Joni 1 - AI VOLA TABU

A WASE I. —Sa tukuni ni sa Kalou ko koya na Vosa, ka yaco me tamata talega, 1-18. Ai tukutuku i Joni, 19-39. Erau sa kacivi mei talatala i Jisu ko Adriu kei Petero. Eratou sa veikune ko Jisu kei Filipo kei Nacanieli, 40-51.

¹ E NAI vakatekivu sa bula ko koya na Vosa, a rau sa tiko vata kei na Kalou ko koya na Vosa, a sa Kalou ko koya na Vosa.

² Erau sa tiko vata ko koya o qo kei na Kalou e nai vakatekivu.

³ Ko koya sa caka kina na ka kecega; a sa sega e dua na ka sa caka, me sega ni cakava ko koya.

⁴ Sa tu na bula vei koya; ia sa nodra rarama na tamata na bula.

⁵ A sa cilava na butobuto na rarama; ia na butobuto sa sega ni kunea.

⁶ Sa dua na tamata sa talai mai vua na Kalou, a yacana ko Joni.

⁷ O koya o qo sa lako mai me dautukutuku, me tukuni koya na Rarama, me ra vakabauta na tamata kecega e na vukuna.

⁸ Sa sega ni Rarama ko ya ko koya, ia sa nonai tavi me tukuna ga na Rarama.

⁹ Sai koya ga o qo na Rarama dina, sa lako mai ki vuravura ka vakararamataki ira na tamata kecega.

¹⁰ Sa tiko e vuravura ko koya, a sai koya ka caka kina ko vuravura, ia ka sega ni kilai koya ko ira na kai vuravura.

¹¹ Sa lako mai ko koya ki na nona, ka sega ni vakabauti koya ko ira na kai nona.

¹² Ia ko ira kecega sa vakabauti koya, sa solia ko koya vei ira me ra yaco rawa me ra luve ni Kalou, vei ira sa vakabauta na yacana:

¹³ era sa vakasucumi, e sega e na vukudra na qase, se na sucu vakayago, se na veitalia ni tamata, mai na Kalou ga.

¹⁴ A sa yaco me tamata ko koya na Vosa, ka tiko vata kei keda, (ia keitou a raica na nonai ukuuku, ni sa vaka nai ukuuku ni Le dua bauga sa vakasikavi maivei Tamana,) sa sinai e na loloma kei na dina.

¹⁵ Sa tukuni koya ko Joni, ka kacivaka, ka kaya, Sai koya o qo kaʼu a vosataka, O koya sa muri au sa uasivi caka vei keirau; ni sa liu vei keirau ko koya.

¹⁶ Ia eda sa rawata kecega, mai na ka sa sinai tu vua, a loloma sa vakaikuri.

¹⁷ Ia ko Mosese sa soli kina na vunau; ko Jisu Karisito sa yaco kina na loloma kei na dina.

¹⁸ E sega e dui na tamata sa raica na Kalou e na gauna e dua; ko na Luvena ga e dua bauga, sa vakasikava ko koya, o koya sa tiko e na lomasere i Tamana, sa tukuna.

¹⁹ IA sai koya o qo nai tukutuku i Joni, ni sa tala e so na bete ka so na luve i Levi ko ira na kai Jutia mai Jerusalemi me ra tarogi koya, O cei beka ko iko?

²⁰ A sa tukuna ko koya, ka sega ni cakitaka; ka tukuna ga, Au sa sega ni Karisito koi au.

²¹ A ra sa tarogi koya, O cei talei o Ilija beka? A sa kaya ko koya, E segai. O iko beka na parofita ko ya? A sa kaya ko koya, E segai.

²² Era sa qai kaya vua, O cei beka ko iko? me keitou tukuna yani vei ira sa talai keitou: o sa tukuni iko mei cei?

²³ Sa kaya ko koya, Oi au na domona e dua sa kacikaci e loma ni veico, Vakadodonutaka na sala i Jiova, me vaka sa kaya na parofita ko Isaia.

²⁴ Ia ko ira sa talai mai, era sa maivei ira na Farisi.

²⁵ A ra sa tarogi koya, ka kaya vua, O sa qai veipapitaisotaki e na vuku ni cava, ni ko sa sega ni koya na Karisito, se Ilija, se na parofita ko ya?

²⁶ Sa vosa vei ira ko Joni, ka kaya, Au sa veipapitaisotaki e na wai: ia ka sa tu e na kemudou maliwa e dua dou sa sega ni kila;

²⁷ sai koya o qo, sa muri au ka sa uasivi cake vei au, ia na wa ni nonai vava kaʼu sa sega ni yaga meʼu sereka.

²⁸ Sa kitaki na veika o qo mai Peca-para e na tai kadua ni Joritani, a tikina sa veipapitaisotaki kina ko Joni.

²⁹ E na sabogibogi sa raici Jisu ko Joni ni sa lako mai vua, a sa kaya, Raica na Lami ni Kalou, o koya sa kauta tani na nodrai valavala ca na kai vuravura.

³⁰ Sai koya o qo kaʼu a tukuna, Sa muri au e dua na tamata, sa uasivi cake vei au: ni sa liu vei keirau.

³¹ Ia kaʼu a sega ni kilai koya; ia me kilai koya ko ira na Isireli, o koya o qo kaʼu sa lako mai kina ka veipapitaisotaki e na wai.

³² A sa tukuna ko Joni, ka kaya, Au a raica na Yalo ni sa lako sobu mai lomalagi me vaka na ruve, a sa mai toka vua:

³³ ia kaʼu a sega ni kilai koya eliu: ia ko koya sa talai au mai me veipapitaisotaki e na wai, sa kaya ga vei au, O koya ko na raica ni sa lako sobu kina na Yalo, a sa mai toka vua, sai koya o qo sa veipapitaisotaki e na Yalo Tabu.

³⁴ Ia kaʼu a raica, ka tukuna ni sai koya o qo na Luve ni Kalou.

³⁵ E na sabogibogi sa tu tale ko Joni, kei rau e lewe rua na nona tisaipeli;

³⁶ a sa vakaraici Jisu ni sa lako voli, a sa kaya, Raica na Lami ni Kalou!

³⁷ A sa rogoca na nona vosa koi rau na tisaipeli, ka rau sa muri Jisu.

³⁸ Sa qai vuki ko Jisu, ka raici rau ni rau sa muria, ka kaya vei rau, A cava drau sa vakasaqara? Erau sa qai kaya vua, Rapi, (a kenai balebale, Vakavuvuli,) o sa tiko maivei?

³⁹ Sa kaya vei rau ko koya, Lako mai ka raica. Erau sa lako, ka raica na yasana sa tiko kina ko koya, ka ratou sa tiko vata kaya e na siga ko ya; a sa voleka nai katini ni tiki-ni-siga.

⁴⁰ Sa dua vei rau sa rogoci Joni, ka muri Koya, ko Adriu na taci i Saimoni Petero.

⁴¹ Sa kunea ko koya eliu na tuakana ko Saimoni, ka kaya vua, Keitou sa kunea na Mesaia; (a kenai balebale, a Karisito.)

⁴² A sa kauti koya mai vei Jisu. Ia sa vakaraici koya ko Jisu, ka kaya, O iko ko Saimoni na luve i Jona: o na vakatokai ko Kifa; (a kenai balebale ko Petero.)

⁴³ E na sabogibogi sa via lako yani ki Kalili ko Jisu, a sa kunei Filipo, ka kaya vua, Muri au.

⁴⁴ A sa kai Peciseita ko Filipo, a nodrau koro ko Adriu kei Petero.

⁴⁵ Sa kunei Nacanieli ko Filipo, ka kaya vua, Keitou sa kunei koya sa vola kina ko Mosese e na vunau, kei ira talega na parofita, o Jisu na kai Nasareci, a luve i Josefa.

⁴⁶ A sa kaya vua ko Nacanieli, E tubu rawa beka mai Nasareci e dua na ka vinaka? Sa kaya vua ko Filipo, Lako mai ka raica.

⁴⁷ Sa raici Nacanieli ko Jisu ni sa lako mai vua, a sa kaya ni sa tukuni koya, Raica e dua sa luve i Isireli dina, sa sega vei koya na dauveivakaisini!

⁴⁸ Sa kaya vua ko Nacanieli, O sa kilai au maivei? Sa vosa ko Jisu, ka kaya vua, Ni sa bera ni kacivi iko ko Filipo, ni ko a tiko e ruku ni lolo, au a raici iko.

⁴⁹ Sa vosa ko Nacanieli, ka kaya vua, Vakavuvuli, o iko na Luve ni Kalou; o iko na nodra Tui na Isireli.

⁵⁰ Sa vosa ko Jisu, ka kaya vua, E na vuku niʼu sa kaya vei iko, Au a raici iko e ruku ni lolo, ko sa vakabauta, ne? o na raica na veika sa uasivia o qo.

⁵¹ A sa kaya vua ko koya, E dina, e dina, au sa kaya vei kemudou, E na gauna maimuri dou na raici lomalagi ni sa tawase, kei ira na agilose ni Kalou ni ra sa lako cake ka lako sobu me ra qarava na Luve ni tamata.