Jeremaia 9 - AI VOLA TABU

Sa tagicaki ira na kai Jutia e na vuku ni nodrai valavala ca sa levu, kei na nodra cudruvi, 1-16.

¹ ME wai mada na uluqu, kai vurevure ni wai na mataqu, meʼu tagi kina e na siga kei na bogi e na vukudra na nona vuetaki na gonealewa ni noqu tamata!

² Me noqu mada mai na veikau e dua na bure vakavulagi; meʼu vakalaivi ira tu na noqu tamata, ka lako tani vei ira! ni ra sa tamata dauyalewa kecega, nai soqosoqo ni daulawaki.

³ A ra sa lokata na yamedra me nodra dakai ni vosa lasu: a sa sega ni ka dina era qaqa kina e vuravura; ni ra sa lako mai na ca ki na ca, a koi au era sa sega ni kila, sa kaya ko Jiova.

⁴ Dou dui raica vinaka na kai nona, ia vua e dua na tacimu kakua ni ko vakararavi kina: ni sai ira kecega na veitacini era na daucaka vaqaseqase, kei ira kecega na kai nomu era na dauia na vosa veivakacacani:

⁵ o ira kece talega, era na dui vakaisina na kai nona, kei na dina era na sega ni vosataka: era sa vakavulica na yamedra me vosa lasu, ia e na caka ka veve era sa dauvakaocataki ira:

⁶ a nomu vale sa tu e na loma ni veivakaisini; e na vuku ni veivakaisini era sa bese ni kilai au, sa kaya ko Jiova.

⁷ O koya o qo sa vosa vakaoqo kina ko Jiova ni lewe vuqa, Raica, au na vakaririgi ira me taka na siliva, ka vakatovolei ira; niʼu na cakacaka vakaevei e na vukuna na gonealewa ni noqu tamata?

⁸ Sa gasau vanataki na yamedra; sa vosa veivakaisini: e na gusuna sa vosa vinaka vua na kai nona, ia e na vu ni yalona sa lawakitaka.

⁹ Meʼu tawa cudruvi ira beka e na vuku ni veika o qo? sa kaya ko Jiova: ia ki na matanitu vakaoqo meʼu tawa sauma beka na yaloqu?

¹⁰ E na vuku ni veiulu-ni-vanua kaʼu na ia na tagi kei na qoqolou, kei na lele e na vuku ni veikoro ni veikau, ni sa kama, me sega e dua e lakova; ena tawa rogoci kina na domo ni manumanu; a manumanu ni lomalagi kei na manumanu ni vanua sa dro; sa yali.

¹¹ Ia kaʼu na cakavi Jerusalemi me koro rusa, me qara ni gata lelevu; ia na veikoro vaka-Juta kaʼu na vakalalataka, me sega e tiko kina.

¹² O cei na tamata vuku, me na kila rawa na ka o qo? ia vei cei sa vosa kina na gusu i Jiova, me sa tukuna ko koya, ni sa kawa ni cava sa ca kina na vanua, ka sa yavu yani me vaka na veikau, me sega e dua e lakova?

¹³ A sa kaya ko Jiova, E na vuku ni ra sa biuta na noqu vunau kaʼu a tauca e matadra, a ra sa sega ni vakarorogo ki domoqu, se muria;

¹⁴ a ra sa muria ga na kaukauwa ni lomadra, kei ira na Peali, o qori ka vakavulici ira kina ko ira na nodra qase:

¹⁵ o koya o qo sa vosa vakaoqo kina ko Jiova ni lewe vuqa, na Kalou nei Isireli; Raica, oi au kaʼu na vakani ira na tamata o qo e na kau gaga, ka vagunuvi ira e na wai gaga:

¹⁶ kaʼu na dui vakasevi ira talega ki na veimatanitu, sa ra tawa kila, se ko ira se na nodra qase: ia kaʼu na talamuri ira e dua nai seleiwau, meʼu vakaoti ira mada ga.

¹⁷ Sa vosa vakaoqo ko Jiova ni lewe vuqa, Dou vakanananu, ka kacivi ira na alewa dautagi, me ra lako mai; ia dou talakitaki ira na vuku, me ra lako mai:

¹⁸ ia me ra kusarawa mai, me ia na tagi e na vukuda, me dave yani mai na matada na wai-ni-mata, ka tavure na wai mai na dreke-ni-matada.

¹⁹ Ni sa dua na domo ni tagi sa rogo mai Saioni, sa kaya, Ule na noda vakacacani! eda sa madua vakalevu, e na vuku ni da sa vakalaiva na vanua, ni sa biuti keda tani na nodai tikotiko.

²⁰ Ia dou rogoca na vosa i Jiova, oi kemudou na alewa, ka vakabauta e na daligamudou na vosa ni gusuna, ka vakavulici ira na luvemudou alewa e na tagi, kei ira yadua na kai nona e na lele.

²¹ Ni sa cabe mai ki na noda katuba ko mate, sa curuma na noda vale vakaturaga, me muduka na gone maitaudaku, kei ira na cauravou mai nai saqata ni koro.

²² Mo kaya, Sa vosa vakaoqo ko Jiova, Ia ena bale na yago ni tamata, me vaka na de-ni-manumanu, e dela ni vanua, ka vaka na sila sa taura ka vakalaiva kimuri ko koya sa tamusuka voli, ia ena sega e dua me kumuni ira.

²³ Sa vosa vakaoqo ko Jiova, Me kakua ni dokai koya na vuku e na nona vuku, me kakua talega ni dokai koya na kaukauwa e na nona kaukauwa, me kakua ni dokai koya na vutuniyau e na nonai yau:

²⁴ ia ko koya sa dokai koya me dokai koya e na ka o qo, ni sa yalomatua me kilai au, ni sai au ko Jiova sa ia na yalololoma, kei na lewa kei na cakacaka dodonu, e vuravura: niʼu sa vinakata na ka o qo, sa kaya ko Jiova.

²⁵ Sa kaya ko Jiova, Raica, ena yaco mai na gauna kaʼu na cudruvi ira kece kina era sa cilivi kei ira sa tawa cilivi;

²⁶ ko Ijipita, kei Juta, kei Itomi, kei na luve i Amoni, kei Moapi, kei ira kece mai na veiyalayala, era sa tiko ga mai na veikau: ni sa tawa cilivi na veimatanitu kecega o qori, ia na mataqali kece nei Isireli era sa tawa cilivi e na yalodra.