Jope 1 - AI VOLA TABU

A WASE I. —Sa yalododonu sara ka vutuniyau ko Jope, 1-3. Sa daumasulaki iratou na luvena, 4, 5. Sa kere ko Setani me vakatovolei koya, 6-12. Sa yali na nonai yau kei na luvena, 13-19. Ni sa tagi, sa vakavinavinaka vua na Kalou, 20-22.

¹ SA dua na tamata mai na vanua ko Usi, na yacana ko Jope; ia na tamata ko ya sa yalododonu ka daucaka dodonu, a sa rerevaka na Kalou, ka tawa torova na ca.

² A sa sucu vua e vitu na luvena tagane ka tolu na luvena alewa.

³ Ia na nonai yau sa vitu na udolu na sipi, ka tolu na udolu na kameli, ka dua na udolu na karavau, ka lima na drau na asa alewa, a sa ka tani na nona lewe ni vale; a sa levu cake kina na tamata ko ya vei ira kecega na lewe ni vanua mai cake.

⁴ A sa lako ko iratou na luvena tagane, ka ia na solevu e nodratou veivale, yadua e nona siga; a ratou sa talaki ka kaciva mai na ganedratou e lewe tolu me mai kana ka gunu vata kei iratou.

⁵ Ia ni sa oti na veisiga ni solevu, sa qai talaki ko Jope ka vakasavasavataki iratou, ka sou e na sabogibogi, ka cabora nai soro kama me vaka na kedratoui wiliwili kecega: ni sa kaya ko Jope, De sai valavala ca ko iratou na luvequ, ka vosavakacaca vua na Kalou e lomadratou. A sa daukitaka vakaoqo ko Jope.

⁶ Ia ka sa dua na siga era sa lako mai kina na luve ni Kalou me vakatakilai ira e na mata i Jiova, a sa lako talega mai kei ira ko Setani.

⁷ A sa kaya ko Jiova vei Setani, O sa lako maivei? A sa vosa vei Jiova ko Setani, ka kaya, Mai na dauveilakoyaki e vuravura, kei na veigade-yaki voli kina.

⁸ A sa kaya ko Jiova vei Setani, O sa sega beka ni vakanananu vua na noqu tamata ko Jope, ni sa sega e tautauvata kaya e vuravura, a tamata yalododonu ka daucaka dodonu, a sa rerevaka na Kalou, ka tawa torova na ca?

⁹ Sa qai vosa vei Jiova ko Setani, ka kaya, Sa tawa yaga li vei Jope na nona rerevaka na Kalou?

¹⁰ O sa sega beka ni viribaiti koya, kei na nona vale, kei na nona ka kece e na veiyasana kecega? o sa vakalougataka na cakacaka ni ligana, a sa tubu me ka levu na nonai yau e na vanua:

¹¹ ia mo dodoka mada na ligamu, ka tara na nona ka kecega, ena qai vosavakacacataki iko ki matamu.

¹² A sa kaya vei Setani ko Jiova, Raica, sa soli ki ligamu na nona ka kecega; ia mo kakua ga ni dodoka na ligamu vei koya. A sa lako tani ko Setani mai na mata i Jiova.

¹³ A sa dua na siga eratou sa kana kina ka gunu waini ko iratou na luvena tagane kei na luvena alewa e na vale nei tuakadratou na ulumatua:

¹⁴ a sa lako mai e dua nai talaki vei Jope, ka kaya, Era a cuki were tu e nai sivi yara na karavau, a ra sa kana voleka kina na asa:

¹⁵ a sa lutuki ira ko ira na kai Sipa, ka kauti ira tani, a ra sa vakamatei ira na cauravou e na bati ni seleiwau; ia koi au ga kaʼu sa dro bula duaduaga me tukuna vei iko.

¹⁶ Ni sa vosa tiko ko koya, sa lako talega mai e dua tani tale, ka kaya, Sa lutu mai lomalagi na buka waqa ni Kalou, a sa vakacaudrevi ira na sipi, kei ira na cauravou, sa kani ira sara; ia koi au ga kaʼu sa dro bula duaduaga me tukuna vei iko.

¹⁷ Ni sa vosa tiko ko koya, sa lako talega mai e dua tani tale, ka kava, Era lesia na mataivalu e tolu ko ira na kai Kalitea, ka lutuki ira na kameli, ka kauta tani a ra sa mokuti ira na cauravou e na bati ni seleiwau; ia koi au ga kaʼu sa dro bula duaduaga me tukuna vei iko.

¹⁸ Ni sa vosa tiko ko koya, sa lako talega mai e dua tani tale, ka kaya, Sa kana ka gunu waini ko iratou na luvemu tagane kei na luvemu alewa mai na vale ni tuakadratou na ulumatua:

¹⁹ ka, raica, sa yaco mai e dua na cagi levu mai lekutu, a sa roba na tutu ni vale e va, a sa baleti ira na cauravou, a ra sa mate; ia koi au ga kaʼu sa dro bula duaduaga me tukuna vei iko.

²⁰ Sa qai tu cake ko Jope, ka dresulaka na nonai sulu, ka tasia na uluna, ka bale ki na soso, ka masu,

²¹ ka kaya, Au a luvawale niʼu a lako mai na kete i tinaqu, au na luvawale talega niʼu sa suka kikea: sa solia ko Jiova, a sa kauta tani ko Jiova; me vakavinavinakataki ga na yaca i Jiova.

²² E na ka kecega o qo sa sega ni valavala ca ko Jope, se kaya me cala na Kalou.