Joeli 3 - AI VOLA TABU

A veicudruvi ena yaco mai vua na Kalou vei ira na meca ni nona tamata, 1-8. Ena kilai kina na Kalou ni sa ia na veicudruvi, 9-17. Ena vinaka sara na nodra tiko na nona tamata, ka ca sara ko Ijipita kei Itomi, 18-21.

¹ NI na yaco, raica, e na veisiga ko ya, kei na gauna ko ya, niʼu sa kauti ira mai na Juta kei na kai Jerusalemi era sa vakabobulataki,

² kaʼu na qai vakasoqoni ira vata na lewe ni veimatanitu kecega, ka kauti ira sobu ki na buca i Josafati, ka ia na veilewai kei ira maikea e na vukudra na noqu tamata kei na noqui votavota na Isireli, o ira sa ra dui veiseyaka ki na veivanua, a noqu vanua talega sa ra vota:

³ a noqu tamata talega sa ra veidigiyaka; ka solia na goneatagane nai voli ni alewa dauyatagane, kei na gonealewa sa ra volitaka e na waini, me ra gunuva.

⁴ Ia a cava dina talega koi kemudou me ia kei au, Teiri, kei Saitoni, kei na yasayasa vaka-Filisitia kecega? na veisaumi dou na ia li vei au? ia ke dou sa ia na veisaumi vei au, ke na vakidacala ka vakasauri na noqu vakasuka na nomudou veisaumi ki na ulumudou:

⁵ e na vuku ni noqu siliva kei na noqu koula dou sa kauta, kei na noqu ka vinaka e domoni dou sa yauta ki na nomudou bure kalou:

⁶ o ira talega na gone ni Juta kei na gone ni Jerusalemi dou sa volitaka vei ira na kai Javana, mo dou dui vakasevi ira vakayawa tani e na nodrai yalayala.

⁷ Raica, au na vakaturi ira cake mai na yasana dou sa volitaki ira kina, ka vakasuka na nomudou veisaumi ki na ulumudou:

⁸ au na volitaki ira talega na luvemudou tagane, kei na luvemudou alewa, ki na ligadra na gone ni Juta, a ra na volitaki ira ki na kai Sipa, ki na matanitu vakayawa: ni sai Jiova e cavuta.

⁹ Dou kacivaka na ka o qo e na veima tanitu; Dou vakarautaka nai valu; vakayadrati ira na qaqa; me ra toro mai, me ra mai lako cake na tamatai valu kecega:

¹⁰ dou tukitukia nai sivi ni nomudoui siviyara mei seleiwau, kei na nomudoui sele ni samaki me moto: me kaya ko koya sa malumalumu, Au sa kaukauwa.

¹¹ Dou soqoni vata sara, ka lako kece mai, na lewe ni veimatanitu, dou vakasoqoni vata mai na veiyasana: ia kikea mo vakalakovi ira sobu, Jiova, na nomu qaqa.

¹² Me ra vakayadrati na lewe ni veimatanitu, me ra lako cake mai ki na buca i Josafati: ni sa maikea kaʼu na tiko me lewai ira na veimatanitu era tiko volita.

¹³ Dou vakacuruma nai sele-takelo, ni sa matua dreu na sila: dou mai lako sobu; ni sa sinai nai keli-waini, sa vuabale nai keli; ni sa levu na nodra ca.

¹⁴ Na kena lewe vuqa, na kena lewe vuqa e na buca ni veicudruvi! ni sa voleka mai na siga i Jiova e na buca ni veicudruvi.

¹⁵ A mata-ni-siga kei na vula ena vakabutobutotaki, kei na kalokalo ena kakua ni cila mai.

¹⁶ Ia ko Jiova ena tagi mai Saioni, ia mai Jerusalemi, ena tabalaka na domona; ena yavavala talega na lomalagi kei vuravura: ia ko Jiova ena nodrai drodro na nona tamata, kei na nodra koro kaukauwa na luve i Isireli.

¹⁷ Dou na qai kila kina ni sai au ko Jiova na nomudou Kalou sa tiko mai Saioni, na noqu ulu-ni-vanua tabu: ena qai tabu ko Jerusalemi, ka sega na kai tani me na lako voli tale kina.

¹⁸ Ia ena yaco e na siga ko ya, ena vakatauca na waini vou na veiulu-ni-vanua, a veiulu-ni-koro talega ena vakadavea na wai-ni-sucu, e na dreke ni wai kece talega ni Juta ena drodro kina na wai, ia e dua na mata-ni-wai ena tovure mai na vale i Jiova, ka vakasuasuataka na buca ko Sitimi.

¹⁹ O Ijipita, ena lala sara mai; o Itomi talega, ena veikau lala sara; e na vuku ni sai valavala vakaukauwa vei ira na luve i Juta, e na vuku ni ra sa vakadavea na dra tawa cala e na nodra vanua.

²⁰ Ia ko Juta, ena tawa ga ta tawa mudu, kei Jerusalemi, mai nai tabatamata ka yaco ki nai tabatamata.

²¹ Ia kaʼu na cavuta me tawa cala na kedra dra kaʼu a tawa cavuta me tawa cala: ia ko Jiova ena tiko ga mai Saioni.