Josua 13 - AI VOLA TABU

Sa vakatakila vei Josua ko Jiova na tiki ni vanua sa vo era tawa rawata na Isireli me nodra, 1-6; a sa kaya vua me vota na vanua era sa rawata, 7, me vaka ka vota na vanua mai tai kadua ko Mosese vei ira na Rupeni kei ira na Kata kei ira na Manase, 8-14. A nodrai votavota na luve i Rupeni, 15-23; a nodra na luve i Kata, 24-28; a nodra na wase e dua ni yavusa i Manase, 29-33.

¹ A SA qase mai ko Josua, sa vuqa na nona yabaki; a sa kaya vua ko Jiova, O sa qase mai, sa vuqa na nomu yabaki, a sa vo e levu sara na tiki ni vanua me taukeni.

² O qo na vanua sa vo tu: Na nodra yasana kecega na kai Filisitia, kei Kesuri kecega,

³ mai Siori, sa donui Ijipita, ka yaco ki nai yalayala kei Ekiloni mai na tokalau, sa kainaki e nodra na kai Kenani: e lima na nodra turaga na kai Filisitia: na kai Kasa, kei na kai Asitoci, na kai Asikiloni, na kai Kaca, kei na kai Ekironi: ko ira talega na Avi:

⁴ mai na mata ni ceva, na nodra vanua kecega na kai Kenani, kei Miera, sa nodra na kai Saitoni, ka yaco ki Efeki, ka yaco ki na nodrai yalayala na luve i Amori:

⁵ kei na nodra vanua na kai Kipali, kei Lipanoni taucoko, kivaka ki nai cadracadra ni siga, mai Peali-kata e ruku ni ulu-ni-vanua ko Erimoni, ka yacova na sala sa curu ki Emaci.

⁶ A lewe ni ulu-ni-vanua kecega sa mai Lipanoni ka yaco ki Misirifoci-meimi, kei na kai Saitoni kecega, kaʼu na vakaseva yani e na matadra na luve i Isireli: ia mo vota ga vei ira na Isireli e nai vola ni veidigidigi, me ra taukena, me vaka kaʼu sa vakarota vei iko.

⁷ Ia o qo, mo vota na vanua o qo me ra taukena na yavusa e ciwa, kei na dua na wase ni yavusa i Manase:

⁸ era sa rawata vata kaya ko ira na luve i Rupeni kei na luve i Kata na nodrai votavota, a ya sa solia vei ira ko Mosese, mai tai kadua ni Joritani kivaka ki cake, me vaka sa solia vei ira ko Mosese nai talatala i Jiova;

⁹ sa mai Aroeri mai na bati ni uciwai ko Arinoni, kei na koro sa toka e na maliwa ni uciwai, kei na buca kece mai Metipa ka yaco ki Tiponi;

¹⁰ kei na Veikoro kecega i Sioni na nodra tui na luve i Amori, o koya ka lewa mai Esiponi, ka yaco ki na nodrai yalayala na luve i Amoni;

¹¹ kei Kiliati, kei na nodra yasana na kai Kesuri, kei na kai Meeka, kei na ulu-ni-vanua taucoko ko Erimoni, kei Pasani taucoko, ka yaco ki Salika;

¹² na matanitu taucoko nei Oki mai Pasani, o koya ka lewa mai Aseteroci kei Etirei, a ya na kedra vo ni tamata yagolevu: sa mokuti ira o qo ko Mosese, ka vakasevi ira tani.

¹³ Ia ka sa sega ni vakasevi ira tani ko ira na Isireli na kai Kesuri, se na kai Meeka: a sa tiko e na kedra maliwa na luve i Isireli ko ira na kai Kesuri kei na kai Meeka, ka yacova na siga o qo.

¹⁴ Ia ki na yavusa ga i Levi, sa sega ni solia kina ko koya e dua na kedrai votavota; sa kedrai votavota na veika sa cabori e na buka waqa vei Jiova na Kalou nei Isireli, me vaka ka kaya vei ira ko koya.

¹⁵ A sa vota ko Mosese na yavusa ni luve i Rupeni me vaka na nodra veimataqali.

¹⁶ Ia na nodra yasana sa mai Aroeri, a ya mai na bati ni uciwai ko Arinoni, kei na koro ko ya e na maliwa ni uciwai, kei na buca kece mai Metipa;

¹⁷ ko Esiponi, kei na kena veikoro kece e na buca; ko Tiponi, kei Pamoci-peali, kei Peci-peali-mioni,

¹⁸ kei Yasa, kei Kitemoci, kei Mefeaci,

¹⁹ kei Kiriyaceimi, kei Sipima, kei Sereci-aseari e na ulu-ni-vanua mai na cecelevu,

²⁰ kei Peci-piori, kei Asitoci-pisika, kei Peci-yisimoci,

²¹ kei na Veikoro kecega sa tu mai na buca, kei na matanitu taucoko nei Sioni na nodra tui na luve i Amori, o koya ka lewa mai Esiponi, o ira ka mokuta vata ko Mosese kei ira na turaga ni Mitiani, o Ivi, kei Rekemi, kei Suri, kei Uri, kei Repa, era turaga nei Sioni, sa tiko e na vanua.

²² O Palami talega na luve i Piori, na rairai, era yavita ko ira na luve i Isireli e nai seleiwau vata kei ira sa yaviti.

²³ Ia na nodrai yalayala na luve i Rupeni ko na Joritani, kei na yasana ko ya. O qo na nodrai votavota na luve i Rupeni me vaka na nodra veimataqali, na Veikoro kei na kedra veikoro lalai.

²⁴ A sa vota ko Mosese ki na yavusa i Kata, io vei ira na luve i Kata, me vaka na nodra veimataqali.

²⁵ Ia sa nodra yasana ko Yaseri, kei na koro kecega mai Kiliati, ka dua na wase ni kedra vanua na luve i Amoni, ka yaco ki Aroeri, o qori sa donui Rapa;

²⁶ mai Esiponi talega ka yaco ki Rama i Misipe, kei Pitonimi; mai Meeneimi talega ka yaco ki nai yalayala ni Tipiri;

²⁷ ia e na buca, ko Peci-arami, kei Peci-nimira, kei Sukoci, kei Safoni, na kena vo ni matanitu nei Sioni, na tui Esiponi, o Joritani kei na yasana ko ya, ka yacova na bati ni waitui ko Kinereci, mai tai kadua ni Joritani kivaka ki cake.

²⁸ O qo na nodrai votavota na luve i Kata me vaka na nodra veimataqali, na veikoro kei na kedra veikoro lalai.

²⁹ A sa vota ko Mosese ki na dua na wase ni yavusa i Manase, sa qai nodra e dua na wase ni nodra yavusa na luve i Manase me vaka na nodra mataqali.

³⁰ Ia na nodra yasana sa vakatekivu mai Meeneimi, ko Pasani taucoko, na matanitu taucoko nei Oki na tui Pasani, kei na koro lalai kecega i Yairi, a ya mai Pasani, sa onosagavulu na koro:

³¹ kei na dua na wase i Kiliati, kei Aseteroci, kei Etirei, na Veikoro e na matanitu nei Oki mai Pasani, na nodra na luve i Mekiri na luve i Manase, io na nodra e dua na wase ni luve i Mekiri me vaka na nodra mataqali.

³² O qo ka solia ko Mosese mei votavota e na cecelevu nei Moapi, mai tai kadua ni Joritani, e na vanua mai cake, e donui Jeriko.

³³ Ia ka sa sega ni solia e dua nai votavota ko Mosese ki na yavusa i Levi: a kedrai votavota ko Jiova na Kalou nei Isireli, me vaka ka kaya vei ira ko koya.