Josua 10 - AI VOLA TABU

Eratou lewe lima na tui eratou sa laʼki veivala kei Kipioni, 1-5. Sa talaki vei Josua ko ira na kai Kipioni, 6, 7; asa vakabulai ira ko koya mai na ligadratou na tui, ka mokuti ira na meca, 8-10; a sa tau na uca-cevata, ka vakamatei ira ka dro, 11. Sa tu vakadua na mata-ni-siga mai na loma ni lagi, 12-15. Eratou sa dro ka vuni iratou na tui; a ratou sa kunei ka vakamatei, 16-27. Sa kabata na koro e vuqa ko Josua, 28-43.

¹ IA ni sa rogoca ko Etoni-seteki na tui Jerusalema ni sa kabati Ai oti ko Josua, a sa vaqeavutaka; (me vaka ni ka kitaki Jeriko ko koya kei na kena tui, sa kitaki Ai vakakina kei na kena tui;) ka ra sa sauvinaka oti na kai Kipioni kei na Isireli, ka ra tiko vata;

² era sa qai rere vakalevu, e na vuku ni sa koro levu sara ko Kipioni, me vaka e dua na koro vakaturaga, io sa levu cake ka lailai sobu ko Ai, ka ni sa qaqa ko ira kece na kena tamata.

³ A sa talaki ko Etoni-seteki na tui Jerusalema vei Oami na tui Epironi, kei Pirami na tui Yarimuci, kei Yafia na tui Lakisi, kei Tipiri na tui Ekiloni, ka kaya,

⁴ Dou lako cake mai vei au, ka vukei au, me da mokuti Kipioni, e na vuku ni sa sauvinaka ko ya kei Josua kei ira na luve i Isireli.

⁵ A ratou sa soqoni vata ko iratou na nodra tui e lima na luve i Amori, ko tui Jerusalema, ko tui Epironi, ko tui Yarimuci, ko tui Lakisi, kei tui Ekiloni, a ra sa lako cake, ko iratou kei na nodratoui valu kecega, ka laʼki tiko me donui Kipioni, ka veivala kaya.

⁶ A ra sa talaki na kai Kipioni vei Josua ki nai tikotiko mai Kilikali, ka kaya, Me kakua ni berabera na ligamu vei keimami na nomu tamata; mo tei lako kusarawa cake mai vei keimami, ka vakabulai keimami, ka vukei keimami, ni sa soqo vata mai vei keimami na nodra tui kece na luve i Amori era sa tiko mai na ulu-ni-vanua.

⁷ A sa cabe cake mai Kilikali ko Josua, ko koya, kei ira vata kaya na tamatai valu kece, kei na tamatai valu qaqa kecega.

⁸ A sa kaya vei Josua ko Jiova, Mo kakua ni rerevaki ira; niʼu sa soli ira ki na ligamu; ena sega e dua vei ira me tu e matamu.

⁹ A sa lako vakasauri vei ira ko Josua, ni sa lako cake mai Kilikali e na bogi taucoko.

¹⁰ A sa vakagucataki ira ko Jiova e na matadra na Isireli, a ra sa mokuti ira kina e na veiravu levu mai Kipioni, ka cemuri ira e na sala sa lako cake ki Peci-oroni, ka mokuti ira tiko ka yaco ki Aseka kei Maketa.

¹¹ Ia ni ra sa dro tiko e na matadra na Isireli, e na sala sa lako sobu ki Peci-oroni, ka yaco ki Aseka, sa vakatauca tiko vei ira ko Jiova e so na vatu lelevu mai lomalagi, a ra sa mate kina: era sa lewe levu ka mate e na veivatu ni uca-cevata, a ra lewe lailai era vakamatea na luve i Isireli e nai seleiwau.

¹² Ia e na siga ko ya ni sa soli ira na luve i Amori e na matadra na luve i Isireli ko Jiova, sa qai vosa vei Jiova ko Josua, ka kaya e na matadra na Isireli, I Mata-ni-siga, mo tei cegu tu mada mai Kipioni, kei iko, i Vula, mai na buca nei Eyaloni.

¹³ A sa cegu tu na mata-ni-siga, a sa tu vakadua na vula, me ra cudruvaki ira mada eliu ko ira na tamata vei ira na nodra meca. Sa volai vakaoqo e nai vola i Yeseri, ne: A sa tu vakadua na mata-ni-siga mai na loma ni lagi, ka tawa kusarawa me laʼki dromu, ena siga taucoko?

¹⁴ A sa sega eliu se emuri me tauvata kei na siga ko ya, sa vakarorogo kina ko Jiova ki na vosa ni tamata: ni sa totaki ira na Isireli ko Jiova.

¹⁵ A sa lesu ko Josua, kei ira vata kaya na Isireli kecega, ki nai tikotiko mai Kilikali.

¹⁶ A sa dro ko iratou na tui e lima ko ya, ka vuni e na qara-vatu mai Maketa.

¹⁷ A sa tukuni mai vakaoqo vei Josua, Sa kunei na tui e lima eratou a vuni e na qara-vatu mai Maketa.

¹⁸ A sa kaya ko Josua, Dou vaqiqica e so na vatu lelevu ki na gusu ni qara-vatu, ka lesia kina e so na tamata me vakatawai iratou:

¹⁹ ia dou kakua ni berabera; dou tei cicivi ira ga na nomudou meca, ka mokuti ira sa kenai murimuri; kakua ni laivi ira me ra curuma na nodra veikoro, ni sa soli ira ki na ligamudou ko Jiova na nomudou Kalou.

²⁰ Ia ni sa oti na nodra mokuti ira ko Josua kei ira na luve i Isireli e na veiravu levu sara, ka me ra oti mada, sa ra qai laʼki curuma e so na koro kaukauwa ko ira na kedra vo.

²¹ A ra lesu e na vakacegu na tamata kecega ki nai tikotiko kivei Josua mai Maketa: sa sega e vakayavalata na gusuna me vosa vakaca vei ira na luve i Isireli.

²² A sa kaya ko Josua, Dou dolava na gusu ni qara-vatu, ka kauti iratou mai vei au kitautuba mai na loma ni qara-vatu na tui e lima ko ya.

²³ A ra sa kitaka vakakina, ka kauti iratou mai vua mai na loma ni qara-vatu na tui e lima ko ya, ko tui Jerusalema, ko tui Epironi, ko tui Yarimuci, ko tui Lakisi, ko tui Ekiloni.

²⁴ Ia ni ra sa kauti iratou na tui ko ya mai kitautuba vei Josua, sa qai kacivi ira mai kecega na Isireli ko Josua, a sa kaya vei ira na nodra turaga na tamatai valu era sa lako kaya, Dou toro mai, vaca e na yavamudou na domodratou na tui o qo. A ra sa toro mai, ka vaca e na yavadra na domodratou.

²⁵ A sa kaya vei ira ko Josua, Dou kakua ni rere, se yalolailai, dou kaukauwa ka qaqa: ni na cakava vakaoqo ko Jiova vei ira na nomudou meca kecega dou na veivala kaya.

²⁶ A sa oti sa qai mokuti iratou ko Josua, ka vakamatei iratou, ka vakarubeci iratou e na kau e lima: a ratou sa rube tu e na kau ka yacova na yakavi.

²⁷ Ia ni sa laʼki dromu na mata-ni-siga, sa vakarota ko Josua, a ra sa kevutaki iratou mai na kau, ka biuti iratou ki na qara-vatu eratou a vuni kina, ka binia e na gusu ni qara-vatu e so na vatu lelevu, sa tu kina ka yacova na siga o qo.

²⁸ A sa kabati Maketa ko Josua e na siga ko ya, ka yavita e na bati ni seleiwau, ka vakamatea sara na kena tui, o ira, kei na tamata kecega sa tiko kina; sa sega ni laiva e dua me vo tu kina: a sa kitaka ko koya na tui Maketa me vaka ka kitaka na tui Jeriko.

²⁹ A sa lako tani e Maketa ko Josua, kei ira vata kaya na Isireli kecega, ki Lipina, ka veivala kei Lipina:

³⁰ ia o qori talega sa solia ko Jiova, kei na kena tui, ki na ligadra na Isireli; a ra sa yavita e na bati ni seleiwau, kei na tamata kecega sa tiko kina; sa sega ni laiva e dua me vo tu kina; a sa kitaka ko koya na kena tui me vaka ka kitaka na tui Jeriko.

³¹ A sa lako tani e Lipina ko Josua, kei ira vata kaya na Isireli kecega, ki Lakisi, ka tiko vakaivalu kina, ka veivala kaya:

³² a sa soli Lakisi ko Jiova ki na ligadra na Isireli; a ra sa kabata e na kenai karua ni siga, ka yavita e na bati ni seleiwau, kei na tamata kecega sa tiko kina, me vaka na ka kece era a kitaki Lipina kina.

³³ Sa qai lako cake ko Orami na tui Keseri me vukei Lakisi; a sa mokuti koya kei na nona tamata ko Josua, ka tawa laiva e dua me vo tu vua.

³⁴ A sa lako tani e Lakisi ko Josua, kei ira vata kaya na Isireli kecega, ki Ekiloni, ka tiko vakaivalu kina, ka veivala kaya:

³⁵ a ra sa kabata e na siga ko ya, ka yavita e na bati ni seleiwau, ia na tamata kecega sa tiko kina sa vakamatea sara ko koya e na siga ko ya, me vaka na ka kecega ka kitaki Lakisi kina.

³⁶ A sa lako cake mai Ekiloni ko Josua, kei ira vata kaya na Isireli kecega, ki Epironi; a ra sa veivala kaya:

³⁷ a ra sa kabata, ka yavita e na bati ni seleiwau, kei na kena tui, kei na kena koro kece, kei na tamata kecega sa tiko kina; sa sega ni laiva ko koya e dua me vo tu kina; a sa vakarusa sara, kei na tamata kecega sa tiko kina, me vaka na ka kece ka kitaki Ekiloni kina.

³⁸ A sa lesu mai ko Josua, kei ira vata kaya na Isireli kecega, ki Tipiri, ka veivala kaya:

³⁹ a sa kabata ko koya, a ra sa yavita e na bati ni seleiwau na kena tui, kei na kena koro kecega; a ra sa vakamatea sara na tamata kecega sa tiko kina; sa sega ni laiva ko koya e dua me vo tu kina: me vaka ka kitaki Epironi ko koya, sa kitaki Tipiri vakakina, kei na kena tui; me vaka ka kitaki Lipina talega, kei na kena tui.

⁴⁰ A sa samuta ko Josua na vanua vaka-ulu-ni-vanua kecega, kei na vanua sa no vaka ki na ceva, kei na vanua vakabuca, kei na vanua vakamata-ni-wai, kei na nodra tui kecega: sa tawa laiva e dua me vo tu, ka vakamatea sara na ka kecega sa cegu, me vaka ka vakarota ko Jiova na Kalou nei Isireli.

⁴¹ A sa mokuti ira ko Josua ka vakatekivu mai Ketesa-parinea ka yaco ki Kesa, kei na vanua taucoko ko Koseni, ka yaco ki Kipioni.

⁴² A sa rawata kece na turaga o qori ko Josua kei na kedra vanua e na gauna ga ko ya, e na vuku ni sa totaki ira na Isireli ko Jiova na Kalou nei Isireli.

⁴³ A sa lesu ko Josua, kei ira vata kaya na Isireli kecega, ki nai tikotiko mai Kilikali.