Joni 19 - AI VOLA TABU

Sa vakanakuitataki ka vakaisalataki e na wa-vakavotona ko Jisu, 1-3. Sa via sereki koya ko Pilato, ia ni ra sa ue mai na kai Jutia, sa soli koya yani, a ra sa vakoti koya ki na kauveilatai, 4-37. Erau sa buluta ko Josefa kei Nikotimo, 38-42.

¹ A SA qai kauti Jisu ko Pilato, ka vakanakuitataka.

² A sa talia e dua nai sala wa-vakavotona ko ira na tamatai valu, ka vakaisalataka kina na uluna, a ra sa vakasulumi koya e na dua nai sulu damudamu,

³ ka kaya, Sa loloma, na nodra Tui na kai Jutia! a ra sa sabici koya e na ligadra.

⁴ Sa qai curu tale yani ko Pilato, ka kaya vei ira, Raica, au sa tuberi koya mai vei kemudou, mo dou kila niʼu sa sega ni kunea e dua nai valavala ca vei koya.

⁵ (Sa qai curu yani ko Jisu, sa vakaisala tu e nai sala wa-vakavotona, ka vakaisulu e nai sulu damudamu.) A sa kaya vei ira ko koya, Raica na tamata!

⁶ Ni ra sa qai raici koya ko ira na bete levu kei ira nai talatala, era sa qoqolou, ka kaya, Vakota ki na kauveilatai, vakota ki na kauveilatai. Sa kaya vei ira ko Pilato, Dou kauti koya ka vakota ki na kauveilatai: ni sa sega ni kunea vua koi au e dua nai valavala ca.

⁷ O ira na kai Jutia era sa kaya vua, Sa dua na neimami vunau, a sa dodonu e na neimami vunau me mate ko koya, ni sa qisi koya me Luve ni Kalou.

⁸ Ni sa qai rogoca na vosa o qo ko Pilato, sa levu cake kina na nona rere;

⁹ a sa curu tale ki na vale ni lewa, ka kaya vei Jisu, O sa lako maivei? Ia sa sega ni vosa vua ko Jisu.

¹⁰ Sa qai kaya vua ko Pilato, O sa sega li ni vosa mai vei au? o sa sega beka ni kila niʼu sa rawata me vakoti iko ki na kauveilatai, kaʼu sa rawata talega me sereki iko?

¹¹ Sa kaya ko Jisu, O sa sega ni rawata e dua na ka vei au, kevaka sa sega ni soli vei iko maicake: a ka o qo sa levu cake kina na nonai valavala ca sa soli au yani vei iko.

¹² Sa qai vakatovolea tiko ko Pilato mo sereki koya: ia ko ira na kai Jutia, era sa qoqolou, ka kaya, Kevaka ko sa sereki koya o qo, o sa sega ni totaki Sisari: o koya yadua sa qisi koya me tui, sa vosavakacacataki Sisari.

¹³ Ni sa qai rogoca na vosa o qo ko Pilato, sa kauti Jisu yani, ka tiko sobu e nai tikotiko ni lewa e na tikina sa vakatokai ko Raravatu, ia e na vosa vaka-Iperiu, ko Kapaca:

¹⁴ (a siga o qo nai vakarau ni solevu ni lako-sivia, ia na tiki-ni-siga na kenai kaono:) a sa kaya ko koya vei ira na kai Jutia, Raica na nomudou Tui!

¹⁵ A ra sa qoqolou, Kauta tani, kauta tani, vakoti koya ki na kauveilatai. Sa kaya vei ira ko Pilato, Meʼu vakota li ki na kauveilatai na nomudou Tui? O ira na bete levu era sa kaya, Sa sega na neimami tui, o Sisari duaduaga.

¹⁶ Sa qai soli koya yani vei ira ko koya me vakoti ki na kauveilatai. A ra sa kauti Jisu, ka tuberi koya yani.

¹⁷ A sa colata na nona kauveilatai ko koya, ka lako yani ki na tikina sa vakatokai Na yasana ni qavokavoka, a sa vakatokai e na vosa vaka-Iperiu, ko Kolikoca:

¹⁸ a ra sa vakoti koya maikina ki na kauveilatai, ka lewe rua tani vata kaya, e dua vaka, ka dua vaka, kei Jisu e na kedrau maliwa.

¹⁹ A sa dua nai vakatakilakila sa vola ko Pilato, ka vakatikora e na kauveilatai ecake. Sai koya o qo na kenai vola, O JISU NA KAI NASARECI NA NODRA TUI NA KAI JUTIA.

²⁰ A ra sa lewe vuqa na kai Jutia era sa wilika nai vakatakilakila o qo: ni sa voleka ki na koro na tikina sa vakoti kina ki na kauveilatai ko Jisu: a sa volai tu e na vosa vaka-Iperiu, na vosa vaka-Kirisi, na vosa vaka-Roma.

²¹ Era sa qai kaya vei Pilato ko ira na nodra bete levu na kai Jutia, Kakua ni vola, A nodra Tui na kai Jutia; a ya ni sa kaya ko koya, Oi au na nodra Tui na kai Jutia.

²² Sa kaya ko Pilato, A ka kaʼu sa vola, kaʼu sa vola.

²³ Ia ko ira na tamatai valu, ni ra sa vakoti Jisu oti ki na kauveilatai, era sa kauta ua nonai sulu, ka wasea vakava, me ra tauyadua na tikina na tamatai valu; nai tutuvi talega; ia ka sa sega ni bau cula na nonai tutuvi, sa tali kecega mai na tikina ecake ka kauta kira.

²⁴ O koya era sa kaya kina vakai ira, Me da kakua ni dresuka, ia me da ia nai vola madigi, se na nei cei: me vakayacori kina nai Vola, a ya sa kaya, Era sa veivota na noqui sulu, ia na noqui tutuvi era sa ia kina na madigi vola. O ira na tamatai valu, era sa kitaka na veika o qo.

²⁵ Ia ka sa tu voleka ki na kauveilatai i Jisu na tinana, kei na taci i tinana, ko Meri na wati i Kilopa, kei Meri na kai Makitala.

²⁶ Ni sa qai raici rau ko Jisu, na tinana, kei na tisaipeli ka tu voleka, o koya sa lomana ko koya, sa kaya vei tinana, Yalewa, raica na luvemu!

²⁷ Sa qai kaya vua na tisaipeli, Raici tinamu! Ia mai na tiki-ni-siga ko ya sa kauti koya ko na tisaipeli ko ya me rau tiko vata.

²⁸ Ni sa oti o qo, a sa kila ko Jisu ni sa oti na ka kecega, me vakayacori kina nai Vola, sa kaya, Au sa viagunu.

²⁹ Ia ka tu e dua na bilo sa sinai e na wai wiwi; a ra sa vakasuasuataka e dua na vutovuto e na wai wiwi, ka vivia ki na dua na taba ni isopi, ka viritu ki na gusuna.

³⁰ Ni sa qai gunuva na wai wiwi ko Jisu, sa kaya, Sa oti: a sa da-mele na uluna, ka vakalaiva yani na yalona.

³¹ Ia ko ira na kai Jutia, era sa masuti Pilato me musuki na yavadratou, ka me ratou kau tani, e na vuku ni sa siga vakarau, me kakua ni rube tu na yagodratou e na kauveilatai e na siga ni vakacecegu, (ni sa levu na siga ni vakacecegu ko ya.)

³² Sa qai lako ko ira na tamatai valu, ka musuka na yavana nai kadua, a yavana talega na kenai karua, eratou a vakoti vata kaya ki na kauveilatai.

³³ Ia ni ratou sa lako mai vei Jisu, ka raica ni sa mate sara tu, era sa sega ni musuka na yavana:

³⁴ ia ka sa coka na sarisarina e dua na tamatai valu e na dua na moto, a sa dave vakasauri maikina na dra kei na wai.

³⁵ Ia ko koya ka raica sa tukuna, a sa dina na nonai tukutuku: a sa kila ko koya ni sa vosa dina, mo dou vakabauta.

³⁶ Ni sa caka na veika o qo, me vakayacori kina nai Vola, Me kakua ni musuki e dua na suina.

³⁷ Ia e dua tale na tiki ni Vola sa kaya, Era na raici koya era sa coka.

³⁸ Ia ni sa oti na veika o qo, sa masuti Pilato ko Josefa, a kai Arimacia, a tisaipeli i Jisu, (ia ka vuni ga ni sa rerevaki ira na kai Jutia,) me kauta tani ko koya na yago i Jisu: a sa laiva ko Pilato. Sa qai lako ko koya, ka kauta tani na yago i Jisu.

³⁹ A sa lako mai ko Nikotimo talega, o koya sa lako eliu vei Jisu e na bogi, a sa kauta mai na mura kei na yasiyasi sa veiwaki vata, e dua na drau na paudi.

⁴⁰ Erau sa qai kauta na yago i Jisu, ka solega vata e na gatu e so kei na ka boi vinaka, me vaka nai valavala ni nodra veibulu na kai Jutia.

⁴¹ Ia ka sa dua na were e na tikina sa vakoti kina ki na kauveilatai ko koya; a sa dua nai bulubulu vou e na were, sa sega ni bulu kina e dua na tamata.

⁴² Erau sa qai buluti Jisu kina, e na vuku ni sa nodra siga vakarau na kai Jutia; ni sa voleka nai bulubulu.