Joni 18 - AI VOLA TABU

Sa soli Jisu yani ko Juta, a sa seledrutia na daliga i Maliko ko Petero, 1-11. Sa tauri ko Jisu ka tuberi yani vei Anasi kei Kaiafa, a sa cakitaki Jisu ko Petero, 12-27. Sa lewai Jisu ko Pilato, 28-40.

¹ NI sa vosataka oti na veika o qo ko Jisu, sa lako yani ko koya kei iratou na nona tisaipeli ki tai kadua ni soniwai ko Kitironi, a sa dua kina na were, a sa curu kina ko koya, kei iratou na nona tisaipeli.

² Ia ko Juta, o koya sa soli koya yani, sa kila na tikina: ni sa lako wasoma kina ko Jisu kei iratou na nona tisaipeli.

³ Ia ni sa rawata ko Juta na matai valu kei nai talatala e so, maivei ira na bete levu kei ira na Farisi, sa yaco kina, a ra sa taura voli e so na tabucagi kei na cina kei nai yaragi ni valu.

⁴ Ia ni sa kila ko Jisu na ka kecega ena yaco vei koya, sa lako yani, ka kaya vei ira, Dou sa vakasaqarai cei?

⁵ Era sa kaya vua, O Jisu na kai Nasareci. Sa kaya vei ira ko Jisu, Sai au. (A sa tu vata kei ira ko Juta, o koya sa soli koya yani.)

⁶ Ni sa qai kaya vei ira ko koya, Sai au, era sa sukainadaku, ka bale sobu ki na soso.

⁷ Sa qai taroga tale ko koya, Dou sa vakasaqarai cei? A ra sa kaya, O Jisu na kai Nasareci.

⁸ Sa kaya ko Jisu, Au sa tukuna oti vei kemudou ni sai au: ia kevaka dou sa vakasaqarai au, biuti ira o qo me ra lako tani:

⁹ me vakayacori kina na vosa sa tukuna ko koya, Au sa sega ni vakayalia e dua vei iratou ko a solia mai vei au.

¹⁰ Sa qai ucuna ko Saimoni Petero nai seleiwau sa tu vua, ka yavita kina na tamata ni bete levu, ka seledrutia na daligana i matau. Sa yaca ni tamata ko Maliko.

¹¹ Sa qai kaya vei Petero ko Jisu, Daramaka na nomui seleiwau ki na kena taga: a bilo sa solia mai vei au ko Tamaqu, kaʼu na sega beka ni gunuva?

¹² O ira na matai valu, kei na kena turaga, kei ira na nodrai talatala na kai Jutia, era sa qai tauri Jisu, ka vesuki koya,

¹³ ka ra sa tubera mada eliu vei Anasi; ni sa vugo i Kaiafa, o koya sa bete levu e na yabaki ko ya.

¹⁴ Ia sai koya o qo ko Kaiafa, o koya sa vakavulici ira na kai Jutia, ni sa yaga me mate e dua na tamata e na vukudra na tamata.

¹⁵ A rau sa muri Jisu ko Saimoni Petero kei na dua tale na tisaipeli: a sa kilai na tisaipeli ko ya vua na bete levu, a rau sa curu vata kei Jisu ki na vale ni bete levu.

¹⁶ A sa tu etautuba ko Petero ka voleka ki na katuba. Sa qai curu yani na tisaipeli kadua, o koya sa kilai vua na bete levu, a sa vosa vua na yalewa sa vakatawa na katuba, a sa vakacurumi Petero.

¹⁷ Sa qai kaya vei Petero na vada sa vakatawa na katuba, O iko talega beka e dua na tisaipeli ni tamata o qo? Sa kaya ko koya, Oi au e segai.

¹⁸ A sa tu maikina ko ira sa dauveiqaravi kei ira nai talatala, a ra sa vakawaqara oti na buka; ni sa liliwa: a ra sa tatalai; a sa tu vata kei ira ko Petero, ka tatalai.

¹⁹ Sa qai tarogi Jisu na bete levu e na vukudra na nona tisaipeli, e na nonai vakavuvuli talega.

²⁰ Sa kaya vua ko Jisu, Au a vosa votu ki vuravura; au a vakavuvuli tikoga e na vale ni lotu, kei na vale ni soro, era sa daulako kina na kai Jutia; ia kaʼu sa sega ni kaya vuni e dua na ka.

²¹ E na vuku ni cava ko sa tarogi au kina? tarogi ira era sa rogoca, se cava kaʼu a kaya vei ira: raica, era sa kila na ka kaʼu a daukaya.

²² Ia ni sa vosa oti vakaoqo ko koya, e dua vei ira nai talatala sa tu voleka, sa sabici Jisu e na ligana, ka kaya, O sa vosa vakacava vakaoqo ki na bete levu?

²³ Sa kaya vua ko Jisu, Kevaka kaʼu sa vosa vakaca, vakatakila na kena ca: ia kevaka e vinaka, o sa sabici au e na vuku ni cava?

²⁴ Ia ko Anasi sa talai koya, ni sa vauci tu, vei Kaiafa na bete levu.

²⁵ Ia sa tu ko Saimoni Petero, ka tatalai. Era sa qai kaya vua, Sa dua beka vei iratou na nona tisaipeli ko iko talega? Sa cakitaka ko koya, ka kaya, Oi au e segai.

²⁶ E dua vei ira na tamata ni bete levu, a weka i koya sa seledrutia na daligana ko Petero, sa kaya, Au a sega beka ni raici kemudrau vata kaya e na were?

²⁷ Sa qai cakitaka tale ko Petero; a sa tagi vakasauri na toa.

²⁸ Era sa qai kauti Jisu tani maivei Kaiafa ki na vale ni lewa; a sa mataka caca; ia ko ira era sa sega ni curu ki na vale ni lewa, de ra vakadukadukalitaki, a ya ga me ra kania na solevu ni lako-sivia.

²⁹ Sa qai curu yani vei ira ko Pilato, ka kaya, A cava na ka ca dou sa beitaka vua na tamata o qo?

³⁰ Era sa vosa ka kaya vua, Kevaka sa sega ni tamata ca ko koya o qo, keitou sa sega ni soli koya yani vei iko.

³¹ Sa qai kaya vei ira ko Pilato, Dou kauti koya, ka lewai koya me vaka na nomudou vunau. O koya sa kaya kina ko ira na kai Jutia vei koya, E sega ni tara vei keimami me vakamatea e dua na tamata:

³² me vakayacori kina na vosa ka tukuna ko Jisu, ni sa vakatakila nai valavala ni mate ena mate kina.

³³ Sa qai curu tale ki na vale ni lewa ko Pilato, ka kacivi Jisu, ka kaya vua, O iko na nodra Tui na kai Jutia, se segai?

³⁴ Sa kaya vua ko Jisu, O sa vosataka li na ka o qo vakai iko, se sa tukuni au vakaoqo vei iko e so tani?

³⁵ Sa kaya ko Pilato, Oi au beka na kai Jutia? o ira na kai nomu kei ira na bete levu, era sa soli iko mai vei au: a cava ko a cakava?

³⁶ Sa kaya ko Jisu, Sa sega ni vakavuravura na noqu matanitu: kevaka sa vakavuravura na noqu matanitu, era na qai vala na noqu tamata, meʼu kakua ni soli yani vei ira na kai Jutia: ia o qo, sa sega ni vu eke ua noqu matanitu.

³⁷ Sa qai kaya vua ko Pilato, O iko bagi sa tui? Sa kaya ko Jisu, O sa kaya niʼu sa tui. A ka o qo kaʼu sa sucu mai kina, ia na ka o qo kaʼu sa lako mai kina ki vuravura o qo, meʼu dautukuna na ka dina. O koya yadua sa vakabauta na ka dina, sa rogoca na noqu vosa.

³⁸ Sa kaya vua ko Pilato, A cava na ka dina? Ia ni sa vosa oti vakaoqo, sa curu yani tale vei ira na kai Jutia, ka kaya vei ira, Au sa sega ni kunea vua e dua nai valavala ca:

³⁹ ia sa dua na nomudoui valavala, meʼu sereka e dua vei kemudou e na solevu ni lako-sivia: dou sa vinakata kina, se segai, meʼu sereka vei kemudou na nodra Tui na kai Jutia?

⁴⁰ Era sa qai qoqolou kece tale, ka kaya, Me kakua ga na tamata o qo, ko Parapa ga. Ia na daubutabutako ko Parapa.