Jope 4 - AI VOLA TABU

Sa vunauci Jope ko Elifasi, a sa vaka ni sa yaco ga na cudru, ni Kalou vei ira nai valavala ca, 1-11. Sa tukuna na raivotu me malumalumu mai na yalo i Jope, 12-21.

¹ SA qai vosa ko Elifasi na kai Temani, ka kaya,

² Kevaka keitou sa vakatovolea me vosa vei iko, ko na yaloca beka? ia ko cei e tarova rawa na vosa?

³ Raica, ko a vakavulici ira na lewe vuqa, ia ko a dauvakaukauwataka na liga malumalumu.

⁴ A nomu vosa sa dautokoni koya sa kolai bale; o sa dauvakaukauwataka na duru malumalumu.

⁵ Ia o qo sa yacovi iko, ko sa yalowai; sa tauvi iko, ko sa kidroa.

⁶ Sa qai evei na nomu rere, na nomu vakararavi, na nomu nanudei, kei na nomui valavala dodonu?

⁷ Mo nanuma mada, se ko cei e rusa ni sa tawa cala? se muduki laivi maivei na daucaka dodonu?

⁸ E vakaoqo ga na ka kaʼu sa dauraica, o ira era sa daucuki e na caka ca, ka kaburaka nai valavala ca, era sa tamusuka ga na ka ko ya.

⁹ Ni sa ceguvi ira na Kalou era sa rusa, ia e na cegu ni ucuna era sa oti laivi.

¹⁰ Sa mudu mai na tagi ni laioni, kei na domo ni laioni veikata, a sa vorolaki na batidra na luve ni laioni.

¹¹ Sa mate na laioni qase ni sa sega na ka e cova, a ra sa dui vakasesei na luve ni laioni tinatina.

¹² Ia sa tukuni lo mai vei au e dua na ka, a sa rogoca na daligaqu e dua na tikina lailai.

¹³ Niʼu a vakanananu tiko ki na raivotu ni bogi, e na gauna sa dau-biti ira na tamata na moce lutu,

¹⁴ sa tauvi au mai na rere, kei na sautaninini, a sa yavavala kina na suiqu kecega.

¹⁵ Sa qai lako voli e mataqu e dua na yalo; sa tu dodonu na vutika ni yagoqu:

¹⁶ sa wavu tu mai, ia kaʼu sa sega ni kunea rawa na kenai rairai: sa tu e mataqu e dua na raivotu; sa tu lo ga, au sa qai rogoca e dua na domo, sa kaya,

¹⁷ Me dodonu beka na tamata malumalumu, ka cala na Kalou? me savasava beka na tamata, ka tawa savasava ko Koya ka Buli koya?

¹⁸ raica, sa sega ni vakadinati ira na nonai talatala; a sa vakacalai ira na nona agi-lose:

¹⁹ ena qai vakaevei ko ira sa tiko e na vale qele, a nodra yavu na kuvu-ni-soso, era sa butuqaqi e na mata ni sara-sara?

²⁰ era sa vurumemei tu mai na mataka ka yaco ki na yakavi: era sa yali laivi tu ga ka sega e nanuma kina:

²¹ e dautakali vei ira na kedra vinaka, se segai? era sa ciba, ia ka sa sega na nodra vuku.