Jope 10 - AI VOLA TABU

Sa vosa vua na Kalou ko koya e na vuku ni nona rarawa, a sa kere me vakacegui vakalailai mada ni sa bera na mate.

¹ SA oca na lomaqu e na vuku ni noqu bula; au na laivi au meʼu didi walega; au na vosa ni sa rarawa na yaloqu:

² au na kaya vua na Kalou, Mo kakua ni vakacalai au; mo vakatakila vei au se cava ko sa veileti kina kei au.

³ Sa vinaka beka vei iko mo ia na veivakararawataki, mo beca talega na cakacaka ni ligamu, ka cilava na nodra bose nai valavala ca?

⁴ O iko beka ko sa mata vakayago? se ko raica beka me vaka sa raica na tamata?

⁵ Sa tautauvata beka na nomu siga kei na siga ni tamata? se tautauvata na nomu, veiyabaki kei na veisiga ni tamata,

⁶ mo sa vakataroga kina na noqu cala, ka vakasaqara na noqui valavala ca?

⁷ O sa kila niʼu sa sega ni tamata ca; a sa sega e dua e vakabula rawa mai na ligamu.

⁸ Sa oca na ligamu ni mataitaki au, sa cakava kece na tikiqu me vinaka vata; ia ko sa vakarusai au ga.

⁹ Mo nanuma mada, ni ko sa buli au me vaka na qele-ni-kuro; ia ko na vakalesui au tale beka me kuvu-ni-soso?

¹⁰ O sa livi au yani mei vaka na wai-ni-sucu, ka buli au me vaka nai buli wai-ni-sucu, se segai?

¹¹ O sa vakaisulutaki au e na kuliqu kei na lewequ, ka viribaiti au e na suiqu kei na ua.

¹² O sa solia vei au na bula kei nai loloma, ia na nomu dauraici au na ka sa maroroi kina na yaloqu.

¹³ Ia na ka o qo ko sa vunia e lomamu: au sa kila ni sa tiko vei iko na ka o qori.

¹⁴ Kevaka kaʼu sai valavala ca, ko sa qai dikevi au, o na sega talega ni vakadonui au mai na noqu caka ca.

¹⁵ Kevaka kaʼu sai valavala ca, kaʼu na ca; ia kevaka kaʼu sa caka dodonu, kaʼu na sega ga ni ta cake e na uluqu. Au sa kidroa sara; ia mo raica na noqu rarawa;

¹⁶ ni sa tubu ga. O sa vakasavi au me vaka na laioni daukata: ia ko sa baki lesu vakidacala tale mai vei au.

¹⁷ O sa daulesia na nomu ka vou e so me tukuni au vakaca, o sa vakalevutaka na nomu cudruvi au; sa dauyaco vei au na ka vou kei nai valu.

¹⁸ A cava ko a kauti au kina mai na kete? keʼu a ciba, ka tawa kunei au e dua na mata, ke sa vinaka.

¹⁹ Kaʼu a qai vaka niʼu a sega ga, kaʼu a sa qai colati mai na kete ki nai bulubulu.

²⁰ Sa ka lailai, se sega, na noqu siga? mo cegu, laivi au ga, meʼu vakacegu vakalailai mada,

²¹ meʼu qai lako yani ka sega ni lesu tale mai, ia ki na vanua butobuto kei na yaloyalo ni mate;

²² na vanua butobuto, me vaka na butobuto dina ni yaloyalo ni mate, a sa sega ni caka vinaka, a sa vaka na butobuto na kena rarama.