Jeremaia 7 - AI VOLA TABU

Sa vunautaka na veivutuni ko Jeremaia, me vakadaroi kina na nodra vakabobulataki wa kai Jutia, 1-7. Na ka ca sa yacovi ira na nodra qase mai Silo ena yacovi ira talega, ni ra sa muria na nodrai valavala, ka dauqarava na kalou lasu, 8-20. Sa cata ko Jiova na nodra cakacaka vakailasu vua, 21-28. Sa vakaroti ira me tagicaka na nodrai valavala vakasisila mai Tofeci, ni na cudruva ga na Kalou, 29-34.

¹ A VOSA sa yaco vei Jeremaia maivei Jiova, ka vaka,

² Mo tu e na matamata-ni-koro ni vale i Jiova, ka tukuna na vosa o qo, ka kaya, Dou rogoca na vosa i Jiova, na Juta kecega, sa curu ki na matamata-ni-koro o qo me soro vei Jiova.

³ Sa vosa vakaoqo ko Jiova ni lewe vuqa, na Kalou nei Isireli, Dou cakava me vinaka na nomudou sala kei na nomudoui valavala, kaʼu na qai cakava mo dou tiko e na yasana o qo:

⁴ dou kakua ni vakararavi e na vosa lasu, me kaya, A vale tabu i Jiova, A vale tabu i Jiova, A vale tabu i Jiova, o qo.

⁵ Ia kevaka dou sa cakava me vinaka sara na nomudou sala kei na nomudoui valavala; kevaka dou sa ia na veilewai dina e na vukudrau na tamata kei na kai nona;

⁶ kevaka dou sa sega ni vakasaurarataki iratou na vulagi, kei na luveniyali, kei na alewa dawai, ka sega ni vakadavea na dra tawa cala e na yasana o qo, ka sega ni muria na kalou tani mo dou ca kina:

⁷ kaʼu na qai cakava mo dou tiko ga e na yasana o qo, e na vanua kaʼu a solia vei ira na nomudou qase, me tawa mudu.

⁸ Kaica, dou sa vakararavi e na vosa lasu, e sa tawa yaga.

⁹ Mo dou butako li, ka laba, ka ia na veibutakoci, ka vosavavakini vakailasu, ka vakacaudreva na ka boi vinaka vei Peali, ka muria na kalou tani e kemudou sa sega ni kila;

¹⁰ ka qai lako mai ka tu e mataqu e na vale o qo, a ya sa vakatokai kina na yacaqu, ka kaya, Keimami sa vakabulai me cakava na ka vakasisila kece o qo?

¹¹ A vale o qo, a ya sa vakatokai kina na yacaqu, sa qai yaco beka me nodra qara na daubutako e na matamudou? Io, koi au, raica, kaʼu sa kunea, sa kaya ko Jiova.

¹² Ia dou lako mada ki na noqu tikina ko ya mai Silo, o koya kaʼu a vakatikora kina na yacaqu eliu, ka raica na ka kaʼu a cakava kina e na vuku ni nodra ca na noqu tamata na Isireli.

¹³ Ia o qo, e na vuku ni dou sa cakava na cakacaka kece o qo, sa kaya ko Jiova, io, niʼu a vosa tikoga vei kemudou, ka sou e na sabogibogi me vosa vei kemudou, dou a sega ga ni rogoca; ia kaʼu a kaci yani, dou a sega ga ni rogo mai;

¹⁴ o koya o qo kaʼu na cakava kina ki na vale o qo, a ya sa vakatokai kina na yacaqu, ka dou sa vakararavi kina, io ki na yasana o qo kaʼu a solia vei kemudou kei ira na nomudou qase, mo vaka kaʼu a cakava ki Silo:

¹⁵ kaʼu na biuti kemudou tani talega e mataqu, me vaka kaʼu a biuti ira tani na kai nomudou, io na kawa kecega i Ifireimi.

¹⁶ Ia ko iko, mo kakua ni masulaki ira na tamata o qo, mo kakua talega ni ia e na vukudra na tagi se na masumasu, mo kakua talega ni ia na veimasulaki vei au: niʼu na sega ni rogoci iko.

¹⁷ O sa sega beka ni raica na ka era cakava e na veikoro vaka-Juta kei na sala ni koro ko Jerusalemi?

¹⁸ na gone, era ca buka; na tamadra, era tutuvaka na buka; o ira na alewa, era natuka na madrai droka, me cakava na kenai buli madrai na ranadi ni lomalagi, a ra sova nai sevu na medra na kalou tani, me ra vakacudrui au.

¹⁹ Se ra sa vakacudrui au? sa kaya ko Jiova, se ra sa vakacudrui ira vakai ira beka ga me madua kina na matadra?

²⁰ O koya o qo sa vosa vakaoqo kina na Turaga ko Jiova; Raica, na noqu cudru, ia na noqu cudru waqawaqa ena sova yani ki na yasana o qo, ki na tamata, kei na manumanu, kei na kau ni vanua, kei na vuata ni soso; ia ena kama, ka sega ni bokoci.

²¹ Sa vosa vakaoqo ko Jiova ni lewe vuqa, na Kalou nei Isireli; A nomudoui soro kama dou mani viritaka ki na nomudoui madrali, ka kania na lewena:

²² niʼu a sega ni vosa vei ira na nomudou qase, se vakaroti ira e na siga kaʼu a kauti ira kina mai na vanua ko Ijipita, e na vuku ni soro kama kei nai madrali:

²³ ia na ka ga o qo kaʼu a vakarota vei ira, ka kaya, Dou vakarorogo ki na domoqu, kaʼu na qai nomudou Kalou, ia kemudou, dou na yaco me noqu tamata: dou muria kece talega na sala kaʼu a vakarota vei kemudou, mo dou vinaka kina:

²⁴ a ra sa sega ni vakarorogo, se vakatu daligadra, era sa muria ga na lewa kei na kaukauwa ni lomadra ca, era sa lako kimuri, ka sega ni lako kiliu.

²⁵ Mai na siga era sa lako mai kina na nomudou qase mai na vanua ko Ijipita ka yacova na siga o qo, kaʼu a talai ira kecega na noqu parofita vei kemudou, kaʼu a sou c na sabogibogi ka tala:

²⁶ a ra sa sega ni vakarorogo vei au, se vakatu daligadra, era vakadomoqataki ira ga: era cakava vakalevu na ca ka vakalailai ko ira na nodra qase.

²⁷ Ia ko na vosataka vei ira na vosa kecega o qo: a ra na sega ga ni vakarorogo vei iko: ia ko na kaci yani vei ira; a ra na sega ni rogo mai vei iko.

²⁸ Ia mo kaya vei ira, O qo na matanitu sa sega ni vakarorogo ki na domo i Jiova na nodra Kalou, se vakavulici rawa: sa oti na vosa dina, a sa mudu e na gusudra.

²⁹ Kotiva na drau ni ulumu, Jerusalemi, ka biuta tani, ka ia e na veiyasana cecere na tagi; ni sa biuta ko Jiova ka vakalaiva nai tabatamata o qo sa cudruva.

³⁰ Ni ra sa cakava na luve i Juta na ka ca e mataqu, sa kaya ko Jiova: era sa vakaduria na nodra ka vakasisila e na vale sa vakatokai kina na yacaqu, me vakadukadukalitaka;

³¹ a ra sa tara na veitikina cecere mai Tofeci, a ya mai na buca ni luve i Inomi, me vakama na luvedra tagane kei na luvedra alewa e na buka; na ka kaʼu a sega ni vakarota, ka sa sega ni tubu e lomaqu.

³² O koya o qo sa kaya kina ko Jiova, Raica, ena yaco mai na gauna ena sega ni vakatokai tu kina ko Tofeci, se na buca ni luve i Inomi, ia na buca ga ni veivakamatei: ni ra na ia na veibulu mai Tofeci, me na sega na tikina e vo;

³³ na yagodra talega na tamata o qo ena kedra na manumanu ni lomalagi, kei na manumanu ni vanua; ka sega e dua me kuruya tani.

³⁴ Kaʼu na qai muduka tani mai na veikoro vaka-Juta, kei na sala ni koro ko Jerusalemi, na domo ni marau, kei na domo ni reki, na domo ni tagane kei na domo ni alewa, sa qai vakawati: ni na lala na vanua.