Joni 12 - AI VOLA TABU

Sa lumuta na yava i Jisu ko Meri, 1-8. E lewe vuqa na tamata sa lako mai me raici Lasaro, 9-11. Sa lako ko Jisu ki Jerusalemi, 12-19. Sa via raici Jisu e so maivei ira na veimatanitu kisau, 20-22. Sa vakatakila mai na nona mate ko Jisu, 23-36. Era sa loma butobuto na kai Jutia, 37-41. E so na turaga era sa vakabauti Jisu, a ra sa tawa tukuna, 42-50.

¹ NI sa vo na bogi e ono ki na solevu ni lako-sivia, sa lako mai ko Jisu ki Pecania, sa tiko kina ko Lasaro, ka mate eliu; o koya ka vakatura cake tale mai na mate ko koya.

² A ra sa cakava kina na kenai vakayakavi; a sa qarava ko Marica: a sa dua vei ira sa tiko vata kaya me kana ko Lasaro.

³ Sa qai kauta mai ko Meri e dua nai vakarau waiwai talei sara, a narita dina, ka lumuta na yava i Jisu, ka solota na yavana e na drau ni uluna: ka curuoso na vale e na kena boi na waiwai.

⁴ Sa qai kaya e dua vei iratou na nona tisaipeli, o Juta Isikarioti, na luve i Saimoni, o koya ena soli koya yani,

⁵ Sa sega ni volitaki na waiwai o qo e na tola e vasagavulu, ka soli vei ira na dravudravua, e na vuku ni cava?

⁶ Sa sega na nona nanumi ira na dravudravua, sa vosa kina vakaoqo ko koya; ia e na vuku ga ni sa butabutako, ka taura na taga i lavo, a sa kauta na ka sa biu kina.

⁷ Sa qai kaya ko Jisu, Biuti koya ga: sa maroroya na ka o qo ko koya ki na siga kaʼu na bulu kina:

⁸ ni sa tiko vakadua kei kemudou ko ira na dravudravua; ia koi au, kaʼu sa sega ni tiko vakadua kei kemudou.

⁹ Ia sa lewe vuqa sara vei ira na kai Jutia, ni ra sa kila sa tiko maikina ko koya, era sa lako mai, sa sega e na vuku i Jisu ga, a ya me ra raici Lasaro talega, o koya ka vakatura cake tale mai na mate ko koya.

¹⁰ Ia ko ira na bete levu era sa bose vata mo ra vakamatei Lasaro talega:

¹¹ e na vuku ni ra sa lewe vuqa na kai Jutia sa lako yani e na vukuna, ka vakabauti Jisu.

¹² E na sabogibogi e lewe vuqa sara era sa lako mai ki na solevu, ni ra sa rogoca ni sa lako mai ki Jerusalemi ko Jisu,

¹³ era sa kauta na drau ni niu, a ra sa lako yani me veitata kaya, ka kacivaka, Osana! sa kalougata na nodra Tui na Isireli, o koya sa lako mai e na yaca ni Turaga.

¹⁴ Ia ko Jisu, ni sa kunea e dua na luve ni asa, sa vodoka; me vaka sa volai,

¹⁵ O iko sa toka mai Saioni, kakua ni rere: raica, sa lako mai na nomu Tui, ka vodo tu e na dua na luve ni asa.

¹⁶ Ia na veika o qo eratou sa sega ni kila mada ko iratou na nona tisaipeli: ia ni sa vakarokorokotaki oti ko Jisu, eratou sa qai nanuma ni sa volai ko koya e na veika o qo, a ra sa kitaka na veika o qo vei koya.

¹⁷ O ira na tamata era sa tiko kaya ni sa kacivi Lasaro mai nai bulubulu, ka vakaturi koya cake tale mai na mate, era sa tukuna.

¹⁸ E na vuku ni ka o qo sa veitata kaya talega na lewe vuqa, ni ra sa rogoca ni sa cakava na ka-mana o qo ko koya.

¹⁹ O ira na Farisi era sa qai kaya vakai ira, Dou sa kila beka ni dou sa sega ni rawata e dua na ka? raica, sa muri koya na kai vuravura kecega.

²⁰ Ia sa so mai na veimatanitu kisau, era sa lako cake mai ki na solevu me ra soro:

²¹ o ira o qo era sa lako mai vei Filipo, a kai Peciseita e Kalili, ka tarogi koya, ka kaya, Keitou via raici Jisu, saka.

²² Sa lako ko Filipo, ka tukuna vei Adriu: ia koi rau ko Adriu kei Filipo, erau sa tukuna vei Jisu.

²³ A sa vosa vei rau ko Jisu, ka kaya, Sa qai yaco mai na gauna me vakarokorokotaki kina na Luve ni tamata.

²⁴ E dina, e dina, au sa kaya vei kemudou, Kevaka ena sega ni mate na vua ni sila ni sa lutu ki na qele, sa tiko duaduaga; ia kevaka sa mate, sa vua vakalevu.

²⁵ O koya sa lomana na nona bula, ena vakayalia: ia ko koya sa cata na nona bula e vuravura o qo, ena maroroya ki na bula tawa mudu.

²⁶ Kevaka sa qaravi au e dua, me muri au ga; ia na vanua kaʼu sa tiko kina, ena tiko talega kina ko koya sa qaravi au: ia kevaka sa qaravi au e dua, ena vakarokorokotaki koya ko Tamaqu.

²⁷ Sa qai rarawa na lomaqu; ia ka cava meʼu kaya? Tamaqu, vakabulai au mai na gauna o qo; ia na ka o qo kaʼu sa lako mai kina ki na gauna o qo.

²⁸ Tamaqu, vakarokorokotaka na yacamu. Sa qai rorogo mai e dua na domo mai lomalagi, Au sa vakarokorokotaka, kaʼu na vakarokorokotaka tale.

²⁹ 0 ira na tamata sa tiko ka rogoca, era sa kaya ni sa kurukuru: sa kaya e so tani, Sa dua na agilose sa vosa vei koya.

³⁰ Sa vosa ko Jisu, ka kaya, Sa sega ni lako mai na domo o qo e na vukuqu, e na vukumudou ga.

³¹ Sa qai lewai ko ira na kai vuravura o qo: sa qai biu ki tautuba na turaga ni vuravura o qo.

³² Ia niʼu sa laveti cake mai vuravura, au na yarataki ira na tamata kecega vei au.

³³ Ia sa vosataka na ka o qo ko koya, me vakatakila na mate ena mate kina ko koya.

³⁴ Sa kaya vua na lewe vuqa, Keitou a rogoca mai na vunau ni sa tiko vakadua na Karisito; ia ko sa kaya vakacava, Ena laveti cake na Luve ni tamata? o cei na Luve ni tamata o qo?

³⁵ Sa qai kaya vei ira ko Jisu, Sa tiko vakalailai ga vei kemudou na rarama: dou lako ni sa tu vei kemudou na rarama, de yacovi kemudou na butobuto: ia ko koya sa lako e na butobuto, sa sega ni kila se sa lako kivei.

³⁶ Ni sa tu vei kemudou na rarama, dou vakabauta na rarama, mo dou yaco me luve ni rarama. Sa vosataka na veika o qo ko Jisu, ka lako yani, ka vuni koya vei ira.

³⁷ Ia e dina ya ni sa cakava ko koya e vuqa vakaoqo na ka-mana e matadra, a ra sa sega ga ni vakabauti koya:

³⁸ me vakayacori kina na ka sa vosataka ko Isaia na parofita, ka vaka, Jiova, o cei sa vakabauta na neitoui tukutuku? a sa vakatakilai vei cei na liga i Jiova?

³⁹ A ka o qo era sa sega ni vakabauta rawa kina; ni sa kaya tale ko Isaia,

⁴⁰ Sa vakamatabokotaki na matadra, ka vakaukauwataki na lomadra: me kakua ni rai na matadra, se kila na lomadra, ka saumaki mai, ka meʼu vakabulai ira.

⁴¹ Sa vosataka na veika o qo ko Isaia, ni sa raica na nona serau, ka tukuni koya.

⁴² Ia sa lewe vuqa ga vei ira na turaga era sa vakabauti koya; ia, e na vukudra na Farisi, era sa sega ni tukuna, de ra biu mai na vale ni lotu:

⁴³ ni ra sa vinakata vakalevu me vakarokorokotaki ira ko ira na tamata, ka vakalailai ga me vakarokorokotaki ira ko na Kalou.

⁴⁴ Sa qai kaci ko Jisu, ka kaya, O koya sa vakabauti au, sa sega ni vakabauti au ga, o koya talega sa talai au mai:

⁴⁵ ia ko koya sa raici au, sa raici koya sa talai au mai.

⁴⁶ Au sa lako mai ki vuravura me rarama, me kakua ni tiko e na butobuto ko koya yadua sa vakabauti au.

⁴⁷ Ia kevaka e dua sa rogoca na noqu vosa, ka sega ni vakabauta, au sa sega ni lewai koya: niʼu sa sega ni lako mai me lewai ira na kai vuravura, a ya me vakabulai ira na kai vuravura.

⁴⁸ Sa dua sa lewai koya sa biuti au, ka sega ni vakabauta na noqu vosa: a vosa kaʼu sa vosataka, sai koya o qo ena lewai koya e na siga maimuri.

⁴⁹ Niʼu sa sega ni vosa vakai au; ia ko Tamaqu sa talai au mai, sa vakarota vei au na ka meʼu kaya, kei na ka meʼu tukuna.

⁵⁰ Ia kaʼu sa kila ni sa vu ni bula tawa mudu na nonai vakaro: o koya ga, e na ka kecega kaʼu sa vosataka, au sa vosa me vaka na ka sa kaya vei au ko Tamaqu.