Jona 3 - AI VOLA TABU

O Jona, ni sa talai tale, sa laʼki vunauci ira na kai Ninive, 1-4. Ni ra veivutuni na kai Ninive, sa veivutuni talega na Kalou, 5-10.

¹ A SA yaco tale vakarua vei Jona na vosa i Jiova, ka vaka,

² Mo tu cake, mo lako ki Ninive, na koro levu ko ya, ka vunautaka kina na vunau kaʼu a kaya vei iko.

³ A sa tu cake ko Jona, ka lako yani ki Ninive, me vaka na vosa i Jiova. Ia ko Ninive na koro levu sara eda na bogi tolu ni da vakavolitaka.

⁴ A sa vakatekivu ko Jona me curu ki na koro ka tautauvata kei na lako e na dua na siga, a sa vunau, ka kaya, Me sa bogi vasagavulu, a qai vukici ko Ninive.

⁵ A ra sa vakabauta na Kalou na kai Ninive, ka tukuna me ra lolo, a ra sa vakaisulu e nai sulu taqarotu ko ira na turaga kei ira talega na kaisi.

⁶ Ni sa rogo na vosa o qori vei tui Ninive, a sa tu cake ko koya mai na nonai tikotiko vakaturaga, ka luvata tani na nonai sulu vakatui, a sa vakaisulu e nai sulu taqarotu, ka laʼki tiko e na dravusa.

⁷ A sa kacivaki ka tukuni sara e Ninive, ni sa vunautaka ko na tui kei ira na kena turaga, ka vaka, Me kakua ni dua na tamata se na manumanu, na karavau se na sipi, me kania e dua na ka: me ra kakua ni kana, se gunu wai:

⁸ ia me ra vakaisulu e nai sulu taqarotu na tamata kei na manumanu, ka tagi matua vua na Kalou: me ra dui saumaki yadua talega mai dui nona sala ca, kei nai valavala kaukauwa sa dui tu e ligadra.

⁹ O cei e kila de na saumaki beka na Kalou ka veivutuni, ka lesu mai na nona cudru waqawaqa, me da kakua ni rusa?

¹⁰ A sa raica na Kalou na nodra cakacaka, ni ra sa saumaki mai na nodra sala ca; a sa veivutuni na Kalou e na vuku ni ca sa kaya me cakava vei ira; a sa sega ni cakava.