Jona 2 - AI VOLA TABU

A masumasu i Jona, 1-9. Sa vakabulai koya ko Jiova, 10.

¹ A SA masu ko Jona vei Jiova na nona Kalou, mai na kete ni ika;

² a sa kaya, Au a tagi vei Jiova e na vuku ni noqu rarawa, a sa rogoci au ko koya; mai na loma i etesi kaʼu a qoqolou, ko a rogoca na domoqu.

³ Ni ko a biuti au ki na wasa titobu, ki na loma ni wasa levu; ia na ua sa vakavolivoliti au: a nomu biau sese kei na nomu biau tubu kecega sa sevi au.

⁴ Ia koi au kaʼu a kaya, Au sa vakasevi tani mai na matamu; ia kaʼu na goleva tale na nomu vale tabu.

⁵ Sa mai luvuci au na wai, sa yacova sara na yaloqu: sa voliti au na wai titobu, sa viviraka na uluqu na lumi.

⁶ Au a lako sobu ki na vu ni veiulu-ni-vanua; ia ko vuravura, na kenai sogo sa vakalali au ka tawa mudu: ia ko sa vueta tani ga na noqu bula mai na rusa, Jiova, na noqu Kalou.

⁷ Ni sa luvu e lomaqu na yaloqu, au a qai nanumi Jiova: a sa curu kivakaki vei iko na noqu masu, ki na nomu vale tabu.

⁸ O ira sa dauqarava na ka lasu wale, era sa biuta na vu ni nodra vinaka.

⁹ Ia koi au, e na domo ni vakavinavinaka kaʼu na ia nai madrali vei iko; au na cakava na ka kaʼu a vosavavakini kina. Sa maivei Jiova na veivakabulai.

¹⁰ A sa vosa ko Jiova ki na ika, a sa luaraki Jona ki na vanua mamaca.