Jope 7 - AI VOLA TABU

Sa vaka ko Jope ni sa dodonu na nona via mate, 1-11. Sa didivaka na ka e so vua na Kalou, 12-21.

¹ SA sega beka nai valu me ia na tamata e vuravura? a nona siga sa sega beka ni tautauvata kei na siga ni tamata voli?

² Me vaka ni sa domona sara na malumalu nai talatala, me vaka ni sa namaka tiko nai sau ni nona cakacaka na tamata voli:

³ sa noqui votavota vakakina na veivula wale, a sa lesi vei au na bogi ni vutugu.

⁴ Niʼu sa laʼki koto, au sa kaya, Au na duri ninaica, me oti na bogi? kaʼu sa veivukiyaki kotoga, a sa kida na mataka.

⁵ Sa vakaisulu na lewequ e na baca kei na qele vavaku; sa drakusi na kuliqu, ka boi ca mai.

⁶ Sa ka totolo na noqu siga ka berabera na nonai talitali na dautali sulu, a sa vakaoti ka sega na ka meʼu namaka.

⁷ Mo nanuma ni sa cagi ga na noqu bula: ena sega ni kunea tale na ka vinaka na mataqu.

⁸ A mata i koya sa raici au ena sega ni raici au tale: sa raici au na matamu, ia kaʼu sa qai sega ga.

⁹ Sa seavu na o ka lako tani yani; sa vakakina ko koya sa lako sobu ki nai bulubulu, ena sega ni lako cake tale mai.

¹⁰ Ena sega ni lesu tale mai ki nona vale, ena sega ni kilai koya tale na nona yasana.

¹¹ Ia koi au, kaʼu na sega ni tarova na gusuqu; kaʼu na vosa ni sa yaluma na yaloqu; kaʼu na didi ni sa gaga na lomaqu.

¹² Oi au beka na wasawasa, se na tavuto, mo sa lesia kina nai vakatawai au?

¹³ Niʼu sa kaya, Ena vakalecataki au na noqui mocemoce; ena vakacegui au mai na noqu mate na noqui davodavo;

¹⁴ o sa qai vakarerei au e na tadra, ka vakadomobulataki au e na raivotu:

¹⁵ au sa digitaka kina na kuna kei na mate, ka cata meʼu bula:

¹⁶ au sa vakasisilataka; au sa sega ni via bula tikoga: mo laivi au ga; ni sa ka wale na noqu bula.

¹⁷ A cava na tamata, mo vakalevui koya kina? ka vakananumi koya kina?

¹⁸ ka talevi koya e na sabogibogi kecega, ka vakatovolei koya tikoga?

¹⁹ A cava na kena dede ko sa sega ni gole tani kina vei au, se laivi au tu meʼu tei tiloma mada na noqu weli?

²⁰ Au sai valavala ca; a cava meʼu cakava vei iko, o iko sa daumaroroya na tamata? a cava ko sa lesi au meʼu ka mo vanavana kina, au sa yaco kina meʼu ka bibi vei au vakai au ga?

²¹ Ia ko sa sega ni bokoca na noqu caka cala e na vuku ni cava, ka kauta tani na noqui valavala ca? niʼu na qai koto sobu e na kuvu-ni-soso; ia ko na qarai au e na sabogibogi, ia kaʼu sa yali ga.