Josua 19 - AI VOLA TABU

Ai votavota nei Simioni, 1-9. A nei Sepuloni, 10-16. A nei Isakari, 17-23. A nei Aseri, 24-31. A nei Nafitali, 32-39. A nei Tani, 40-48. A nei Josua, 49-51.

¹ IA na kenai karua ni votavota sa lutu vei ira na Simioni, ki na nodra yavusa na luve i Simioni, me vaka na nodra veimataqali: ia na nodrai votavota sa no e na loma ni nodrai votavota na luve i Juta.

² A sa toka e nodrai votavota ko Pieri-sepa, ko Sipa, kei Molata,

³ kei na koro ko Suali, kei Pala, kei Esemi,

⁴ kei Elitolati, kei Peculi, kei Orima,

⁵ kei Sikilaki, kei Peci-marikapoci, kei na koro ko Susa,

⁶ kei Peci-lipaoci, kei Sarueni; e tinikatolu na koro kei na kedra veikoro lalai:

⁷ ko Ayini, ko Rimoni, kei Eceri, kei Asani; e va na koro kei na kedra veikoro lalai:

⁸ kei na koro lalai kece sa volita na Veikoro o qo ki Pealaci-pieri, ko Ramaca mai na ceva. O qo nai votavota ni nodra yavusa na luve i Simioni, me vaka na nodra veimataqali.

⁹ A nodrai votavota na luve i Simioni, sa mai na nodra yasana na luve i Juta: ni sa rui levu vei ira na nodra tikina na luve i Juta: ia sa taukena kina nai votavota ko ira na luve i Simioni e na loma ni votavota kadua.

¹⁰ Ia na kenai katolu ni votavota sa lutu vei ira na luve i Sepuloni, me vaka na nodra veimataqali: ia nai yalayala ni nodrai votavota sa yaco ki Sariti:

¹¹ a sa lako cake na nodrai yalayala kivaka ki na waitui, kei Marela, ka yaco ki Tapiseci, ka yacova na uciwai sa donui Yokiniami;

¹² a sa lesu mai Sariti kivaka ki cake, ki nai cadracadra ni siga, ki nai yalayala kei Kisiloci-tapori, ka qai lako yani ki Tapiraci, ka lako cake ki Yafia,

¹³ a sa lako yani maikea kivaka ki cake ki Kita-eferi, ki Ita-kasini, ka lako yani ki Rimoni-micori, ki Nea;

¹⁴ a sa volita nai yalayala ki na kena yasa ki na tokalau ki Anaconi: ia sa kenai mudumudu na buca ko Ifita-eli:

¹⁵ kei Kataci, kei Neelali, kei Simironi, kei Itala, kei Pecileema: e tinikarua na koro kei na kedra Veikoro lalai.

¹⁶ O qo na nodrai votavota na luve i Sepuloni, me vaka na nodra veimataqali, na veikoro o qo kei na kedra veikoro lalai.

¹⁷ A kenai kava ni votavota sa lutu vei ira na Isakari, vei ira na luve i Isakari, me vaka na nodra veimataqali.

¹⁸ A sa no na nodrai yalayala vaka ki Isirieli, kei Kesuloci, kei Sunemi,

¹⁹ kei Efareimi, kei Sioni, kei Enaraci,

²⁰ kei Rapici, kei Kisioni, kei Epesi,

²¹ kei Rimici, kei Eni-kanimi, kei Eni-ata, kei Peci-pasesi;

²² a sa yaco ki Tapori nai yalayala, kei Seesima, kei Peci-semesi; ia sai mudumudu ni nodrai yalayala na Joritani: e tinikaono na koro kei na kedra Veikoro lalai.

²³ O qo nai votavota ni nodra yavusa na luve i Isakari, me vaka na nodra veimataqali, na veikoro kei na kedra veikoro lalai.

²⁴ Ia na kenai kalima ni votavota sa lutu ki na nedra yavusa na luve i Aseri, me vaka na nodra veimataqali.

²⁵ Ia na nodrai yalayala ko Elikaci, kei Eli, kei Peteni, kei Ekisafi,

²⁶ kei Elameleki, kei Amata, kei Miseali; ka yacovi Karimeli ki ra, ka yaco ki Siori-lipinaci;

²⁷ a sa lesu vaka ki nai cadracadra ni siga ki Peci-takoni, ka yaco ki Sepuloni, kei na buca ko Ifita-eli, ki na yasa ki na tokalau ki Peci-emeki, kei Nieli, ka sa lako yani ki Kapuli ki na yasana i mawi,

²⁸ kei Ipironi [se Apitoni], kei Riopi, kei Amoni, kei Kana, ka yaco ki Saitoni levu;

²⁹ a sa lesu ki Rama nai yalayala, kei na koro kaukauwa ko Teiri; a sa lesu ki Osa nai yalayala; ia na kenai mudumudu na waitui, mai na yasana ko Ekisipi:

³⁰ kei Uma, kei Efeki, kei Riopi: e ruasagavulu ka rua na koro kei na kedra Veikoro lalai.

³¹ O qo nai votavota ni nodra yavusa na luve i Aseri, me vaka na nodra veimataqali, na Veikoro o qo kei na kedra veikoro lalai.

³² Na kenai kaono ni votavota sa lutu vei ira na luve i Nafitali, io vei ira na luve i Nafitali, me vaka na nodra veimataqali.

³³ A sa tekivu na nodrai yalayala mai Elepi, mai Eloni ki Seenanimi, kei Etami, kei Nekepi, kei Yapinieli, ka yaco ki Lakumi; ia sa kenai mudumudu na Joritani:

³⁴ ia sa lesu nai yalayala kivaka ki ra ki Esinoci-tapori, ka lako yani maikina ki Ukoki, ka yacovi Sepuloni mai na ceva, ka yaco ki Aseri mai ra, ka kivei Juta mai na Joritani kivaka ki nai cadracadra ni siga.

³⁵ Ia na veikoro vakabai ko Sitimi, ko Seri, kei Emaci, ko Rakaci, kei Kinereci,

³⁶ kei Atama, kei Rama, kei Asori,

³⁷ kei Ketesi, kei Etirei, ko Eni-asori,

³⁸ kei Irioni, kei Mikitalieli, ko Oremi, kei Peci-anaci, kei Peci-semesi; e tinikaciwa na koro kei na kedra Veikoro lalai.

³⁹ O qo nai votavota ni nodra yavusa na luve i Nafitali, me vaka na nodra veimataqali, na veikoro kei na kedra veikoro lalai.

⁴⁰ Na kenai kavitu ni votavota sa lutu ki na nodra yavusa na luve i Tani, me vaka na nodra veimataqali.

⁴¹ Ia nai yalayala ni nodrai votavota ko Sora, kei Esitaoli, kei Iri-semesi,

⁴² kei Seelapini, kei Eyaloni, kei Icila,

⁴³ kei Eloni, kei Ciminaca, kei Ekironi,

⁴⁴ kei Ilitike, kei Kipiconi, kei Pealaci,

⁴⁵ kei Yiuti, kei Peni-piraki, kei Kaca-rimoni,

⁴⁶ kei Me-yarikoni, kei Rakoni, kei nai yalayala e na mata i Jafa.

⁴⁷ A sa lakani vei ira na nodrai yalayala na luve i Tani: era sa lako cake kina na luve i Tani me veivaluti kei Lesemi, ka ra rawata, ka yavita e na bati ni seleiwau, a ra sa laʼki taukena, ka tiko kina, a ra sa vakatokai Lesemi, ko Tani, me vaka na yaca i Tani na tamadra.

⁴⁸ O qo nai votavota ni nodra yavusa na luve i Tani, me vaka na nodra veimataqali, na Veikoro o qo kei na kedra veikoro lalai.

⁴⁹ Ia ni ra sa vota oti na vanua me taukena, me vaka na kena veiyalayala, era sa qai solia na luve i Isireli vei Josua na luve i Nuni nai votavota e na kedra maliwa:

⁵⁰ me vaka na vosa i Jiova era sa solia vua na koro sa kerea ko koya, ko Timi-naci-sera mai na ulu-ni-vanua ko Ifireimi: a sa tara ko koya na koro ko ya, ka tiko kina.

⁵¹ O qo nai votavota eratou a vota ko Eliasari na bete, kei Josua na luve i Nuni, kei iratou sa turaga vei ira na qase ni nodra veiyavusa na luve i Isireli, e nai vola ni veidigidigi, mai Silo, e na mata i Jiova, e na katuba ni vale gatu ni veitata. A ra sa vakaotia na vota ni vanua.