Joni 16 - AI VOLA TABU

Sa tukuna vei iratou na nona tisaipeli ko Jisu ni ratou na vakacacani e na vukuna, a sa yalata vei iratou na Dauveivakacegui, 1-15. Sa tukuna talega ni na mate, ka bula tale mai na mate, ka lako cake vei Tamana; a sa kaya ni na vakacegui iratou ni ratou sa vakacacani, 16-33.

¹ AU sa vosataka na veika o qo vei kemudou, mo dou kakua ni vakatarabetaki.

² Era na vakasavi kemudou mai na veivale ni lotu: ia ena yaco mai na gauna, era na nanuma kina ko ira yadua sa vakamatei kemudou ni ra sa qarava kina na Kalou.

³ Ta na veika o qo era na kitaka vei kemudou, e na vuku ni ra sa sega ni kilai Tamaqu sei au.

⁴ Ia na veika o qo kaʼu sa tukuna vei kemudou, ka ni sa yaco mai na gauna, dou na nanuma kina niʼu a tukuna vei kemudou. Kaʼu a sega ni tukuna eliu vei kemudou na veika o qo, e na vuku niʼu a tiko vata kei kemudou.

⁵ Ia kaʼu sa qai lako yani vei koya sa talai au mai; a sa sega mada ni tarogi au e dua vei kemudou, O sa lako kivei?

⁶ Ia e na vuku ga niʼu sa tukuna vei kemudou na veika o qo, sa sinai e na rarawa na lomamudou.

⁷ Ia kaʼu sa tukuna vei kemudou na ka dina: E yaga vei kemudou meʼu lako yani: ni na sega ni lako mai vei kemudou na Dauveivakacegui, kevaka kaʼu sa sega ni lako yani: ia kevaka kaʼu sa lako tani, kaʼu na talai koya mai vei kemudou.

⁸ Ia ni sa lako mai ko koya, ena vakatakila kivei ira na kai vuravura nai valavala ca, kei na ka dodonu, kei na lewa:

⁹ Ai valavala ca, e na vuku ni ra sa sega ni vakabauti au;

¹⁰ kei na ka dodonu, e na vuku niʼu sa lako vei Tamaqu, ka dou sa sega ni raici au tale;

¹¹ kei na lewa, e na vuku ni sa lewai na turaga ni vuravura o qo.

¹² Sa vuqa na ka sa vo meʼu tukuna vei kemudou, ia dou sa sega ni rawata edaidai.

¹³ Ia ni sa lako mai ko koya, na Yalo na vu ni ka dina, ena tuberi kemudou ki na ka kecega e dina: ni na sega ni vosa vakai koya: ia na ka kecega ena rogoca, ena vosataka: ia ena vakatakila vei kemudou na veika ena yaco maimuri.

¹⁴ Ena vakarokorokotaki au ko koya: ni na kauta na noqu ka, ka vakatakila vei kemudou.

¹⁵ Sa noqu na ka kecega sa nei Tamaqu: a ka o qo kaʼu a kaya kina, ni na kauta ko koya na noqu ka, ka vakatakila vei kemudou.

¹⁶ Sa vo e lailai, dou na qai sega ni raici au; ka vo tale e lailai, dou na qai raici au; e na vuku niʼu sa lako vei Tamaqu.

¹⁷ A sa kaya kina vakai iratou e so vei ira na nona tisaipeli, A cava na ka o qo sa kaya vei keda ko koya, Sa vo e lailai, dou na qai sega ni raici au: ka vo tale e lailai, dou na qai raici au: ia, E na vuku niʼu sa lako vei Tamaqu?

¹⁸ A ka o qo eratou sa kaya kina, A cava na ka o qo sa kaya ko koya, Sa vo e lailai? edatou sa sega ni kila na ka sa kaya ko koya.

¹⁹ A sa kila ko Jisu ni ratou sa via tarogi koya, sa qai kaya vei iratou, Dou sa veitarogi li e na ka kaʼu a kaya, Sa vo e lailai, dou na qai sega ni raici au: ka vo tale e lailai, dou na qai raici au?

²⁰ E dina, e dina, au sa kaya vei kemudou, Dou na tagi ka tagiyaso, ia ko vuravura ena reki: ia ena rarawa na lomamudou, ia na rarawa ni lomamudou ena vuki me reki.

²¹ Ni sa taratara na yalewa sa rarawa, e na vuku ni sa yaco ua nona siga: ia ni sa sucu oti na gone, sa sega ni nanuma tale na rarawa, e na vuku ni marau ni sa sucu mai e dua na tamata ki vuravura.

²² Ia sa qai rarawa edaidai na lomamudou: ia kaʼu na raici kemudou tale, ena qai reki na lomamudou, a sa sega e dua ena kovea na nomudou marau.

²³ Ia e na siga ko ya dou na sega ni tarogi au e na dua na ka. E dina, e dina, au sa kaya vei kemudou, A ka kecega dou na kerea vei Tamaqu e na yacaqu, ena solia vei kemudou ko koya.

²⁴ Dou a sega ni kerea eliu e dua na ka e na yacaqu: dou kerekere, dou na qai rawata, me sinai na nomudou marau.

²⁵ Au a tukuna na veika o qo vei kemudou e na vosa vakatautauvata: ia sa na lako mai na gauna kaʼu na sega ni vosa tale kina vei kemudou e na vosa vakatautauvata, kaʼu na vakatakila vakamacala vei kemudou na veika nei Tamaqu.

²⁶ E na siga ko ya dou na kerekere e na yacaqu; ia sa sega ni yaga meʼu tukuna vei kemudou, niʼu na masuti Tamaqu e na vukumudou;

²⁷ ni sa lomani kemudou na Tamaqu, e na vuku ni dou sa lomani au, ka vakadinata niʼu sa lako mai vua na Kalou.

²⁸ Au sa lako maivei Tamaqu, ka lako mai ki vuravura; au sa biuti vuravura tale, ka lako vei Tamaqu.

²⁹ Sa kaya vua ko iratou na nona tisaipeli, Raica, o sa qai vosa vakamacala, ka sega ni vosataka na vosa vakatautauvata.

³⁰ Keitou sa qai kila ni ko sa kila na ka kecega, ka sega ni yaga vua e dua na tamata me tarogi iko: e na ka o qo keitou sa vakadinata kina ni ko sa lako mai vua na Kalou.

³¹ Sa kaya vei iratou ko Jisu, Dou sa qai vakabauta, ne?

³² Raica, sa lako mai na gauna, io, sa qai yaco mai, dou na dui veiseyaki kina, a tamata yadua ki nodratou, ka dou na laivi au meʼu tiko duaduaga; ia kaʼu sa sega ni tiko duaduaga ni keirau sa tiko vata kei Tamaqu.

³³ A veika o qo kaʼu sa tukuna vei kemudou, mo dou rawata na vakacegu e na vukuqu. Dou na kunea e vuravura na rarawa; ia mo dou vakacegu; au sa vakamalumalumutaki vuravura.