Josua 17 - AI VOLA TABU

Ai votavota ni yavusa i Manase, 1-6; a nodrai yalayala, 7-13. Era masu na luve i Josefa, me levu cake na nodrai votavota, 14-18.

¹ A SA dua nai votavota vei ira na yavusa i Manase; ia ka sa ulumatua i Josefa ko koya; vei Mekiri na ulumatua i Manase, na tama i Kiliati: e na vuku ni sa tamatai valu ko koya, a sa nona kina ko Kiliati kei Pasani.

² A sa tauyadua na nodra na luve i Manase sa vo, me vaka na nodra veimataqali; vei ira na luve i Epieseri, kei ira na luve i Eleki, kei ira na luve i Esirieli, kei ira na luve i Sikemi, kei ira na luve i Eferi, kei ira na luve i Simita: o qo na luvena tagane i Manase na luve i Josefa, me vaka na nodra veimataqali.

³ Ia ko Silofati, na luve i Eferi, na luve i Kiliati, na luve i Mekiri, na luve i Manase, sa sega na luvena tagane, e so na luvena alewa ga: ia o qo na yacadratou na luvena alewa, ko Mala, kei Noa, ko Okila, ko Milika, kei Tirisa.

⁴ A ratou sa toro ki na mata i Eliasari na bete, kei na mata i Josua na luve i Nuni, kei na matadra na turaga, ka kaya, Sa vunautaka vei Mosese ko Jiova me solia vei keitou nai votavota e na kedra maliwa na weka i keitou. Sa qai solia kina vei ira ko koya e dua nai votavota e na kedra maliwa na weka i tamadratou, me vaka na vosa i Jiova.

⁵ A sa lutu vei ira na Manase e tini na tikina, kei na vanua ko Kiliati kei Pasani talega, a ya mai na tai kadua ni Joritani;

⁶ ni sa dua na nodrai votavota na luvena alewa ko Manase e na kedra maliwa na luvena tagane: ia ko ira na luve i Manase, sa vo, sa nodra na vanua ko Kiliati.

⁷ Ia na nodrai yalayala na Manase sa mai Aseri ka yaco ki Mikimica, a ya sa donui Sikemi; a sa lako nai yalayala ki nai matau kivei ira na kai Eni-tapua.

⁸ Sa nodra na Manase na vanua ko Tapua: ia ko Tapua e na nodrai yalayala na Manase, sa nedra na luve i Ifireimi;

⁹ a sa lako sobu nai yalayala ki na uciwai ko Kana, mai na tai ni uciwai ki na ceva: sa nodra na Ifireimi na Veikoro o qo, e na maliwa ni nodra veikoro na Manase. Na nodrai yalayala talega na Manase, sa koto e na tai ni uciwai ki na tokalau, ia sa kenai mudumudu na waitui:

¹⁰ sa nodra na Ifireimi na tai ki na ceva, ka nodra na Manase na tai ki na tokalau, ia na nodrai yalayala na waitui; a sa veiyacovi mai Aseri mai na tokalau, ka mai Isakari mai na tu i cake.

¹¹ Ia sa nodra na Manase, e Isakari kei Aseri, ko Peci-siani kei na kena Veikoro, kei Ipiliami kei na kena veikoro, kei ira na kai Tori kei na kena veikoro, kei ira na kai Eni-tori kei na kena Veikoro, kei ira na kai Teenaki kei na kena Veikoro, kei ira na kai Mikito kei na kena veikoro, sa tolu na vanua.

¹² A ra sa tawa vakasevi ira tani rawa na lewe ni veikoro ko ya ko ira na luve i Manase; ia era sa gu na kai Kenani me tiko e na vanua ko ya.

¹³ Ia ni ra sa tubu me kaukauwa na luve i Isireli, era sa kitaki ira na kai Kenani me ra qali; ka sega ni vakasevi ira tani sara.

¹⁴ A ra sa vosa vei Josua ko ira na luve i Josefa, ka kaya, A cava ko sa solia kina vei au e dua ga nai votavota ka dua ga na tikina meʼu taukena, ni sa tamata lewe vuqa koi au, e na vuku ni sa vakalougatataki au ko Jiova ka yaco ki na gauna o qo?

¹⁵ A sa kaya vei ira ko Josua, Kevaka ko sa tamata lewe vuqa, mo lako cake ki na veikaukau, ka taya sobu maikina me nomu e na nodra vanua na lewe ni veikoro lalai kei na tamata yagolevu, ke sa qiqo vei iko na ulu-ni-vanua mai Ifireimi.

¹⁶ A ra sa kaya na luve i Josefa, Sa sega ni rauti keimami na ulu-ni-vanua: ia na kai Kenani sa tiko e vanua buca, sa tu vei ira e so na vale-vodoki kaukamea, mai Peci-siani kei na kena veikoro, kei ira mai na buca ko Isirieli.

¹⁷ A sa vosa ko Josua ki na mataqali i Josefa, io vei ira na Ifireimi kei na Manase, ka kaya, O sa tamata lewe vuqa, a sa levu na nomu qaqa: ena sega ni dua ga na nomui votavota;

¹⁸ ni na nomu na ulu-ni-vanua: ke sa veikaukau ko ya, mo taya sobu: ena nomu talega na kena veiyalayala: ia na kai Kenani, kevaka sa tu vei ira e so na vale-vodoki kaukamea, ka sa kaukauwa ko ira, ko na vakasevi ira yani ga.