Joeli 2 - AI VOLA TABU

Sa vakatakila ko koya ni na ka rerevaki sara na veicudruvi sa voleka ni yaco, 1-11. Sa vakarota na veivutuni, 12-14; kei na lolo, 15-17; a sa tukuna na vosa ni yalayala vei ira e veivutuni, 18-27. Sa tukuna talega ni na sovaraki vakalevu na Yalo Tabu e na gauna maimuri, 28-32.

¹ DOU uvuca na davui e Saioni, ka kacivaka nai valu e na noqu ulu-ni-vanua tabu; me ra sautaninini kecega na lewe ni vanua: ni sa lako mai na siga i Jiova, ni sa voleka mai;

² a siga butobuto ka loaloa, a siga ni o kei na butobuto levu, me vaka na mataka ni sa seselaka e na veiulu-ni-vanua: e dua na mataqali lewe vuqa ka kaukauwa; sa sega sara e vakakina eliu, ena sega talega me vakakina emuri, e na veiyabaki ni tabatamata sa veitaravi.

³ E matadra, sa kanakana tu na buka; e dakudra talega, sa caudre tu na yameyame ni buka: sa vaka na were ko Iteni na vanua e matadra, ia e dakudra, sa veikau lala sara; ena sega talega e bula rawa maikina.

⁴ Sa raici vakaose na kedrai rairai; ka vakataki ira e vodo e na ose, era na cici vakakina.

⁵ Ena vaka na domo ni vale-vodoki e na dela ni ulu-ni-vanua na nodra ladelade, me vaka na domo ni yameyame ni buka sa katia na vu-ni-sila, me vaka na mataqali qaqa e lautuva vakaivalu.

⁶ Mai matadra, era na taqaya sara na tamata: a matadra kecega ena ca mai.

⁷ Era na cici me vakai ira na tamata kaukauwa; era na kabata na bai me vakai ira na tamatai valu; ia era na dui muria na nona sala, ka tawa lesu tani mai na dui nonai lakolako:

⁸ era na sega talega ni veidrigidrigi, era na dui muria ga na nona sala: ni ra sikalutu ki na gasau, era na tawa lau gasau.

⁹ Era na veiciciyaki e na koro; era na cici e na dela ni bai, era na cabe cake ki na veivale; era na curuma na katuba me vaka na daubutako.

¹⁰ Mai matadra, sa na tavuki ko vuravura; sa na yavala na lomalagi: a mata-ni-siga kei na vula ena vakabutobutotaki, kei na kalokalo ena kakua ni cila mai:

¹¹ ia ko Jiova ena tabalaka na domona ni sa liutaki ira na nona mataivalu: ni sa ka levu sara na nonai valu: sa kaukauwa talega ko koya sa vakayacora na nona vosa: sa ka levu na siga i Jiova ka rerevaki sara; ia ko cei me na rawata?

¹² Ia o qo ga, sa kaya ko Jiova, mo dou lesu mai vei au e na vu ni yalomudou, o na lolo talega, kei na wai ni mata kei na tagi yaso:

¹³ ia dou dresulaka na yalomudou, ka sega ni nomudoui sulu, ka lesu vei Jiova na nomudou Kalou: ni sa daulomasoli ka yalololoma, sa berabera ni cudru, a sa vutu ni loloma, a sa veivutunitaka na ca.

¹⁴ O cei sa kila, ena lesu beka ga ka veivutuni, ka laiva kimuri na ka e veivakalougatataki; io, nai madrali laukana kei nai madrali gunuvi vei Jiova na nomudou Kalou?

¹⁵ Dou uvuca na davui e Saioni, dou vakatabuya na siga me ia kina na lolo, kacivaka nai soqosoqo tabu:

¹⁶ vakasoqoni ira na tamata, vakasavasavataki ira nai vavakoso, soqoni ira na qase, vakasoqoni ira vata mai na gone, kei ira sa sucuma tiko na sucu: me lako mai na tagane sa qai vakawati, mai na nona loqi, kei na watina mai na nonai davodavo.

¹⁷ E na tadrua ni curucuru ni vale kei nai cabocabo-ni-soro, me ra mai tagi kina na bete, ia me ra kaya, Mo yalololoma mai, Jiova, vei ira na nomu tamata, ka kakua ni solia na nomui votavota me vakarogocataki, me lewai ira ko ira na veimatanitu: me kainaki vakacava vei ira na veimataqali, Sa evei li na nodra Kalou?

¹⁸ Ena qai vuvu ko Jiova e na vuku ni nona vanua, ka yalololoma vei ira na nona tamata.

¹⁹ Io, ena vosa ko Jiova ka kaya vei ira na nona tamata, Raica, au na vakauta vei kemudou na sila, kei na waini, kei na waiwai, mo dou mamau kina: ia kaʼu na sega ni soli kemudou tale, me vakarogocataki vei ira na veimatanitu:

²⁰ ia ko koya mai na tokalau, kaʼu na kauti koya vakayawa tani vei kemudou, ka vakasavi koya ki na vanua dravuisiga ka lala, a matana ena donuya na waitui ki cake, kei na dakuna na waitui ki ra, ia ena kuvu cake na kena bona, ka kuvu cake na kena boi ca, e na vuku ni sa cakava na ka levu.

²¹ Mo kakua ni rere, na vanua; mo reki ka marau: ni na cakava na ka levu ko Jiova.

²² Dou kakua ni rere, na manumanu ni vanua: ni sa tubu na veico mai lekutu, ni sa vuataka na vuana na kau, a lolo kei na vaini sa bula kaukauwa mai.

²³ Ia koi kemudou na luve i Saioni, dou marau, ka rekitaki Jiova na nomudou Kalou: ni sa solia vakavinaka vei kemudou na uca taumada, io, ena vakatauca vei kemudou na uca tau bi, na uca taumada, kei na uca taumuri me vaka eliu:

²⁴ ena qai sinai na rara ni sila e na sila, ka vuabale nai keli-waini e na waini vou kei na waiwai.

²⁵ Ia kaʼu na, solia tale vei kemudou na veiyabaki sa kania na vodre, kei na vodre dramidrami, kei na nuve, kei na vodre dauquru, na noqui valu levu kaʼu a tala yani vei kemudou.

²⁶ Ia ni sa sautu, dou na kana, ka mamau, ka vakacaucautaka na yaca i Jiova na nomudou Kalou, o koya sa ka mana na nona cakacaka vei kemudou: a ra na sega ni madua na noqu tamata e na dua sara na gauna.

²⁷ Dou na qai kila niʼu sa tiko kei ira na Isireli, ni sai au talega ko Jiova na nomudou Kalou, ka sega e dua tani: a ra na sega sara ni madua na noqu tamata e na dua na gauna.

²⁸ Ia ena yaco e na gauna emuri, kaʼu na sovaraka na Yaloqu kivei ira na tamata kecega, a ra na parofisai ko ira na nomudou goneatagane kei ira na nomudou gonealewa, o ira na nomudou qase era na tadrataka e so na tadra, o ira na nomudou cauravou era na raica e so na raivotu:

²⁹ vei ira talega na tamata wale kei na vada kaʼu na sovaraka na Yaloqu e na gauna ko ya.

³⁰ Ia kaʼu na vakatakila na ka e veivakidacalataki e lomalagi kei vuravura, a dra, kei na buka waqa, kei na o kubou:

³¹ a mata-ni-siga ena matalia me butobuto, kei na vula me dra, ena qai yaco mai emuri na siga i Jiova, e levu ka rerevaki.

³² Ia ena yaco, o koya yadua ena masu ta na yaca i Jiova, ena bula: io, e na ulu-ni-vanua ko Saioni, kei Jerusalemi, ena ia na veivakabulai, me vaka ni sa kaya ko Jiova, vei ira talega na kena vo sa na kacivi ira ko Jiova.