Jope 2 - AI VOLA TABU

Sa yacovi Jope e dua na mate ca, 1-8. A watina sa vosa vakatani vua, a sa vunauca ko Jope, 9, 10. Sa lako mai ko iratou na wekana e lewe tolu me vakacegui koya, 11-13.

¹ A SA dua na siga era sa lako mai kina na luve ni Kalou me vakatakilai ira e na mata i Jiova, a sa lako mai kei ira ko Setani talega me vakatakilai koya e na mata i Jiova.

² A sa kaya ko Jiova vei Setani, O sa lako maivei? A sa vosa vei Jiova ko Setani, ka kaya, Mai na veilakoyaki e vuravura, kei na veigadeyaki voli kina.

³ A sa kaya vei Setani ko Jiova, O sa sega beka ni vakanananu ki na noqu tamata ko Jope, ni sa sega e tautauvata kaya e vuravura, a tamata yalododonu ka daucaka dodonu, a sa rerevaka na Kalou, ka tawa torova na ca? ia ko sa kitaki au meʼu vakarusai koya walega, a sa taura matua tikoga ko koya na nona yalododonu.

⁴ A sa vosa vei Jiova ko Setani, ka kaya, A kuli mei sau ni kuli, ia na nona ka kecega ena solia na tamata me bula kina.

⁵ Ia mo qai dodoka ga na ligamu, ka tara na suina kei na lewena, ena qai vosavakacacataki iko ki matamu.

⁶ A sa kava vei Setani ko Jiova, Raica, sa soli ki ligamu ko koya; ia mo kakua ga ni vakamatea.

⁷ A sa lako tani ko Setani e na mata i Jiova, ka yaviti Jope e na vidikoso, mai na qeteqete ni yavana ka cavaraka na buradelana.

⁸ A sa taura ko koya nai caca ni bilo me kari koya kina; a sa laʼki tiko ki loma ni dravu.

⁹ Sa qai kaya vua ko na watina, O sa taura matua beka tiko na nomu yalododonu? mo vosavakacacataka na Kalou, mo mate.

¹⁰ A sa kaya vua ko koya, O iko ko sa vosa me vaka e dua na alewa lialia. E vakaevei le? me da rawata beka na ka vinaka vua na Kalou, me da kakua beka talega ni rawata na ka ca? E na ka kecega o qo sa sega ni cala ko Jope e na tebenigusuna.

¹¹ Ia ko iratou na weka i Jope e lewe tolu, ni ratou sa qai rogoca na ka rarawa kecega o qo sa yaco vua, eratou sa dui lako yadua mai na nona yasana: o Elifasi na kai Temani, kei Pilitati na luve i Sua, kei Sofari na kai Neema: ni ratou sa lokuca vata na siga me ratou lako mai kina me tagi vata kaya ka vakalecataka.

¹² Ia ni ratou sa ta cake e na matadratou ni sa yawa tu, eratou sa sega ni kilai koya, a ratou sa tabalaka na domodratou, ka tagi; a ratou sa dui dresulaka na nonai sulu, ka kaburaka na kuvu-ni-soso ki na uludratou kivaka ki lomalagi.

¹³ A ratou sa tiko sobu kaya e na qele me oti na siga e vitu kei na bogi e vitu, a sa sega e dua sa cavuta vua e dua na vosa: ni ratou sa kunea ni sa levu sara na nona rarawa.