Jope 18 - AI VOLA TABU

Sa cavuti Jope ko Pilitati me yaloviavialevu ka yalolekaleka, 1-4. Sa tukuna tale na ca ena yacovi ira nai valavala ca, 5-21.

¹ SA qai vosa ko Pilitati na luve i Sua, ka kaya,

² O na vakaotia ninaica na vosa? mo vakarorogo mai, keitou na qai vosa.

³ A cava keitou sa nanumi kina me manumanu; ka vakasauri me ka qeleqelea e matamu?

⁴ Sa dresulaki koya e nona cudru: ena biu laivi beka ko vuravura e na vukumu? se na kauti beka tani na uluvatu mai na kena yasana?

⁵ Ia na nodra rarama nai valavala ca ena bokoci; ena sega talega ni serau na lidi ni nona buka.

⁶ Ena butobuto na rarama e na nona vale malo, ena bokoci vata kaya talega na nona cina.

⁷ A nona lako vakaukauwa ena vakaosoosotaki mai, ena vakabalei koya talega na nona lewa.

⁸ Ni sa biuti ki na lawa ko koya e na vuku ni yavana dina ga, sa lako voli tu e na dela ni cori.

⁹ Ena rawai koya na tudai e na bukubuku-ni-yavana; ena gumatua vua ko koya na daubutako.

¹⁰ Sa vuni e na, qele na kenai cori, kei na kenai soki e na sala.

¹¹ Ena vakarerei koya na ka rerevaki e na veiyasana, ka vakidroataka na yavana.

¹² Ena kania na nona kaukauwa na viakana, ena volekata sara na sarisarina na rusa;

¹³ ena kania na kaukauwa ni kulina: a ulumatua kei mate ena kania na luvena.

¹⁴ A ka sa vakararavi kina ena cavuivuvu mai na nona vale malo, ena vakasavi koya vua na tui dauveivakarerei.

¹⁵ Ena tiko ga o qori e nona vale, e na vuku ni sa sega ni nona: ena mimiraci mai na sulifure ki nonai tikotiko.

¹⁶ Ena malai na wakana kira, ka tamusuki laivi na tabana kicake.

¹⁷ Ena yali na ka e nanumi kina e vuravura, ena sega talega na yacana e na salatu.

¹⁸ Ena vakasevi mai na rarama ki na butobuto, ena vakasesei tani e vuravura.

¹⁹ Ena sega na luvena se nona kawa vei ira na nona mataqali, ena sega talega e vo tiko e nonai tikotiko.

²⁰ Era na kidacalataka na nona gauna ko ira emuri, me vaka era tauvi rere ko ira eliu.

²¹ Sa vaka dina ga o qo na nodrai tikotiko na tamata ca, a sa vakaoqo na yasana i koya sa sega ni kila na Kalou.