Josua 1 - AI VOLA TABU

A WASE I. —Sa lesi ko Josua me tarovi Mosese, 1-9. Ai vakaro i Josua vei ira na tamata, kei na nodra vosa, 10-18.

¹ IA ni sa mate oti ko Mosese nai talatala i Jiova, sa qai vosa ko Jiova vei Josua na luve i Nuni, o koya ka dauqaravi Mosese, ka kaya,

² Sa mate ko Mosese na noqui talatala; ia o qo, mo tu cake, mo lako-kosova na Joritani o qo, ko iko kei ira kecega na tamata o qo, ki na vanua kaʼu na solia vei ira, io vei ira na luve i Isireli.

³ Na tikina kecega ena butuka na qeteqete ni yavamudou, au sa solia vei kemudou, me vaka kaʼu a kaya vei Mosese.

⁴ Me vakatekivu mai na lekutu, mai na Lipanoni o qo talega, ka yacova na uciwai levu, na uciwai ko Uferetisi, na nodra vanua kecega na luve i Eci, ka yacova na wasawasa levu talega sa donuya nai dromudromu ni siga, nai yalayala ni nomudou vanua.

⁵ Ena sega e dua me tu rawa e matamu e na veisiga kecega ko na bula kina: au na tiko kei iko, me vaka kaʼu a tiko kei Mosese: au na sega ni gu ca vei iko, se biuti iko.

⁶ Mo kaukauwa ka qaqa: ni ko na vota vei ira na tamata o qo na vanua kaʼu a vosavavakini kina kivei ira na nodra qase me solia vei ira.

⁷ Mo kaukauwa ka qaqa sara ga, mo vakabauta me cakava me vaka na vunau kecega sa vunautaka vei iko ko Mosese na noqui talatala: mo kakua ni suka tani ki nai matau se nai mawi, mo tamata yaco kina e na yasana kecega ko lako kina.

⁸ Ai vola o qo ni vunau me kakua ni yali e na gusumu; ia mo vakanananu kina e na siga kei na bogi, mo vakabauta kina me cakava me vaka na ka kecega sa volai kina: ni ko na qai kalougata e na nomui valavala, ia ko na qai tamata yaco.

⁹ Au sa vunauci iko oti, ne? mo kaukauwa ka qaqa; mo kakua ni rere, se yalolailai: ni sa tiko kei iko ko Jiova na nomu Kalou e na yasana kecega ko lako kina.

¹⁰ Ia ko Josua, sa vakaroti ira na nodra turaga lalai na tamata, ka kaya,

¹¹ Dou lako yani e na maliwa ni tikotiko, ka vakaroti ira na tamata, ka kaya, Dou vakarautaka vei kemudou na oco; ia ni sa oti na bogi e tolu dou na laʼki kosova na Joritani o qo, me laʼki taukena na vanua sa solia vei kemudou ko Jiova na nomudou Kalou mo dou taukena.

¹² A sa vosa ko Josua vei ira na luve i Rupeni, kei na luve i Kata, kei na dua na wase ni yavusa i Manase, ka kaya,

¹³ Dou vakananuma na vosa sa vunautaka vei kemudou ko Mosese nai talatala i Jiova, ni sa kaya, Sa cakavi kemudou ko Jiova, na nomudou Kalou, mo dou vakacegu, ka sa solia vei kemudou na vanua o qo.

¹⁴ Ko ira na watimudou, ko ira na nomudou lalai, kei na nomudou manumanu e yavai va, era na tikoga e na vanua sa solia vei kemudou ko Mosese e na tai o qo ni Joritani; ia koi kemudou na tamatai valu qaqa kece, dou na vakarau tu ka liutaki ira na wekamudou, ka vukei ira;

¹⁵ me cakavi ira oti mada ko Jiova na wekamudou me ra vakacegu, me vakai kemudou, ka taukena talega ko ira na vanua sa solia vei ira ko Jiova na nomudou Kalou: dou na qai lesu ki na vanua dou sai taukei kina, ka dou na taukena, a ya sa solia vei kemudou ko Mosese nai talatala i Jiova, e na tai o qo ni Joritani, sa qarava nai cadracadra ni siga.

¹⁶ A ra sa vosa vei Josua, ka kaya, Na ka kecega ko sa vunautaka vei keimami keimami na kitaka, ia keimami na lako ki na yasana kecega ko na talai keimami kina:

¹⁷ me vaka sara ni keimami a vakarorogo vei Mosese, keimami na vakarorogo vakakina vei iko: ia me tiko ga kei iko ko Jiova na nomu Kalou, me vaka ni ka tiko ko koya kei Mosese:

¹⁸ ena vakamatei na tamata vakaaduaga sa talaidredre ki na nomu vunau, ka tawa vakarorogo ki na nomu vosa e na ka kece ko sa vakaroti koya kina: mo kaukauwa ka qaqa ga.