Joni 4 - AI VOLA TABU

Erau sa veivosaki ko Jisu kei na yalewa ni Samaria, 1-30. Sa vakatakila ko Jisu vei iratou na nona tisaipeli ni sa via muria na ka sa vinakata ko Tamana, 31-38. E lewe vuqa vei ira na kai Samaria era sa vakabauti koya, 39-42. Sa vakabula ko Jisu na gonetagane ni turaga mai Kaperinaumi, o koya sa kolai ciba, 43-54.

¹ NI sa qai kila na Turaga ni sa rogoca ko ira na Farisi ni ra sa lewe vuqa sa lotu-taka ko Jisu ka papitaisotaka, ka lewe lailai ga ko Joni, (

² a sa sega ni veipapitaisotaki ko Jisu, o iratou ga na nona tisaipeli,)

³ sa biuti Jutia, ka lako tale ki Kalili.

⁴ A sa koto na nona sala e na loma ni vanua ko Samaria.

⁵ Sa qai lako mai ki na dua na koro mai Samaria, a yacana ko Sikari, e voleka ki na tiki ni vanua sa solia ko Jekope vei Josefa na luvena.

⁶ A sa tu maikina nai keli-wai nei Jekope. Ni sa oca ko Jisu e na lako, sa mai tiko sobu kina e na bati ni keli-wai: sa voleka na kenai kaono ni tiki-ni-siga.

⁷ Sa lako mai e dua na yalewa ni Samaria me taki wai: sa kaya vua ko Jisu, Solia mai vei au meʼu gunu. (

⁸ Ni ratou a lako yani na nona tisaipeli ki na koro me voli kakana.)

⁹ Sa qai kaya na yalewa ni Samaria vei koya, Ni ko sa kai Jutia, ko sa kerea vakacava vei au mo gunu, niʼu sa yalewa ni Samaria? (ni ra sa sega ni veiriti ko ira na kai Jutia, kei ira na kai Samaria.)

¹⁰ Sa vosa ko Jisu ka kaya vua, Kevaka ko sa kila nai solisoli ni Kalou, kei koya talega sa kaya vei iko, Solia mai vei au meʼu gunu; o sa qai kerea vua, ka sa solia vei iko ko koya na wai bula.

¹¹ Sa kaya na yalewa vei koya, Sa sega, saka, na nomui takitaki, a sa titobu nai keli-wai: o sa rawata maivei na wai bula o qori?

¹² o sa uasivi cake beka vei Jekope, a tama i keimami, o koya ka solia vei keimami nai keli-wai, ka gunu maikina ko koya, kei iratou na luvena, kei na nona manumanu?

¹³ Sa vosa ko Jisu, ka kaya vua, O koya yadua sa gunuva na wai o qo ena viagunu tale:

¹⁴ ia ko koya sa gunuva na wai kaʼu na solia vua, ena sega sara ni viagunu ka tawa mudu; ia na wai kaʼu na solia vua, ena tu e na lomana me mata-ni-wai sa tovure ki na bula tawa mudu.

¹⁵ Sa kaya na yalewa vei koya, Solia, saka, mai vei au na wai o qori, meʼu kakua ni viagunu, se lako mai kike me taki.

¹⁶ Sa kaya vua ko Jisu, Laʼki kaciva na watimu, ka mo drau lako mai kike.

¹⁷ Sa vosa na yalewa, ka kaya, Sa sega na watiqu. Sa kaya vua ko Jisu, O sa kaya dina, Sa sega na watiqu:

¹⁸ ni sa lewe lima na watimu eliu; ia ko koya drau sa qai tiko kaya sa sega ni watimu: o sa vosa dina e na ka ko ya.

¹⁹ Sa kaya na yalewa vei koya, Au sa qai kila, saka, ni sa dua na parofita ko iko.

²⁰ Era sa dausoro na neimami qase e na ulu-ni-vanua o qo; ia dou sa kaya, ni sa tu mai Jerusalemi ua tikina e dodonu me da masu kina.

²¹ Sa kaya vua ko Jisu, Yalewa, vakadinata na noqu vosa: ena lako mai na gauna dou na sega ni soro kina vei Tamada, e na ulu-ni-vanua o qo, se mai Jerusalemi.

²² Dou sa soro vei koya dou sa sega ni kila: keimami sa kilai koya keimami sa soro vua: ni sa tubu maivei ira na kai Jutia nai Vakabula.

²³ Ia ena lako mai na gauna, a sa qai yaco mai, era na soro vakayalo ka vakaidina vei Tamada ko ira sa soro dina; ni sa qara ko Tamada me vakaoqo ko ira sa soro vua.

²⁴ A Yalo na Kalou: ia ko ira sa soro vua, e dodonu me ra soro vakayalo ka vakaidina.

²⁵ Sa kaya na yalewa vei koya, Au sa kila ni na lako mai na Mesaia; (o koya sa vakatokai na Karisito): ni sa tadu mai ko koya, ena tukuna vei keda na ka kecega.

²⁶ Sa kaya vua ko Jisu, Sai au ga sa vosa tu vei iko.

²⁷ A sa qai lako mai ko iratou na nona tisaipeli, a ratou sa kidacala ni rau sa veivosaki kei na yalewa: ia ka sega e dua na tamata sa taroga, A cava ko sa vakasaqara? se, Drau veivosaki kaya e na vuku ni cava?

²⁸ Sa qai biuta na nonai tukituki na yalewa, a sa lako yani ki na koro, ka kaya vei ira na tamata,

²⁹ Dou mai bau laʼki raica na tamata, o koya sa tukuna mai vei au na ka kecega kaʼu a cakava: sai koya o qo na Karisito, se segai?

³⁰ A ra sa qai lako tani yani e na koro, ka lako mai vua.

³¹ Ia ni sa tawa oti, sa cikevi koya ko iratou na tisaipeli, ka kaya, Vakavuvuli, mo kana mada.

³² A sa kaya vei iratou ko koya, Sa tu vei au na kakana meʼu kania, dou sa sega ni kila.

³³ Sa qai veitarogi ko iratou na tisaipeli, Sa kauta li mai e dua na tamata na kakana vei koya?

³⁴ Sa kaya vei iratou ko Jisu, A qau kakana meʼu kitaka na loma i koya sa talai au mai; ka meʼu vakaotia na nona cakacaka.

³⁵ Dou sa sega li ni kaya, Sa vo na vula e va, me qai cava mai na yabaki? raica, au sa kaya vei kemudou, Dou ta cake na matamudou, ka raica na veiwere sa kolai matua me tamusuki.

³⁶ Ia ko koya sa tamusuka sa saumi, ka binia na vuana ki na bula tawa mudu; me reki vata ko koya sa kaburaka kei koya sa tamusuka.

³⁷ A sa dina kina na vosa o qo, E dua sa kaburaka, ia sa tamusuka e dua tani.

³⁸ Au a talai kemudou mo dou tamusuka na ka dou a sega ni cakacaka kina: e so tani era a cakacaka, ia dou sa rawata na vua ni nodra cakacaka.

³⁹ A ra sa le vuqa na kai Samaria e na koro ko ya era sa vakabauti koya e ua vuku ni nona vosa na yalewa, o koya sa vakatakila, Sa tukuna mai vei au ko koya na ka kecega kaʼu a cakava.

⁴⁰ Ia ni sa lako mai vua ko ira na kai Samaria, era sa masuti koya me tiko ga kei ira; a sa tiko ga maikea ka bogi rua.

⁴¹ A ra sa lewe vuqa talega sa vakabauta e na vuku ni nona vosa;

⁴² a ra sa kaya vua na yalewa, O qo keimami sa sega ni vakabauta e na vuku ni nomu vosa ga: ni keimami sa rogoca ko keimami, ka kila ni sai koya dina o qo na Karisito, a nodrai Vakabula na kai vuravura.

⁴³ Ni sa oti na bogi rua sa lako tani ekeri ko koya, ka yaco ki Kalili.

⁴⁴ A sa vakatakila ko Jisu, ni sa sega e dua na parofita sa vakarokorokotaki e nona vanua.

⁴⁵ Ni sa qai tadu mai ki Kalili ko koya, sa vakacegui koya ko ira na kai Kalili, e na vuku ni ra a raica na ka kecega sa kitaka ko koya mai Jerusalemi e na solevu, ni ka lako ko ira talega ki na solevu.

⁴⁶ A sa lako tale mai ko Jisu ki Kena mai Kalili, a koro sa cakava kina na wai me waini. Ia ka sa dua na turaga sa tauvi-mate na luvena mai Kaperinaumi.

⁴⁷ Ni sa rogoca ko koya ni sa lako mai Jutia ko Jisu ki Kalili, sa lako vua, ka masuta me lako sobu ka Vakabula na luvena: ni sa kolai ciba.

⁴⁸ Sa qai kaya vua ko Jisu, Kevaka dou sega ni raica e so na ka-mana kei na ka e veivakidacalataki, dou na sega ni vakabauta.

⁴⁹ Sa kaya na turaga vei koya, Lako sobu, saka, mai, de mate mada na luvequ.

⁵⁰ Sa kaya vua ko Jisu, Lako yani; sa bula na luvemu. A sa vakadinata ko na tamata na vosa sa kaya vua ko Jisu, a sa lako yani ko koya.

⁵¹ Ia ni sa qai lako sobu tikoga, eratou sa sota kaya na nona tamata, a ratou sa tukutuku mai, ka kaya, Sa bula na luvemu.

⁵² Sa qai taroga vei iratou ko koya na tiki-ni-siga sa vakatekivu kina ko koya me bula. A ratou sa kaya vua, Sa takali vei koya na katakata e na noa e nai kavitu ni tiki-ni-siga.

⁵³ A sa kila kina na tamana ni sai koya o qo na tiki-ni-siga ka kaya kina vua ko Jisu, Sa bula na luvemu; a sa vakabauta ko koya, kei ira kecega na nona lewe-ni-vale.

⁵⁴ Oqo nai karua tale ni ka-mana sa cakava ko Jisu, ni sa lako mai Jutia ki Kalili.