Josua 18 - AI VOLA TABU

Era vakatura cake na vale-tikotiko mai Silo, 1. 10. Sa vakauqeta na yavusa e vitu ko Josua me ra qara na nodrai votavota, 2-10. Ai votavota nei Penijamini, 11-28.

¹ A RA sa soqo vata nai vavakoso taucoko ni luve i Isireli mai Silo, ka vakatura cake kina na vale gatu ni veitata. A sa vakamalumalumutaki na vanua e matadra.

² A sa vo e vitu na yavusa vei ira na luve i Isireli, sa tawa rawata na nodrai votavota.

³ A sa kaya ko Josua kivei ira na luve i Isireli, A cava na kena dede mo dou berabera me laʼki taukena na vanua, a ya sa solia vei kemudou ko Jiova na nodra Kalou na nomudou qase?

⁴ Dou lesia mai vei kemudou na tamata e lewe tolu e na yavusa yadua: au na qai talai iratou, a ratou na ia, ka veilakoyaki e na vanua, ka vola me vaka na nodrai votavota; a ratou na lesu mai vei au.

⁵ A ratou na wasea me vitu na tikina: era na tiko na Juta e na nodra yasana mai na ceva, ka na tiko na mataqali i Josefa e na nodra yasana mai na tokalau.

⁶ Ia dou na vola na vanua me vitu na kena tikina, ka kauta mai nai vola vei au kike, meʼu ia na veidigidigi vei kemudou eke e na mata i Jiova na noda Kalou.

⁷ Ia ko ira na luve i Levi, sa sega na nodra tikina vata kei kemudou; ni sa nodrai votavota na cakacaka vakabete vei Jiova: ia ko ira na Kata, kei na Rupeni, kei na dua na wase ni yavusa i Manase, era sa rawata na nodrai votavota mai tai kadua ni Joritani, mai na tu i cake, a ya sa solia vei ira ko Mosese nai talatala i Jiova.

⁸ A ratou sa ia na tamata, ka lako tani: a sa vakaroti iratou ka lako me vola na vanua ko Josua, ka kaya, Dou laʼki veilakoyaki e na vanua, ka vola, ka lesu tale mai vei au, meʼu kitaka na veidigidigi vei kemudou eke e na mata i Jiova, e Silo.

⁹ A ratou sa lako na tamata, ka basika na vanua, ka vola me vaka na veikoro, ka wasea me vitu na tikina, e na dua nai vola, a ratou sa lesu vei Josua ki nai tikotiko mai Silo.

¹⁰ A sa kitaka na veidigidigi vei ira ko Josua mai Silo, e na mata i Jiova: ka wasea maikina na vanua ko Josua kivei ira na luve i Isireli, me vaka na nodra wasewase.

¹¹ A sa vura cake nai vola ni votavota ni nodra yavusa na luve i Penijamini me vaka na nodra veimataqali: a sa lako nai yalayala ni nodrai votavota e na nodra maliwa na luve i Juta kei na luve i Josefa.

¹² Ia na nodrai yalayala e na yasana ki na tokalau sa tekivu mai na Joritani; a sa lako cake nai yalayala ki na yasa i Jeriko sa donuya na tokalau, a sa lako cake e na veiulu-ni-vanua vaka ki ra; ia sa kenai mudumudu na lekutu mai Peci-aveni.

¹³ A sa lako yani maikea nai yalayala vaka ki Lusa, ki na yasa i Lusa, (a ya ko Peceli,) sa donuya na ceva; a sa lako sobu nai yalayala ki Ataroci-atari, voleka ki na ulu-ni-vanua sa toka e na yasa ki na ceva ki Peci-oroni era.

¹⁴ A sa volai maikea nai yalayala, ka lako volita na yasa ni Wasawasa ki na ceva, mai na ulu-ni-vanua e na mata i Peci-oroni ki na ceva; ia sa kenai mudumudu ko Kiriaci-peali, (o qo ko Kiriaci-yiarimi,) e dua na nodra koro na luve i Juta: o qo na kenai yalayala ki ra.

¹⁵ Ia na yasana ki na ceva sa tekivu mai nai yalayala kei Kiriaci-yiarimi, a sa lako yani nai yalayala vaka ki ra, ka lako yani ki na wai vure mai Nefitoa:

¹⁶ a sa lako sobu nai yalayala ki na ucu ni ulu-ni-vanua sa donuya na buca ni luve i Inomi, o qori mai na buca ni luve i Refei, vaka ki na tokalau, sa lako sobu ki na buca nei Inomi, ki na yasa ni kai Jepusa ki na ceva, ka lako sobu ki Eni-rokeli,

¹⁷ a sa volai mai na tokalau, ka lako yani ki Eni-semesi, ka lako yani ki Kililoci, a ya sa donuya na lako cake ki Atumimi, ka lako sobu ki na Vatu i Poani, na luve i Rupeni,

¹⁸ a sa lako yani vaka ki na yasa sa donui Arapa, ki na mata ni tokalau, ka lako sobu ki Arapa:

¹⁹ a sa lako yani nai yalayala ki na yasa i Peci-okila vaka ki na tokalau: ia nai mudumudu ni yalayala na toba ni Wasa Tuituina vaka ki na tokalau mai nai otioti ni Joritani ki na ceva: o qo nai yalayala ki na ceva.

²⁰ Ia na kenai yalayala e na kena yasa ki cake ko na Joritani. O qo na nodrai votavota na luve i Penijamini, na kenai yalayala voli me vaka na nodra veimataqali.

²¹ Ia na veikoro ni nodra yavusa na luve i Penijamini, me vaka na nodra veimataqali, ko Jeriko, kei Peci-okila, kei na buca mai Kisisi,

²² kei Peci-arapa, kei Simareimi, kei Peceli,

²³ kei Avimi, kei Para, kei Ofira,

²⁴ kei Kifari-ni-luve-i-Amoni, kei Ofini, kei Kepa; e tinikarua na koro kei na kedra veikoro lalai;

²⁵ ko Kipioni, kei Rama, kei Pieroci,

²⁶ kei Misipe, kei Kifira, kei Mosa,

²⁷ kei Rikemi, kei Iripeli, kei Tarela,

²⁸ kei Sela, ko Elefi, kei Jepusa (a ya ko Jerusalema), ko Kepaci, ko Kiriaci; e tinikava na koro kei na kedra veikoro lalai. O qo na nodrai votavota na luve i Penijamini, me vaka na nodra veimataqali.