Jope 21 - AI VOLA TABU

Sa tukuna ko Jope ni sa sega ni ka wale na nona rarawa, 1-6. Sa sautu e na siga e so ko ira era beca na Kalou, 7-15; ia ka sa daukilai talega na nodra rusa, 16-21. Sa tukuna na lewa ni Kalou ni sa vuqa na kenai valavala, 22-26. Era na lewai emuri nai valavala ca, 27-34.

¹ A SA vosa ko Jope, ka kaya,

² Dou vakarorogo vakavinaka ki na noqu vosa, ia me sa nomudou veivakacegui na ka ga o qo.

³ Dou vosoti au mada meʼu vosa; ia niʼu sa vosa oti, dou qai ia tiko na veivakalialiai.

⁴ Oi au beka, au sa ia na tagi vua na tamata? ia ke sa vakakina me sa tawa rarawa na yaloqu e na vuku ni cava?

⁵ Dou raici au mada, ka kurabui, ka tabonaka na gusumudou.

⁶ Niʼu sa vakananuma tiko kaʼu sa kidroa, a sa tauva na lewequ na sautaninini.

⁷ A cava era sa bula tiko kina nai valavala ca, ka yaco me qase, ka vutuniyau mai?

⁸ Era sa vakataudeitaki vata kei na nodra kawa e matadra, kei na luvedra talega e matadra:

⁹ sa ruru na nodra vale mai na rere, a sa sega ni tauci ira na kuita ni Kalou.

¹⁰ Sa rika na nodra karavau tagane, a sa yaco ga; sa vakasucu na nodra karavau alewa, a sa sega ni lutudole na luvena.

¹¹ Era sa tala yani na nodia lalai me vaka na qele ni sipi, a ra ia na qito na luvedra.

¹² Era sa taura na lali kei na api, ka rekitaka na domo ni kove.

¹³ Era vakaotia na nodra siga e na marau, ka lako sobu vakasauri ki nai bulubulu.

¹⁴ O koya o qo era sa kaya kina vua na Kalou, Lako tani vei keitou; ni keitou sa sega ni via kila na nomu sala.

¹⁵ A cava ko Koya sa Kaukauwa, me keitou qaravi koya? a cava talega na betena vei keitou, kevaka keitou masu vua?

¹⁶ Raica, era sa sega ni veitaliataka na nodra ka vinaka: me yawa vei au na nodra lewa nai valavala ca!

¹⁷ Sa bokoci vakavica na nodra cina nai valavala ca! a sa yacovi ira vakavica na veivakarusai! sa vota na rarawa vei ira e nona cudru.

¹⁸ Era sa vaka na vu-ni-sila e na mata ni cagi, ka vaka na qa-ni-sila sa kauta tani na cava.

¹⁹ Sa maroroya na Kalou na nonai valavala ca me kedra na luvena: sa sauma vua ko koya, ena kunea talega ko koya.

²⁰ Sa na kunea na matana na nona rusa, ia ena gunuva ko koya na cudru i Koya sa Kaukauwa.

²¹ Ni na vinakata vakaevei ko koya na nona mataqali sa muri koya, ni sa muduki laivi na nona bula?

²² Sa dua beka me vakavulici koya na Kalou me vuku? ia sa daulewai ira era sa cecere.

²³ Sa mate e dua ni sa yagokau-kauwa sara, ni sa tiko vakasautu ka vakacegu.

²⁴ A sucuna sa to sara e na wai-ni-sucu, a sa suasua na suina e na uto-ni-sui.

²⁵ A sa mate e dua ni sa rarawa na yalona, a sa sega ni kana oti e na vakacegu.

²⁶ Era na koto vata e na kuvu-ni-qele, ka ubi ira na baca.

²⁷ Raica, kaʼu sa kila na ka dou sa nanuma, kei na nomudou vakasama me vereti au vakaca.

²⁸ Ni dou sa kaya, Sa evei na nona vale na turaga? sa evei na nodrai tikotiko nai valavala ca?

²⁹ Dou a sega beka ni tarogi ira era sa lako voli yani e na sala? dou sa sega beka ni kila na nodrai vakatakilakila,

³⁰ ni sa maroroi ki na siga ni rusa na tamata ca? era na kauti yani ki na siga ni cudru.

³¹ O cei me tukuna ki matana na nonai valavala? ia ko cei me sauma vua na ka sa cakava ko koya?

³² Ena kauti ga ki nai bulubulu ko koya, a ra na yadrava na nona mara.

³³ Ia na qele e na buca ena kamikamica vua, ena yarataki ira na tamata kecega me muri koya, me vaka sa ra tawa wili rawa era liutaki koya.

³⁴ Ia sa ka wale sara na nomudou vakacegui au, ni sa tiko na lasu e na nomudou vosa.