Jona 1 - AI VOLA TABU

A WASE I. —O Jona, ni sa talai ki Ninive, sa dro ki Tarisisi, 1-3. Sa labati ira na cagi levu, a sa kilai kina ni sa dro ko Jona, 4-12. Sa balati ki wai, 13-16. Sa tilomi koya e dua na ika levu, 17.

¹ A SA yaco na vosa i Jiova vei Jona na luve e Emitai, ka vaka,

² Mo tu cake, mo lako ki Ninive, na koro levu ko ya, ka vunauca; ni sa lako cake mai ki mataqu na nodra ca.

³ Ia ka sa tu cake ko Jona me dro ki Tarisisi mai na mata i Jiova, a sa lako sobu ki Yafa; a sa kunea e dua na waqa sa soko ki Tarisisi: a sa solia nai lavo me nona vodovodo, ka laʼki vodoka, ka me lako kei ira ki Tarisisi mai na mata i Jiova.

⁴ Ia ko Jiova sa tala yani e dua na cagi levu ki na wasawasa, a sa cava levu na Wasawasa, ia na waqa sa nanumi ena sa mate ga.

⁵ Era sa qai rere na lewe ni waqa, a ra sa dui tagi yadua ki na nona kalou, a ra biuta ki wai nai usa ni waqa, me nawa. Ia ko Jona sa lako sobu ki dreke; a sa moce lutu koto.

⁶ A sa toro vua na turaga ni waqa, ka kaya vua, O sa vakaevei ni ko sa moce lutu koto? tu cake, ka tagi vua na nomu Kalou, de na nanumi keda beka mai na Kalou, me da kakua ni mate.

⁷ A ra sa veivosaki, ka kaya, Me da mai vakawiri madigi, me da kila se na vuku i cei sa yaco kina na ca o qo vei keda. A ra vakawiri madigi, a sa qaravi Jona.

⁸ A ra sa kaya vua, Tukuna mada vei keitou, se na vuku ni cava sa yaco kina na ca o qo vei keda; o sa matai ni cava? ia ko sa lako maivei? o cei na nomu vanua? ia dou sa yavusa vata kei cei?

⁹ A sa kaya vei ira ko koya, Oi au na Iperiu; ia ko Jiova, na Kalou ni lomalagi, kaʼu sa rerevaka, o koya sa bulia na waitui kei na vanua mamaca.

¹⁰ A ra sa qai rere vakalevu sara na tamata, a ra sa kaya vua, A cava ko sa cakava kina na ka o qo? ni ra kila na tamata, ni sa dro ko koya mai na mata i Jiova, ni sa tukuna vei ira.

¹¹ A ra sa qai kaya vua, A cava me keitou kitaka vei iko, me maravu kina na wasawasa vei keda? ni sa tubu vakalevu cake tikoga na biau e na wasawasa.

¹² A sa kava vei ira ko koya, Dou laveti au, ka balati au ki waitui; ena qai mudu ni labati kemudou na biau: niʼu sa kila ni sai au ga sa liwaki kemudou kina na cava levu o qo.

¹³ A ra sa tabalaka nai voce na tamata me vakasavuya donu ki vanua na waqa; a ra sa sega ni rawata: ni sa tubu vakalevu cake tikoga vei ira na biau e na wasawasa.

¹⁴ A ra sa tagi vei Jiova, ka kaya, Keitou sa masuti iko, Jiova, keitou sa masuti iko, me keitou kakua ni mate nai sau ni tamata o qo, ia me kakua ni tauci keitou na dra tawa cala: ni sai iko, Jiova, sa cakava na nomu veitalia.

¹⁵ A ra sa laveti Jona cake, ka balati koya ki waitui: a sa qai mudu ni cudru na Wasawasa.

¹⁶ Ia ko ira na tamata era sa qai rerevaki Jiova vakalevu sara, a ra sa cabora nai soro vei Jiova, ka ia na vosavavakini.

¹⁷ A SA vakarautaka ko Jiova e dua na ika levu me tilomi Jona. A sa tiko ko Jona mai na kete ni ika ka siga tolu ka bogi tolu.