Joni 9 - AI VOLA TABU

Sa Vakabula na tamata sa sucu mataboko ko Jisu; a ra sa cudru kina na Farisi, ka vakasava tani na tamata, a sa vunauci ira ko Jisu, 1-41.

¹ IA ni sa lako yani ko koya, sa raica e dua na tamata sa sucu mataboko.

² A sa tarogi koya ko iratou na nona tisaipeli, ka kaya, Vakavuvuli, o cei sa valavala ca, a tamata o qo, se tamana kei tinana, sa sucu mataboko kina ko koya?

³ Sa kaya ko Jisu, Sa sega ni valavala ca ko koya o qo, se tamana kei tinana, a ya ga me vakatakilai na cakacaka ni Kalou e na vukuna.

⁴ Sa dodonu meʼu kitaka na cakacaka i koya sa talai au mai, ni sa siga toka: sa voleka mai na bogi, sa sega ni cakacaka rawa kina e dua na tamata.

⁵ Niʼu sa tiko e vuravura, au sa rarama kei vuravura.

⁶ Ni sa vosa vakaoqo ko koya, sa kasivita na qele, ka cakava na soso e nai kasivi, a sa boroya na mata ni tamata mataboko e na soso,

⁷ a sa kaya vua, Laʼki tavoi e nai silisili ko Seiloami, (a kenai balebale, Sa talaki.) A sa lako yani, ka tavoi, ka tale mai ka rai rawa.

⁸ Era sa qai kaya kina na lewe ni koro, kei ira sa raici koya eliu ni sa mataboko tu, Sa sega li ni sai koya o qo sa dautiko ka daukerekere?

⁹ Sa kaya e so, Sai koya o qo: ka so tani, Sa vakataki koya: sa kaya ko koya, Sai au ga.

¹⁰ Era sa qai kaya vua, Sa rai rawa vakaevei li na matamu?

¹¹ Sa vosa ko koya, ka kaya, E dua na tamata sa vakatokai ko Jisu sa cakava na soso, ka boroya na mataqu, ka kaya vei au, Lako ki nai silisili ko Seiloami, ka tavoi: ia kaʼu a laʼki tavoi, kaʼu sa qai rai rawa.

¹² Era sa qai kaya vua, Evei ko koya? Sa kaya ko koya, Au sa sega ni kila.

¹³ Era sa qai kauti koya ka mataboko eliu vei ira na Farisi.

¹⁴ Ia sa siga ni vakacecegu sa cakava kina na soso ko Jisu, ka basuka na matana.

¹⁵ Era sa qai tarogi koya tale na Farisi, se sa rai rawa vakaevei. A sa kaya vei ira ko koya, Sa boroya na mataqu ko koya e na soso, kaʼu sa tavoi, kaʼu sa qai rai rawa.

¹⁶ E so vei ira na Farisi era sa qai kaya, A tamata o qo sa sega ni mai vua na Kalou, ni sa sega ni vakatabuya na siga ni vakacecegu. E so tani sa kaya, E cakava rawa vakaevei na caka-mana vakaoqo e dua na tamatai valavala ca? A ra sa sega ni lomavata.

¹⁷ Era sa kaya tale vua na tamata ka mataboko, A cava ko sa kaya e na vukuna, ni sa basuka na matamu? A sa kaya ko koya, A parofita ko koya.

¹⁸ Ia ko ira na kai Jutia era sa sega ni vakadinata, ni ka mataboko eliu ko koya, a sa rai rawa, ka ra sa kacivi rau mada na tama i koya sa mai rai rawa, kei na tinana:

¹⁹ a ra sa tarogi rau, ka kaya, A luvemudrau o qo, drau sa kaya sa sucu mataboko, ne? sa qai rai rawa vakaevei o qo?

²⁰ Erau sa vosa ko tamana kei tinana vei ira, ka kaya, Keirau sa kila ni sa luve i keirau o qo, ka sucu mataboko:

²¹ ia keirau sa sega ni kila se sa rai rawa vakaevei o qo; se ko cei sa basuka na matana, keirau sa sega ni kila: sa tamata bula ko koya; taroga: ena tukuni koya ko koya.

²² Erau sa vosa vakaoqo ko tamana kei tinana, e na vuku ni rau sa rerevaki ira na kai Jutia: ni ra sa bose vata oti na kai Jutia, me vakatatabui mai na vale ni lotu ko koya yadua sa vakatusa ni sai Karisito ko koya o qo.

²³ A ka o qo erau sa kaya kina ko tamana kei tinana, Sa tamata bula ko koya; taroga.

²⁴ Era sa qai kaciva tale na tamata ka mataboko, ka kaya vua, Vakarokorokotaka na Kalou: keitou sa kila ni sa tamatai valavala ca ko koya o qori.

²⁵ Sa vosa ko koya, ka kaya, Au sa sega ni kila, se na tamatai valavala ca ko koya, se segai: e dua na ka kaʼu sa kila, niʼu a mataboko eliu, au sa qai rai rawa.

²⁶ Era sa qai kaya tale vua, A cava ka kitaka vei iko ko koya? ka basuka vakaevei li na matamu?

²⁷ Sa kaya vei ira ko koya, Au sa tukuna oti mada vei kemudou, ia dou a sega ni vakarogoca: dou sa via rogoca tale e na vuku ni cava? dou sa vinakata beka mo dou yaco talega me nona tisaipeli, ne?

²⁸ Era sa qai vakalialiai koya, ka kaya, O iko sa nona tisaipeli; ia koi keitou, keitou sa tisaipeli i Mosese.

²⁹ Keitou sa kila ni sa vosa vei Mosese na Kalou; ia na tamata o qo, keitou sega ni kila se sa lako maivei ko koya.

³⁰ Sa vosa na tamata, ka kaya vei ira, E dua na ka vakurabui o qo, ni dou sa sega ni kila se sa lako maivei ko koya, a sa basuka na mataqu ko koya.

³¹ Ia eda sa kila ni sa sega ni rogoci ira na tamatai valavala ca ko na Kalou; ia kevaka sa daumasu vua na Kalou e dua na tamata, ka kitaka na nona veitalia, sa rogoci koya o qo ko koya.

³² Sa sega ni rogoci mai nai vakatekivu kei vuravura, ni sa dua sa basuka na matana e dua sa sucu mataboko.

³³ Kevaka sa sega ni lako mai vua na Kalou ko koya o qo, sa sega ni rawata e dua na ka.

³⁴ Era sa vosa, ka kaya vua, O iko ko sa sucu sara e nai valavala ca, ia ko sa vakatavulici keitou, ne? A ra sa vakasavi koya tani.

³⁵ Sa rogoca ko Jisu ni ra sa vakasavi koya tani: ia ni sa kunei koya, sa kaya vua, O sa vakabauta na Luve ni Kalou, ne?

³⁶ Sa vosa ko koya, ka kaya, O cei ko koya, Turaga, meʼu vakabauti koya?

³⁷ A sa kaya vua ko Jisu, O sa raici koya oti, ia sai koya drau sa veivosaki kaya.

³⁸ Sa qai kaya ko koya, Turaga, au sa vakabauta. A sa cuva vua.

³⁹ A sa kaya ko Jisu, Au sa lako mai ki vuravura o qo meʼu lewa, me ra rai rawa ko ira sa sega ni rai rawa, ia me ra mataboko ko ira sa rai.

⁴⁰ E so vei ira na Farisi sa tiko kaya era sa rogoca na veika o qo, a ra sa kaya vua, Sa mataboko beka koi keitou talega?

⁴¹ Sa kaya vei ira ko Jisu, Kevaka dou sa mataboko, sa sega ni wili na nomudou ca; ia dou sa qai kaya, Keitou sa rai; sa wili kina na nomudou ca.