Jope 42 - AI VOLA TABU

Sa vakamalumalumutaki koya ko Jope vua na Kalou, 1-6. Sa vunauci iratou na wekana ko koya, a sa vakarota rei Jope me sorovaki iratou, a sa vakadonuya na masu i Jope, 7-10. Sa vakalevulevui Jope na Kalou, 11-15. Sa mate ko Jope ni sa qase sara, 16.

¹ SA qai vosa vei Jiova ko Jope, ka kaya,

² Au sa kila ni ko sa rawata na ka kecega, a sa sega ni tarovi rawa e dua na ka ko sa nanuma.

³ O cei o qo sa vakabutobutotaka na lewa ka yali na vuku? o koya kaʼu a cavuta kina na ka kaʼu a lecava; na ka e veivakidacalataki vei au, a ya kaʼu a tawa kila.

⁴ Mo rogoci au mada, niʼu sa vosa: kaʼu na tarogi iko, ia mo vakatakila mai vei au.

⁵ Kaʼu a rogoci iko e na daligaqu walega: ia ka sa qai raici iko na mataqu:

⁶ o koya o qo kaʼu sa vakasisilataki au kina, ka veivutuni e na kuvu-ni-soso kei na dravusa.

⁷ A sa vakaoqo, ni sa vosataka oti ko Jiova na vosa o qo vei Jope, sa qai kaya ko Jiova vei Elifasi na kai Temani, Sa waqa na noqu cudru vei iko, vei rau talega na wekamu e lewe rua: ni dou sa sega ni vosataki au vakadodonu, me vakataki Jope na noqu tamata.

⁸ O koya o qo mo dou kauta mada kina e vitu na karavau, ka vitu na sipi tagane, ka lako vua na noqu tamata ko Jope, ka cabora nai soro kama e na vukumudou: ena masulaki kemudou ko Jope na noqu tamata, niʼu na vakadonuya na matana: deʼu ia vei kemudou me vaka na nomudou lialia, e na vuku ni dou a sega ni vosataki au vakadodonu me vakataki Jope na noqu tamata.

⁹ Eratou sa qai lako ko Elifasi na kai Temani, kei Pilitati na luve i Sua, kei Sofari na kai Neema, ka cakacaka me vaka na vosa i Jiova vei iratou: a sa vakadonuya na mata i Jope ko Jiova.

¹⁰ A sa saumaka tani na veivakabobulataki kei Jope ko Jiova, ni sa masulaki iratou na wekana: a sa solia vei Jope ko Jiova na ka sa levu cake, ka vakarua, e na ka ka tu vua eliu.

¹¹ Sa qai lako mai vua ko iratou na tacina kecega, kei iratou na ganena kecega, kei ira kece ka ra veikilaki kaya eliu, a ra sa kana madrai kaya e nona vale: a ra sa tagicaki koya, ka vakalecataki koya e na vuku ni ka rarawa kecega sa vakayacora mai ko Jiova: a ra sa dui solia vua e dua na tiki ni siliva, ka dua na sau koula.

¹² A sa vakalougatataka vakalevu ko Jiova na veiyabaki i Jope sa muri, ka vakalailai eliu: ni sa dua na oba ka va na udolu na nona sipi, ka ono na udolu na kameli, ka rua na udolu na karavau, ka dua na udolu na asa alewa.

¹³ A sa vitu na luvena tagane ka tolu na luvena alewa.

¹⁴ A sa vakatoka na yacana na kenai matai, ko Jemaima; kei na yacana nai karua, ko Kesaia; kei na yacana nai katolu, ko Kereni-apuka.

¹⁵ A sa sega ni kune na alewa e na vanua kecega o qori me matavinaka me vaka na luve i Jope: a sa vota vei iratou ko tamadratou nai votavota e na kedra maliwa na ganedratou.

¹⁶ A sa oti o qo sa bula tiko ko Jope ka yabaki e dua na drau ka vasagavulu, ka raici iratou na luvena, kei na luvedratou na luvena, me va nai tabayatamata.

¹⁷ A sa mate ko Jope, ni sa qase mai ka vuqa na nona yabaki.