Josua 11 - AI VOLA TABU

Sa vuqa na tui sa mai vala kei Josua, 1-5. Sa vosa vei Josua ko Jiova me kakua ni rerevaki ira, 6; a sa laʼki veivala kei ira ko Josua, ka rawai ira kei na nodra Veikoro, 1-20. Sa mokuti ira na luve i Anaki ko Josua, 21-23.

¹ IA ni sa rogoca ko Yapini na tui Asori, sa talaki ko koya vei Jopapa na tui Matoni, kei na tui Simironi, kei na tui Ekisafi,

² kei ira na tui sa tiko vaka mai na tokalau e na ulu-ni-vanua, vei ira talega e na cecelevu vaka mai na ceva ki Kinereci, vei ira talega e na buca, kei na yasana nei Tori kivaka ki ra,

³ kivei ira talega na kai Kenani sa tiko mai na tu i cake, mai ra talega, kei ira na luve i Amori, kei ira na luve i Eci, kei ira na lewe ni Veikoro lalai, kei na kai Jepusa era sa tiko mai na veiulu-ni-vanua, kei ira na luve i Evi sa tiko e ruku i Erimoni, e na tiki ni vanua ko Misipa.

⁴ A ra lako yani, ko ira vata kei na nodrai valu kecega, a tamata lewe vuqa, me vaka na nuku mai matasawa e nai wiliwili, kei na ose kei na vale-vodoki na ka levu sara.

⁵ Ia ni sa bose na tui kecega o qori, era sa lako ka tiko vata ki na wai ko Meromi, mo ra veivala kei ira na Isireli.

⁶ A sa kaya vei Josua ko Jiova, Mo kakua ni rere o na vukudra: ni kaʼu na soli ira kece me vakamatei e na matadra na Isireli, o na sabogibogi, ni sa vakaoqo na mata-ni-siga; ko na vakalokilokitaka na nodra veiose, ka vakama o na buka na nodra veivale-vodoki.

⁷ A sa lako vaki-dacala mai vei ira ko Josua, kei ira vata kaya na tamatai valu kecega, mai na wai ko Meromi, ka lutuki ira.

⁸ A sa soli ira ko Jiova ki na ligadra na Isireli, a ra sa mokuti ira, ka vakubui ira ka yaco ki Saitoni levu, kei Misirifoci-meimi, kei na buca kei Misipe vaka ki na tu i cake, a ra mokuti ira, ka sega ni laiva o dua vei ira mo vo tu.

⁹ A sa kitaka vei ira ko Josua mo vaka ka kaya vua ko Jiova: sa vakalokilokitaka na nodra veiose, ka vakama o na buka na nodra veivale-vodoki.

¹⁰ A sa lesu ko Josua e na gauna ko ya, ka kabati Asori, ka yavita na kena tui e nai seleiwau: ni ka uludra na veimatanitu kecega ko ya eliu ko Asori.

¹¹ A ra sa ya-vita-mato sara na tamata kecega sa tiko mai kina e na bati ni seleiwau: sa sega ni vo e dua mo bula: ka sa vakamai Asori ko koya e na buka.

¹² Ia na nodra veikoro kecega na tui ko ya, kei na kedra tui kecega, sa rawata ko Josua, ka yavita e na bati ni seleiwau, ka vakarusai ira sara, me vaka ka vakarota ko Mosese nai talatala i Jiova,

¹³ Ia na Veikoro sa tu o na nodra vanua cecere, sa sega ni vakama e dua ko ira na Isireli, ko Asori duaduaga, sa vakama ko Josua.

¹⁴ Ia nai toki ni valu kecega mai na Veikoro o qo, kei na manumanu e yavai va, era sa taura na luve i Isireli me nodra: ia na tamata kecega, era sa yavita e na bati ni seleiwau, ka vakarusai ira kina; era sa sega ni laiva e dua me bula.

¹⁵ Me vaka ka vakarota vei Mosese na nonai talatala ko Jiova, ka vakaroti Josua vakakina ko Mosese; ia sa kitaka vakakina ko Josua; sa sega ni biuta e dua na ka e na ka kecega ka vakarota vei Mosese ko Jiova.

¹⁶ A sa rawata na vanua kecega ko ya ko Josua, na veiulu-ni-vanua, kei na vanua kecega sa no mai na mata ni ceva, kei na vanua taucoko ko Koseni, kei na buca, kei na cecelevu, kei na ulu-ni-vanua nei Isireli, kei na kena vanua buca;

¹⁷ io mai na ulu-ni-vanua ko Alaki, sa lako cake ki Seira, ka yaco ki Peali-kata e na buca kei Lipanoni e ruku ni ulu-ni-vanua ko Erimoni: ka sa rawata na kedra tui kecega ko koya, ka mokuti ira, ka vakamatei ira.

¹⁸ Sa kitaka vakadede nai valu kei ira na tui kecega o qori ko Josua.

¹⁹ Sa sega e dua na koro tani sa veisau-tutaki kei ira na luve i Isireli, o ira na luve i Evi ga na kai Kipioni: era sa rawata kece e nai valu:

²⁰ ni sa mai vei Jiova na vakaukauwataki ni yalodra, me ra laʼki veivaluti kei ira na Isireli, me vakamatei ira sara ko koya, ka ra kua ni lomani, ia me vakarusai ira ga ko koya, me vaka ka vakarota ko Jiova vei Mosese.

²¹ A sa lako mai e na gauna ko ya ko Josua, ka vakamatei ira na luve i Anaki mai na veiulu-ni-vanua, mai Epironi, mai Tipiri, mai Anapi, mai na veiulu-ni-vanua kece talega nei Juta, kei na veiulu-ni-vanua kecega nei Isireli: sa vakarusai ira sara ko Josua kei na nodra Veikoro.

²² Sa sega ni vo e dua na luve i Anaki e na nodra vanua na luve i Isireli: mai Kesa ga, mai Kaca, kei Asitoti, sa ra mani vo ga kina.

²³ A sa rawata na vanua taucoko ko Josua, me vaka na ka kece ka kaya ko Jiova vei Mosese; a sa solia ko Josua vei ira na Isireli me ra taukena, me vaka na wasewase ni nodra veiyavusa. A sa cegu mai nai valu na vanua.