nodra turaga na qase ni nodra veiyavusa na luve i Isireli;

² a ra sa vosa vei ira mai Silo e na vanua ko Kenani, ka kaya, Sa vunautaka ko Jiova e na gusu i Mosese me solia na koro e so me keitou tiko kina, kei na vanua sa volita, ki na neitou manumanu e yavai va.

³ A ra sa solia vei ira na luve i Levi ko ira na luve i Isireli, mai na nodrai votavota, na veikoro o qo kei na vanua sa volita, me vaka na vosa i Jiova.

⁴ A sa lutu nai vola ni veidigidigi ki na nodra veimataqali na luve i Koaca: ia na luve i Eroni na bete, maivei ira na luve i Levi, era rawata e tinikatolu na koro, me vaka nai vola ni veidigidigi, mai na yavusa i Juta, ka mai na yavusa i Simioni, ka mai na yavusa i Penijamini.

⁵ Ia ko ira sa vo vei ira na luve i Koaca, era rawata e tini na koro, me vaka nai vola ni veidigidigi, mai na veimataqali ni yavusa i Ifireimi, ka mai na yavusa i Tani, ka mai na wase e dua ni yavusa i Manase.

⁶ Ia ko ira na luve i Kerisoni, era rawata e tinikatolu na koro, me vaka nai vola ni veidigidigi, mai na veimataqali ni yavusa i Isakari, ka mai na yavusa i Aseri, ka mai na yavusa i Nafitali, ka mai na wase e dua ni yavusa i Manase mai Pasani.

⁷ A sa tinikarua na koro era rawata na luve i Mirari, me vaka na nodra veimataqali, mai na yavusa i Rupeni, ka mai na yavusa i Kata, ka mai na yavusa i Sepuloni.

⁸ Ia era sa solia e nai vola ni veidigidigi ko ira na luve i Isireli, vei ira na luve i Levi, na veikoro o qo kei na vanua sa volita, me vaka ka vakarota ko Jiova e na gusu i Mosese.

⁹ A ra sa solia na veikoro o qo, sa cavuti eke na yacadra, mai na nodra yavusa na luve i Juta, ka mai na nodra yavusa na luve i Simioni:

¹⁰ era sa rawata ko ira na luve i Eroni, e na nodra veimataqali na luve i Koaca, ni ra sa luve i Levi: ni sa nodra nai vola ni veidigidigi sa tauri eliu.

¹¹ A ra solia vei ira na koro i Aripa, na tama i Anaki, (a ya ko Epironi,) kei na vanua e nai bili sa volita, sa toka mai na ulu-ni-vanua nei Juta.

¹² Ia na kena vanua na koro ko ya, kei na kena veikoro lalai, era sa solia vei Kalepi na luve i Yifune me nonai votavota.

¹³ A ra sa soli Epironi kei na vanua sa volita, vei ira na luve i Eroni na bete, me koro me dro kina ko koya sa ravuravu, ko Lipina talega kei na vanua sa volita,

¹⁴ kei Yatiri kei na vanua sa volita, kei Esitimoa kei na vanua sa volita,

¹⁵ kei Oloni kei na vanua sa volita, kei Tipiri kei na vanua sa volita,

¹⁶ kei Ayini kei na vanua sa volita, kei Juta kei na vanua sa volita, ko Peci-semesi kei na vanua sa volita; e ciwa na koro mai na yavusa e rua o qo.

¹⁷ A mai na yavusa i Penijamini, ko Kipioni kei na vanua sa volita, ko Kipa kei na vanua sa volita,

¹⁸ o Anacoci kei na vanua sa volita, kei Alimoni kei na vanua sa volita; e va na koro.

¹⁹ A koro kecega ni luve i Eroni, era bete, sa tinikatolu na koro kei na vanua sa volita.

²⁰ Ia na nodra veimataqali na luve i Koaca, era luve i Levi sa vo vei ira na luve i Koaca, na nodra veikoro sa lutu vei ira, e nai vola ni veidigidigi, mai na yavusa i Ifireimi.

²¹ Ni ra soli Sikemi vei ira kei na vanua sa volita mai na ulu-ni-vanua ko Ifireimi, me koro me dro kina ko koya sa ravuravu; kei Keseri kei na vanua sa volita,

²² kei Kipiseimi kei na vanua sa volita, kei Peci-oroni kei na vanua sa volita; e va na koro.

²³ Ia mai na yavusa i Tani, ko Ilitike kei na vanua sa volita, ko Kipiconi kei na vanua sa volita,

²⁴ ko Eiyaloni kei na vanua sa volita, ko Kaca-rimoni kei na vanua sa volita; e va na koro.

²⁵ Ia mai na wase e dua ni yavusa i Manase, ko Teenaki kei na vanua sa volita, kei Kaca-rimoni kei na vanua sa volita; e rua na koro.

²⁶ Na koro kecega, vei ira na nodra veimataqali na luve i Koaca sa vo, sa tini kei na vanua sa volita.

²⁷ Ia kivei ira na luve i Kerisoni, e na nodra veimataqali na luve i Levi, era soli Kolani mai Pasani kei na vanua sa volita, me dro kina ko koya sa ravuravu, mai na wase e dua ni yavusa i Manase; kei Pesitira kei na vanua sa volita; e rua na koro.

²⁸ Ia mai na yavusa i Isakari, ko Kisioni kei na vanua sa volita, ko Tapiraci kei na vanua sa volita,

²⁹ ko Yarimuci kei na vanua sa volita, ko Eni-kanimi kei na vanua sa volita; e va na koro.

³⁰ Ia mai na yavusa i Aseri, ko Misali kei na vanua sa volita, ko Apitoni kei na vanua sa volita,

³¹ ko Elikaci kei na vanua sa volita, kei Riopi kei na vanua sa volita; e va na koro.

³² Ia mai na yavusa i Nafitali, ko Ketesi mai Kalili kei na vanua sa volita, me dro kina ko koya sa ravuravu; kei Emoci-tori kei na vanua sa volita, kei Karitani kei na vanua sa volita; e tolu na koro.

³³ A nodra koro kecega na luve i Kerisoni, me vaka na nodra veimataqali, sa tinikatolu na koro kei na vanua sa volita.

³⁴ Ia kivei ira na nodra veimataqali na luve i Mirari, na kena vo ni luve i Levi, era soli Yokiniami kei na vanua sa volita, mai na yavusa i Sepuloni, ko Kari ta kei na vanua sa volita,

³⁵ ko Timina kei na vanua sa volita, ko Neelali kei na vanua sa volita; e va na koro.

³⁶ Ia mai na yavusa i Rupeni, era soli Peseri kei na vanua sa volita, kei Yasa kei na vanua sa volita,

³⁷ ko Kitemoci kei na vanua sa volita, kei Mefeaci kei na vanua sa volita; e va na koro.

³⁸ Ia mai na yavusa i Kata, ko Ramoci mai Kiliati kei na vanua sa volita, me dro kina ko koya sa ravuravu; kei Meeneimi kei na vanua sa volita,

³⁹ ko Esiponi kei na vanua sa volita, ko Yaseri kei na vanua sa volita; na koro kece sa va.

⁴⁰ Na nodra koro kece na luve i Mirari, me vaka na nodra veimataqali, a ya sa vo vei ira na nodra veimataqali na luve i Levi, sa tinikarua na koro, me vaka nai vola ni veidigidigi.

⁴¹ Na nodra koro kecega na luve i Levi, e loma ni nodrai votavota na luve i Isireli, sa vasagavulu ka walu na koro kei na vanua sa volita.

⁴² Na veikoro o qo era sa vata yadua kei na vanua sa volita: sa vakaoqo na koro kecega o qo.

⁴³ A SA solia vei ira na Isireli ko Jiova na vanua kece ka vosavavakini kina ko koya me solia vei ira na nodra qase; a ra sa taukena, ka tiko kina.

⁴⁴ A sa vakacegu-taki ira ko Jiova, e na yasana kece, me vaka na ka kecega ka vosavavakini kina vei ira na nodra qase; a sa sega ni dua na tamata vei ira kecega na nodra meca me tu rawa e matadra; sa solia na nodra meca kecega ki na ligadra ko Jiova.

⁴⁵ Sa sega ni lutu e dua na-ka e na ka vinaka kecega ka vosa kina ko Jiova ki na mataqali nei Isireli; sa yaco kecega.