Jope 31 - AI VOLA TABU

Sa vaka ko Jope ni sa dautorovi koya sara ko koya mai nai valavala tawa dodonu.

¹ AU sa ia oti na veiyalayalati kei na mataqu; meʼu qai via nanuma vakacava e dua na gonealewa?

² Me qai cava na noqui votavota mai vua na Kalou maicake? ka cava na ka kaʼu na taukena maivei Koya na Kaukauwa mai lomalagi?

³ Sa sega beka ni yacovi ira nai valavala ca na rusa? kei na ka tani vei ira na tawa caka dodonu?

⁴ Sa sega beka ni raica na noqui lakolako ko koya, ka wilika kecega nai cavucavu ni yavaqu?

⁵ Kevaka kaʼu a muria na ka lasu, se kusarawa na yavaqu me vei vakaisini;

⁶ meʼu vakatovolei mada e nai vakatatovotovo dodonu, me kila kina na Kalou na noqu tawa cala.

⁷ Kevaka sa lako tani e na sala na yavaqu, ka muria na mataqu na lomaqu, ka kabita na ligaqu e dua na ka qeleqelea;

⁸ meʼu qai teitei koi au, ka dua tani me kania: ia me cavuivuvu na noqu kawa.

⁹ Kevaka sa kauti vakatani na lomaqu vua e dua na alewa; seʼu lawa koto mai na nona katuba na kai noqu;

¹⁰ me qai qaqi sila na watiqu vua e dua tani, me so tani talega me koto kaya.

¹¹ Ni sa ka ca sara o qo, io, nai valavala ca me ra cudruva ko ira na dauveilewai.

¹² Ni sa buka o qori sa katia me yacova na rusa, sa na cavuivuvu kina na noqui yau kecega.

¹³ Kevaka kaʼu a beca na ka ni noqu tamata se na noqu vada, ni rau sa veileti kei au;

¹⁴ kaʼu na qai vakaevei ni sa tu cake na Kalou? ia ni sa cudru ko koya, a cava meʼu kaya vua?

¹⁵ O koya sa buli au e na kete, sa sega beka ni buli koya talega? sa sega beka ni dua bau sa cakavi keirau e na kete?

¹⁶ Kevaka kaʼu sa bese ni solia na ka era domona na dravudravua, seʼu vakaoca na matana na alewa dawai;

¹⁷ seʼu kania duadua na kequ tiki ni kakana, me keirau sega ni kania kaya na luveniyali;

¹⁸ (Ni sa tubu vata kei au mai na gauna kaʼu a cauravou kina, me vaka kei tamana, ia kaʼu sa tuberi koya na alewa dawai mai na siga ni noqu sucu;)

¹⁹ kevaka kaʼu sa kunea e dua sa mate e na vuku ni sa sega na nonai sulu, so dua na dravudravua sa sega na ka me ubi kina:

²⁰ kevaka sa sega ni vosavakalougatataki au na tolona; ka sega ni katakata ko koya e na vutika ni noqu sipi;

²¹ kevaka kaʼu sa dodoka cake vakaca na ligaqu vei ira na luveniyali, niʼu sa kila ni keitou sa kaukauwa mai na matamata-ni-koro:

²² me qai lutu tani na ligaqu mai na civaciva ni tabaqu, ka ramusu na ligaqu mai na suina.

²³ Niʼu a domobula de vakarusai au na Kalou; ia e na vuku ni kena cecere, kaʼu a sega ni rawata.

²⁴ Kevaka kaʼu a vakararavi ki na koula, se kaya ki na koula talei, Kaʼu sa vakadinati iko;

²⁵ kevaka kaʼu a reki e na vuku niʼu sa vutuniyau sara, ni sa rawata nai yau levu na ligaqu;

²⁶ kevaka kaʼu a raica na mata-ni-siga ni sa cila mai, se na vula ni sa weweli lako;

²⁷ ka sa dauveretaki lo na lomaqu, se reguca na ligaqu na gusuqu:

²⁸ o qo talega nai valavala ca me ra cudruva ko ira na dauveilewai: niʼu a qai cakitaki koya na Kalou maicake.

²⁹ Kevaka kaʼu a reki ni sa rusa ko koya sa cati au, se vakalevulevui au ni sa kune ka ca ko koya:

³⁰ ia kaʼu a sega ni laiva na gusuqu mo vosa cala, niʼu a rukaka na yalona.

³¹ Kevaka era sa sega ni kaya ko ira na noqui tikotiko, O cei e so me tawa vakamamautaki e na nona kakana?

³² Sa sega ni moce mai tautuba na vulagi: au a dolava na noqu katuba vua sa taubale e vanua.

³³ Kevaka kaʼu sa ubia na noqu talaidredre me vakataki Atama, niʼu sa vunia na noqui valavala ca e lomaserequ:

³⁴ seʼu rerevaki ira beka na lewe vuqa, seʼu vakadomobulataki e na nodra be na veimataqali, meʼu tiko lo kina, ka sega ni curu yani e na katuba?

³⁵ Me dua mada me rogoci au! raica, o qo na ka kaʼu domona, me vosa mada mai vei au ko Koya sa Kaukauwa, me sa vola talega nai vola na noqu meca.

³⁶ E dina kaʼu na qai colata e na noqui colacola, ka vauca vei au me noqui sala vakaturaga.

³⁷ Kaʼu na qai tukuna vua nai wiliwili ni cavucavu ni yavaqu; kaʼu na qai toro voleka vua me vaka na turaga.

³⁸ Kevaka sa qoqolou vei au na noqu were; se tagi vata kei na kena bukebuke;

³⁹ kevaka kaʼu sa kania na vuana ni sa sega ni volitaki, se kitaki ira na kenai taukei me ra mate;

⁴⁰ mo qai tubu na kau votovotoa mei sosomi ni witi, kei na borosou mei sosomi ni parile. Sa oti na vosa i Jope.