Joni 8 - AI VOLA TABU

A yalewa sa dautagane, 3-11. Sa kaya ko Jisu ni sa rarama kei vuravura ko koya; a sa vakadinadinataka na nana vosa, 12-32. Sa veivosaki ko Jisu kei ira na Farisi, 33-59.

¹ A SA lako ko Jisu ki na ulu-ni-vanua ni veiolive.

² Ia e na mataka caca sa lako tale mai ko koya ki na vale ni soro, a ra sa lako mai vei koya ko ira kecega na tamata; a sa tiko sobu ko koya, ka vakavulici ira.

³ Ia ko ira na vu-ni-vola kei ira na Farisi era sa kauta mai vei koya e dua na yalewa sa kunei ni sa dautagane; a ra sa vakatikori koya e na kedra maliwa,

⁴ a ra sa kaya vua, Vakavuvuli, sa kunei na yalewa o qo ni sa dautagane, ni sa ia tiko:

⁵ a sa vosa vei keda ko Mosese e na vunau, me ra viriki e na vatu ko ira sa vakaoqo: ia ka cava ko sa kaya?

⁶ Era sa kaya na ka o qo me dauveretaki koya kina, me ra beitaki koya rawa. A sa cuva sobu ko Jisu, ka vola na soso e na nonai qaqalo.

⁷ Ia ni ra sa tarogi koya tikoga, sa tu cake ko koya, ka kaya vei ira, O koya vei kemudou sa sega ni valavala ca, me viriki koya mada eliu e na vatu.

⁸ Sa qai cuva sobu tale ko koya, ka vola na soso.

⁹ Ia ni ra Sa rogoca, ka sa beitaki ira ko na lomadra, era sa lako yadua ki tuba, sa liu na qase ka muri kecega na tamata: ka tiko duaduaga ko Jisu, a sa tu na yalewa e matana.

¹⁰ Ia ni sa tu cake ko Jisu, ka sega ni raica e dua, na yalewa duaduaga, sa kaya vua, Yalewa, sa evei ko ira o qori ka beitaki iko? sa sega e dua sa lewai iko mo cudruvi, ne?

¹¹ A sa kaya ko koya, Sa sega e dua, Turaga. A sa kaya vua ko Jisu, Au sa sega talega ni lewai iko mo cudruvi: lako, ka kakua ni valavala ca tale.

¹² Sa qai vosa tale vei ira ko Jisu, ka kaya, Oi au na rarama kei vuravura: o koya sa muri au ena sega ni lako e na butobuto, ena tu ga na rarama ni bula vei koya.

¹³ O ira na Farisi era sa qai kaya vua, O sa tukuni iko; sa sega ni dina na nomui tukutuku.

¹⁴ Sa vosa ko Jisu, ka kaya vei ira, Kevaka kaʼu sa tukuni au, sa dina na noqui tukutuku: niʼu sa kila na vanua kaʼu sa lako maikina, ka lako yani kina; ia dou sa sega ni kila seʼu lako maivei, seʼu lako kivei.

¹⁵ Dou sa lewa me vaka na ka sa rairai mai; au sa sega ni lewa e dua na tamata.

¹⁶ Ia kevaka kaʼu sa lewa, sa dina na noqu lewa, niʼu sa sega ni tiko duaduaga, ia koi au kei Tamaqu, o koya sa talai au mai.

¹⁷ Sa volai talega e na nomudou vunau, ni sa dina nai tukutuku ni tamata e lewe rua.

¹⁸ E dua koi au kaʼu sa tukuni au, a sa tukuni au ko Tamaqu, o koya sa talai au mai.

¹⁹ Era sa qai kaya vua, Evei ko tamamu? Sa kaya ko Jisu, Dou sa sega ni kilai au sei Tamaqu; kevaka dou sa kilai au, dou sa kilai Tamaqu talega.

²⁰ Sa cavuta na vosa o qo ko Jisu e na vale ni yau, ni sa vakatavuvuli e na vale ni soro: a sa sega e dua sa tauri koya; ni sa sega ni yaco mai na nona gauna.

²¹ Sa qai kaya tale vei ira ko Jisu, Au sa lako yani, ka dou na vakasaqarai au, ia dou na mate e na nomudoui valavala ca: ia na yasana kaʼu sa lako kina, dou sa sega ni lako rawa kina.

²² Era sa qai kaya na kai Jutia, Ena vakamatei koya beka ko koya? ni sa kaya, Na yasana kaʼu sa lako kina, dou sa sega ni lako rawa kina.

²³ A sa kaya vei ira ko koya, Dou sa lako maira; au sa lako maicake: dou sa vakavuravura; au sa sega ni vakavuravura.

²⁴ O koya o qo kaʼu a kaya kina vei kemudou, Dou na mate e na nomudoui valavala ca; kevaka dou sa sega ni vakadinata ni sai au, dou na mate e na nomudoui valavala ca.

²⁵ Era sa qai kaya vua, O cei ko iko? A sa kaya vei ira ko Jisu, Sai koya ga kaʼu a tukuna vei kemudou mai nai vakatekivu.

²⁶ Sa vuqa na ka meʼu vosataka ka lewai kemudou kina; ia sa dina ko koya sa talai au mai; ia kaʼu sa tukuna vei ira na kai vuravura na veika kaʼu a rogoca maivei koya.

²⁷ Era sega ni kila ni sa vosataka na Tamana vei ira ko koya.

²⁸ Sa qai kaya vei ira ko Jisu, Ni dou sa laveta cake oti na Luve ni tamata, dou na qai kila ni sai au, niʼu sa sega talega ni kitaka e dua na ka vakai au ga; ia me vaka na ka sa vakatavulici au kina ko Tamaqu, na ka o qori au sa vosataka.

²⁹ Ia sa tiko vata kei au ko koya sa talai au mai: sa sega ni biuti au ko Tamaqu meʼu tiko duaduaga: niʼu sa kitaka tikoga na ka sa vinakata ko koya.

³⁰ Ni sa cavuta tiko na vosa o qo ko koya, era sa lewe vuqa era sa vakabauti koya.

³¹ Sa qai kaya ko Jisu vei ira na kai Jutia era sa vakabauti koya, Kevaka dou sa muria tikoga na noqu vosa, dou sa qai noqu tisaipeli dina;

³² ia dou na kila na ka dina, ia na ka dina ena sereki kemudou.

³³ Era sa kaya vua, Oi keimami na kawa i Eparaama, ka sega e dua keimami a bobula kina e na dua na gauna; o sa kaya vakacava, Dou na sereki?

³⁴ Sa kaya vei ira ko Jisu, E dina, e dina, au sa kaya vei kemudou, O koya yadua sa valavala ca sa bobula ki nai valavala ca.

³⁵ A sa sega ni tiko vakadua e vale na bobula; na luvena sa tiko vakadua.

³⁶ Ia dou na sere dina kina, kevaka ena sereki kemudou na Luvena.

³⁷ Au sa kila ni dou sa kawa i Eparaama; ia dou sa via vakamatei au, e na vuku ni sa sega ni tiko e na lomamudou na noqu vosa.

³⁸ Au sa vosataka na ka kaʼu a raica vei Tamaqu: ia dou sa kitaka na ka dou a raica vei koya na tamamudou.

³⁹ Era sa vosa, ka kaya vua, A tama i keimami ko Eparaama. Sa kaya vei ira ko Jisu, Kevaka dou sa luve i Eparaama, dou na kitaka nai valavala i Eparaama.

⁴⁰ Ia dou sa qai via vakamatei au, a tamata sa tukuna vei kemudou na ka dina, a ya kaʼu a rogoca ga mai vua na Kalou; sa sega ni kitaka na ka vakaoqo ko Eparaama.

⁴¹ Dou sa kitaka na nona cakacaka na tamamudou. Era sa qai kaya vua, Keimami sa sega ni sucu e na dauyalewa; e dua bau na tama i keimami, a Kalou.

⁴² Sa qai kaya vei ira ko Jisu, Kevaka sa Tamamudou na Kalou, dou na lomani au: niʼu sa tubu mai vua na Kalou, ka lako mai kina; au sa sega ni lako walega mai vakai au, ia sai koya sa talai au mai.

⁴³ A cava dou sa sega kina ni kila na noqu vosa? e na vuku ni dou sa sega ni vakabauta rawa na noqu vosa.

⁴⁴ A tamamudou na tevoro, ia dou sa via kitaka na gadreva ni tamamudou. O koya na dauveivakamatei mai nai vakatekivu, a sa sega ni vakabauta na ka dina, e na vuku ni sa sega ni tu na ka dina vei koya. Ni sa vosa lasu ko koya, sa vosataka na ka sa tu vua; ni sa daulasulasu ko koya, ka sa vu ni ka o qo.

⁴⁵ Ia koi au, e na vuku niʼu sa tukuna vei kemudou na ka dina, dou sa sega ni vakadinati au.

⁴⁶ O cei li vei kemudou sa vakadinadinataka niʼu sa valavala ca? Ia kevaka kaʼu sa vosa dina, dou sa sega ni vakadinati au e na vuku ni cava?

⁴⁷ O koya sa nona na Kalou sa rogoca na vosa ni Kalou: o qo dou sa sega kina ni rogoca, e na vuku ni dou sa sega ni nona na Kalou.

⁴⁸ Era sa qai vosa na kai Jutia, ka kaya vua, Sa sega li ni keimami kaya dina, ni ko sa kai Samaria, ka sa curumi iko e dua na tevoro?

⁴⁹ Sa kaya ko Jisu, Sa sega ni curumi au e dua na tevoro, ia kaʼu sa vakarokorokotaka na Tamaqu, ia dou sa vakalialiai au ga:

⁵⁰ ia kaʼu sa sega ni vakasaqara meʼu vakarokorokotaki: sa dua sa vakasaqara ka lewa.

⁵¹ E dina, e dina, au sa kaya vei kemudou, Kevaka e dua sa vakabauta tikoga na noqu vosa, ena sega sara ni raica na mate.

⁵² Era sa qai kaya na kai Jutia vei koya, Keimami sa qai kila ni sa curumi iko e dua na tevoro. Sa mate ko Eparaama kei ira talega na parofita; ia ko sa kaya, Kevaka e dua sa vakabauta tikoga na noqu vosa, ena sega sara ni tovolea na mate.

⁵³ O sa levu cake beka, ka lailai sobu ko Eparaama na tamada, o koya sa mate? a ra sa mate talega ko ira na parofita: o sa qisi iko mei cei?

⁵⁴ Sa kaya ko Jisu, Kevaka kaʼu sa vakarokorokotaki au, na ka wale na noqu veivakarokorokotaki: sai koya na Tamaqu sa vakarokorokotaki au; o koya dou sa vosataka, ni sa nomudou Kalou:

⁵⁵ ia dou sa sega ni kilai koya, ia kaʼu sa kilai koya koi au; ia kevaka kaʼu sa kaya, Au sa sega ni kilai koya, au na lasulasu ga me vakai kemudou: ia kaʼu sa kilai koya ga, ka vakabauta tikoga na nona vosa.

⁵⁶ Sa gadreva vakalevu sara ko Eparaama na tamamudou me raica na noqu gauna: a sa raica, ka reki.

⁵⁷ Era sa qai kaya na kai Jutia vei koya, Sa sega ni limasagavulu na nomu yabaki, ia ko a raici Eparaama, ne?

⁵⁸ Sa kaya vei ira ko Jisu, E dina, e dina, au sa kaya vei kemudou, Ni sa sega ni sucu mai ko Eparaama, au sa bula.

⁵⁹ Era sa qai tomika e so na vatu, me viriki koya: a sa vuni koya ko Jisu, ka sa curu yani mai na vale ni soro, ka lako e na kedra maliwa, ka lako tani yani kina.