Joni 13 - AI VOLA TABU

Sa vuya na yavadratou na nona tisaipeli ko Jisu, 1-20. Sa vakatakila vei iratou, ni na soli koya yani ko Juta, 21-30. Sa vakaroti iratou na nona tisaipeli me ratou veilomani, 31-35. Sa vakatakila ko koya ni na cakitaki koya ko Petero, 36-38.

¹ IA ni sa bera na solevu ni lako-sivia, ni sa kila ko Jisu ni sa yaco mai na nona gauna me lakani e vuravura o qo vua na Tamana, ni sa lomani ira na nona era sa tiko e vuravura, sa lomani ira ki nai otioti.

² Ia ni ratou sa vakayakavi tiko, ni sa vakatubura oti ko na tevoro e na loma i Juta Isikarioti, na luve i Saimoni, me soli koya yani:

³ a sa kila ko Jisu ni ka solia ko Tamana na ka kecega ki na ligana, ka ni ka lako mai ko koya mai na Kalou, a sa lako tale yani vua na Kalou;

⁴ sa tu cake mai nai vakayakavi, ka luvata na nonai sulu, ka kauta mai e dua na solo, ka vauca ki tolona.

⁵ Ni sa oti o qo sa livia na wai ki na dari, ka vakatekivu me vuya na yavadratou na tisaipeli, ka solota e na solo sa vau ki tolona.

⁶ Sa qai lako mai ko koya vei Saimoni Petero: a sa kaya vua ko koya, Turaga, o sa vuya na yavaqu, ne?

⁷ Sa vosa ko Jisu, ka kaya vua, A ka kaʼu sa kitaka ko sa sega ni kila edaidai; ia maimuri ga ko na kila.

⁸ Sa kaya vua ko Petero, O na sega sara ni vuya na yavaqu. Sa kaya vua ko Jisu, Kevaka kaʼu sa sega ni vui iko, o sa sega ni rawata e dua na ka vei au.

⁹ Sa kaya vua ko Saimoni Petero, Turaga, e sega ni yavaqu walega, a ligaqu talega kei na uluqu.

¹⁰ Sa kaya vua ko Jisu, O koya sa sili oti, sa yaga vua me vuya na yavana ga, a sa savasava taucoko: ia dou sa savasava, ka dou sa sega kece:

¹¹ ni sa kilai koya ena soli koya yani: a ka o qo sa kaya kina ko koya, Dou sa sega ni savasava kece.

¹² Ni sa qai vuya oti na yavadratou, ka kauta mai na nonai sulu, sa tiko sobu tale, ka kaya vei iratou, Dou sa kila na ka kaʼu sa kitaka vei kemudou, se segai?

¹³ Dou sa vakatokai au mei Vakavuvuli, me Turaga talega: ia dou sa vosa dina; ni sai au.

¹⁴ Ia kevaka kaʼu sa vuya na yavamudou, koi au na Turaga kei nai Vakavuvuli, sa dodonu talega mo dou veivui yava:

¹⁵ niʼu sa solia e dua nai vakarau vei kemudou, mo dou kitaka me vaka kaʼu sa kitaka oti vei kemudou.

¹⁶ E dina, e dina, au sa kaya vei kemudou, Sa sega ni levu na tamata ka lailai na nona turaga; se levu ko koya sa talai mai ka lailai ko koya sa talai koya.

¹⁷ Kevaka dou sa kila na veika o qo, dou sa kalougata kevaka dou sa kitaka.

¹⁸ Au sa sega ni vosataki kemudou kecega: au sa kilai ira kaʼu sa digitaka; ia me vakayacori kina nai Vola, O koya keirau sa kana madrai vata kaya, sa laveta cake vei au na bukubuku-ni-yavana.

¹⁹ Au sa qai tukuna vei kemudou ni sa bera ni yaco mai; mo dou vakabauta ni sai au, ni sa yaco mai.

²⁰ E dina, e dina, au sa kaya vei kemudou, O koya sa vakacegui ira yadua kaʼu sa tala, sa vakacegui au; ia ko koya sa vakacegui au, sa vakacegui koya sa talai au mai.

²¹ Ni sa vosa oti vakaoqo ko Jisu, sa rarawa na lomana, a sa vakatakila, ka kaya, E dina, e dina, au sa kaya vei kemudou ni sa dua vei kemudou ena soli au yani.

²² Eratou sa qai veivakaraici lia tisaipeli, ni ratou sa lecava se vosataki cei ko koya.

²³ A sa vakararavi tu e na lomasere i Jisu e dua vei iratou na nona tisaipeli, o koya sa lomana ko Jisu.

²⁴ Sa qai deguvacutaki koya ko Saimoni Petero, me taroga se vosataki cei ko koya.

²⁵ Ia ko koya sa vakararavi tu e na lomasere i Jisu, sa kaya vua, Turaga, o cei beka ko ya?

²⁶ Sa kaya ko Jisu, Sai koya kaʼu na solia vua na tiki ni madrai niʼu sa tonia. Ia ni sa tonia oti na tiki ni madrai, sa solia vei Juta Isikarioti, na luve i Saimoni.

²⁷ Ia ni sa oti na tiki ni madrai, sa qai curumi koya ko Satani. Sa qai kaya vua ko Jisu, A ka ko sa kitaka, kitaka kusarawa.

²⁸ Sa sega ni kila e dua vei iratou sa tiko me kana, se cava sa vosa kina vakaoqo vua ko koya.

²⁹ Ni ra vakasama e so, e na vuku ni sa taura na taga i lavo ko Juta, ni sa kaya vua ko Jisu, Volia na veika ena yaga vei keda e na solevu; se me solia na ka e so vei ira era dravudravua.

³⁰ Ni sa qai kauta oti na tiki ni madrai ko koya, sa lako vakasauri ki tautuba; a sa bogi.

³¹ Ni sa qai curu oti yani ko koya, sa kaya ko Jisu, Sa qai vakarokorokotaki na Luve ni tamata, a sa vakarokorokotaki na Kalou e na vukuna.

³² Kevaka sa vakarokorokotaki na Kalou e na vukuna, ena vakarokorokotaki koya talega na Kalou vakai koya, ia ena vakarokorokotaki koya vakasauri.

³³ Na luvequ lomani, au na tiko vakalailai ga kei kemudou. Dou na vakasaqarai au: ia me vaka kaʼu a kaya vei ira na kai Jutia, Dou sa sega ni lako rawa ki na vanua kaʼu sa lako yani kina; au sa kaya vaka talega kina vei kemudou.

³⁴ E dua na vunau vou kaʼu sa solia vei kemudou, Mo dou veilomani; me vaka kaʼu sa lomani kemudou, mo dou veilomani talega vakakina.

³⁵ A ka o qo era na kila kina na tamata kecega ni dou sa noqu tisaipeli, kevaka dou sa veilomani.

³⁶ Sa kaya vua ko Saimoni Petero, Turaga, o sa lako kivei? Sa kaya vua ko Jisu, A vanua kaʼu sa lako kina, o sa sega ni muri au rawa kina edaidai; ia maimuri ga, ko na muri au.

³⁷ Sa kaya vua ko Petero, Turaga, au sa sega ni muri iko rawa edaidai e na vuku ni cava? au na virino na noqu bula e na vukumu.

³⁸ Sa kaya vua ko Jisu, O na virino na nomu bula e na vukuqu, ne? E dina, e dina, au sa kaya vei iko, ni sa bera ni tagi na toa, o na cakitaki au vakatolu.